ខេត្តកំពង់ឆ្នាំង÷ ព្រៃលិចទឹកស្ថិតនៅចំណុចកោះក្អែរ ភូមិប្រឡាយមាស ឃុំប្រឡាយមាស ស្រុកកំពង់លែង ខេត្តកំពង់ឆ្នាំង អាចនឹងវិនាសហិនហោចដោយសារបទល្មើសកាប់បំផ្លាញព្រៃលិចទឹកយកទៅធ្វើសម្រាកដើម្បីហុំចាប់ត្រីនារដូវប្រាំងខាងមុខ(ហុំសម្រាសចន្លោះខែកុម្ភៈ មីនា)។
យោងតាមកិច្ចសម្ភាសន៍របស់អ្នកសារព័ត៌មានជាមួយប្រជាពលរដ្ឋនាថ្ងៃទី២ ខែវិច្ឆិកា ឆ្នាំ២០២៤ ដែលជាអ្នកកាប់និងដឹកជញ្ជូនព្រៃលិចទឹកបានឲ្យដឹងថា ការកាប់បំផ្លាញព្រៃលិចទឹកទាំងអស់នេះនៅក្នុងភូមិ/ឃុំប្រឡាយមាស គឺដោយសារលោកជ្រុយជាអ្នកផ្ដើមគំនិត ហើយខ្លួនគ្រប់ៗគ្នាមិនមានលទ្ធភាពហើយបានពឹងពាក់លោកជ្រុយដែលជាមេឈ្មួញទិញត្រីផ្តាច់មុខប្រចាំភូមិ/ឃុំប្រឡាយមាស ស្រុកកំពង់លែង ខេត្តកំពង់ឆ្នាំង នេះតែម្តងដោយធ្វើការទូទាត់សងប្រាក់ទៅឲ្យលោក ជ្រុយ វិញនៅពេលប្រមូលចាប់ត្រីនារដូវខែមាឃ ឬក្នុងខែកុម្ភៈមីនា ឆ្នាំ២០២៥ ខាងