វគ្គបណ្តុះបណ្តាលស្តីពីការយល់ដឹងអំពីហានិភ័យនិងទម្រង់ពាក់ព័ន្ធផ្សេងៗនៃអំពើកេងប្រវ័ញ្ចផ្លូវភេទលើកុមារតាមប្រព័ន្ធអនឡាញនិងយន្តការឆ្លើយតប

ខេត្តសៀមរាប ÷ នាព្រឹកថ្ងៃទី៣១ ខែមីនា ឆ្នាំ២០២៣ នៅសណ្ឋាគារសោមាទេវី មន្ទីរប្រៃសណីយ៍និងទូរគមនាគមន៍ ខេត្តសៀមរាប និងអង្គការសកម្មភាពដើម្បីកុមារ (APLE)ក្រោមការគាំទ្រថវិកាពី តាមរយៈ គម្រោងកិច្ចការពារជំនាន់ថ្មីឬ Protection Plusនៃអង្គការភ្លែនអន្តរជាតិនៅកម្ពុជា បានរៀបចំវគ្គបណ្តុះបណ្តាលនេះឡើងជូនដល់មន្ត្រីមន្ទីរប្រៃសណីយ៍និងទូរគមនាគមន៍ មកពី ខេត្តកំពង់ធំ ខេត្តព្រះវិហារ ខេត្តឧត្ដរមានជ័យ ខេត្តកំពង់ឆ្នាំង ខេត្តពោធិ៍សាត់ ខេត្តបន្ទាយមានជ័យ ខេត្តស្ទឹងត្រែង ខេត្តរតនគិរី និងខេត្ត ប៉ៃ លិន ក្នុងនោះមានទាំងបុគ្គលិកក្រុមហ៊ុនធ្វើការលើឧស្សាហកម្មអ៊ីនធឺណិត បច្ចេកវិទ្យា ប្រតិបត្តិករទូរស័ព្ទ អង្គការដៃគូរ ជាតិ អន្តរជាតិ តំណាងប្រតិបត្តិករអ៊ិន ធឺណិត និងប្អូនៗយុវជន អ្នកផលិត Blog Makers YouTuber Content Makers ជាដើមផងសរុបចំនួន៧០នាក់។

វគ្គបណ្តុះបណ្តាលនេះ មានគ្រូបង្គោលជាមន្ត្រីជំនាញមកពីក្រសួងនិងមន្ទីរប្រៃសណីយ៍និងទូរគមនាគមន៍និងអង្គការសកម្មភាពដើម្បីកុមារ ក្នុងគោលបំណងផ្តល់នូវការយល់ដឹងអំពីហានិភ័យដែលអាចកើតមានឡើងចំពោះកុមារ ទម្រង់ពាក់ព័ន្ឋផ្សេងៗនៃអំពើកេងប្រវ័ញ្ចផ្លូវភេទលើកុមារតាមប្រព័ន្ឋអនឡាញ បង្ហាញយន្តការឆ្លើយតប វិធានសុវត្ថិភាពចំពោះកុមារតាមប្រព័ន្ឋអនឡាញ និងវិធានការបង្កាទប់ស្កាត់ផ្សេងៗ។

ក្នុងរបាយការណ៍ របស់ លោកស្រី ហ៊ឹម សោភណ្ឌ ប្រធានកម្មវិធីគាំទ្រ និងផ្តល់ជំនួយសម្រាប់កុមាររងគ្រោះ របស់អង្គការសកម្មភាពដើម្បីកុមារ(APLE) បង្ហាញថា៖នៅកម្ពុជារបាយការណ៍ថ្មីមួយស្តីពីការបញ្ឈប់គ្រោះថ្នាក់នៅកម្ពុជា ចំនួន១១%នៃកុមារដែលប្រើប្រាស់ប្រព័ន្ឋអ៊ិនធឺណិតមានអាយុចន្លោះពី១២ ដល់១៧ឆ្នាំបានពាក់ព័ន្ឋទៅនឹងការកេងប្រវ័ញ្ចនិងការរំលោភបំពានផ្លូវភេទតាមប្រព័ន្ឋអនឡាញក្នុងទម្រង់មួយចំនួនជាក់លាក់ ដូចជាការបោកប្រាស់កុមារឱ្យចូលរួមក្នុងសកម្មភាពផ្លូវភេទ ការចែកចាយរូបភាពផ្លូវភេទដោយគេមានការអនុញ្ញាតិ ឬការបង្ខិតបង្ខំកុមារឱ្យចូលរួមសកម្មភាពផ្លូវភេទតាមរយៈការសន្យាផ្តល់លុយកាក់ឬអំណោយផ្សេងៗ។

លោកស្រី តាន់ សុដានី ប្រធាននាយកដ្ឋានគោលនយោបាយ ICT ក្រសួងប្រៃសណីយ៍និងទូរគមនាគមន៍ មានប្រសាសន៍ថា៖ស្របតាមស្ថាន ភាពកុមារមានភាពរីកចម្រើន ពីមួយថ្ងៃទៅមួយថ្ងៃ បន្ទាប់ពីព្រះរាជាណាចក្រកម្ពុជា បានផ្តល់សច្ចាប័ន លើអនុសញ្ញាអន្តរជាតិជាច្រើន ជាអាទិ៍អនុសញ្ញាស្តីពីសិទ្ធិកុមារនៅឆ្នាំ១៩៩២ ពិធីសារនានាជាច្រើនទៀត ហើយ ក្នុងនាមជាប្រទេស ដែលបានផ្តល់សច្ចាប័ន លើអនុសញ្ញាទាំងនេះ រាជរដ្ឋាភិបាលបានដាក់ចេញនូវយុទ្ធសាស្តចតុកោណផែនការ យុទ្ធសាស្ត្រអភិវឌ្ឍន៍ជាតិ គោលនយោបាយ លិខិតបទដ្ឋាន គតិយុត្តផែនការ សកម្មភាពជាតិ ពាក់ព័ន្ធ នឹងកុមារ និងផែនការអភិវឌ្ឍន៍តាមវិស័យរយៈពេលវែង និងមធ្យមផ្សេងៗទៀត ដើម្បីធានាការអភិវឌ្ឍន៍ផ្តល់ ការងារសមស្រប សមភាព ប្រសិទ្ធភាព និងធានាឱ្យសម្រេចបានតាមគោលដៅអភិវឌ្ឍន៍ប្រកបដោយ ចីរភាពកម្ពុជាឆ្នាំ២០១៦-២០៣០ រួមទាំងបង្កើតយន្តការជាច្រើននៅថ្នាក់ជាតិនិងថ្នាក់ក្រោមជាតិដើម្បីសម្រប សម្រួលដល់ការអនុវត្តលិខិតបទដ្ឋានគតិយុត្តរួមទាំងគោលនយោបាយនិង ផែនការសកម្មភាពដូច បានបញ្ជាក់ខាងលើ ។

ថ្លែងបើកវគ្គបណ្តុះបណ្តាលនោះ លោក សុខ សីហា ប្រធានមន្ទីរប្រៃសណីយ៍និងទូរគមនាគមន៍ ខេត្តសៀមរាប មានប្រសាសន៍ថា៖វគ្គបណ្តុះបណ្តាលនេះឡើងដើម្បីធ្វើការឆ្លុះបញ្ចាំងអំពីសមិទ្ធផល ដើម្បីប្រមូលធាតុចូលសម្រាប់ធ្វើការវាយតម្លៃសម្រាប់ដំណើរឆ្ពោះទៅការអនុវត្តដំណាក់កាលបន្តបន្ទាប់ទៀតលើកិច្ចការពារកុមារដែលរងការរំលោភបំពានផ្លូវភេទ ពិសេសការរំលោភបំពានកុមារតាម ប្រព័ន្ធ អនឡាញ និងផ្តល់នូវការយល់ដឹងអំពីហានិភ័យ ដែលអាចកើតមាន ឡើងចំពោះកុមារ ទម្រង់ពាក់ព័ន្ធផ្សេងៗនៃ អំពើកេងប្រវ័ញ្ចផ្លូវភេទលើកុមារ តាមប្រព័ន្ធអនឡាញបង្ហាញអំពី យន្តការក្នុងការឆ្លើយតបចំពោះហានិភ័យនិងទម្រង់ពាក់ព័ន្ធទាំងនោះវិធានសុវត្ថិភាពចំពោះ កុមារតាមប្រព័ន្ធ អនឡាញ Blocking,Filtering,Reporting វិធានការបង្ការ ទប់ស្កាត់ផ្សេងៗទៀត ។

លោក សុខ សីហា បានបញ្ជាក់ថា៖អំពើជួញដូរមនុស្ស គឺជាវិបត្តិសកលមួយដែលបណ្តាប្រទេសជាច្រើនលើសកលលោកបានជួបប្រទះ ហើយក្នុងនោះប្រទេសកម្ពុជារបស់យើងក៏បានទទួលរងនូវវិបត្តិនេះផងដែរ ដែលធ្វើឱ្យរាជរដ្ឋាភិបាល ក៏ដូចជាប្រជាពលរដ្ឋទាំងអស់មានការព្រួយបារម្ភជាខ្លាំង ។ អំពើហិង្សាទាក់ទងនឹងយេឌ័រ (ពិសេសអំពើហិង្សា ទៅលើកុមារ) ដែលនៅតែបន្តកើតមានអាស្រ័យកត្តាសំខាន់ បី គឺការអប់រំសង្គម ការអនុវត្តច្បាប់ និងការឆក់ឱកាសពីជនល្មើស ដែលធ្វើឱ្យមានការប៉ះពាល់យ៉ាងធ្ងន់ធ្ងរទៅលើបញ្ហាសុខភាពផ្លូវចិត្តរបស់ជនរងគ្រោះ ដែលបានស្តែងចេញតាមរូបភាព អំពើហិង្សាក្នុងគ្រួសារ អំពើរំលោភសេពសន្ថវៈ អំពើជួញដូរមនុស្ស អំពើធ្វើអាជីវកម្មផ្លូវភេទ អំពើកេងប្រវ័ញ្ចកម្លាំងពលកម្ម និងការរំលោភបំពានផ្លូវភេទលើកុមារតាមប្រព័ន្ធអនឡាញ ឬការរំលោភបំពានទៅលើសិទ្ធិ និងសេរីភាពរបស់កុមារ ។

លោកប្រធានមន្ទីរ បានស្នើឱ្យ គ្រប់អ្នកពាក់ព័ន្ធទាំងអស់ធ្វើការតាមដានត្រួតពិនិត្យនិងការ វាយតម្លៃនិងធ្វើបច្ចុប្បន្នកម្មជាប្រចាំដើម្បីឆ្លើយតបទៅនឹងស្ថាន ភាពជាក់ស្តែងរបស់កុមារ ពិសេសអាជ្ញាធរនៅតាមមូលដ្ឋាន ដើម្បីកុមារដែលលទទួលរងនូវការរំលោភបំពានទទួលបាននូវការផ្តល់សេវា និងការយកចិត្ត ទុកដាក់ជាពហុវិស័យបន្ថែមទៀត មានន័យថាធ្វើសកម្មភាពផ្សេងៗគ្នាដើម្បីឈានទៅសម្រេចគោលបំណងរួមតែមួយ ។ ឆ្លៀតក្នុងឱកាសនោះដែរ លោក សុខ សីហា ប្រធានមន្ទីរប្រៃសណីយ៍និងទូរគមនាគមន៍ ខេត្តសៀមរាប មានប្រសាសន៍អំណរគុណចំពោះអង្គការសកម្មភាពដើម្បីកុមារ(APLE)ដែលបានសហការជាមួយមន្ទីរប្រៃសណីយ៍និងទូរគមនាគមន៍ខេត្តសៀមរាប និង អង្គការភ្លែនអន្តរជាតិកម្ពុជាដែលបានសហការឧបត្ថម្ភ ក្នុងការរៀបចំសិក្ខាសាលានេះឡើងដើម្បីធ្វើការឆ្លុះបញ្ចាំងអំពីសមិទ្ធផល ដើម្បីប្រមូលធាតុចូលសម្រាប់ធ្វើការវាយតម្លៃសម្រាប់ដំណើរឆ្ពោះទៅការអនុវត្តដំណាក់ កាលបន្តបន្ទាប់ទៀតលើកិច្ចការពារកុមារដែលរងការរំលោភបំពានផ្លូវភេទ ពិសេសការរំលោភបំពានកុមារតាម ប្រព័ន្ធ អនឡាញនាពេលនេះផងដែរ ៕

ដោយ ÷ ពន្លឺ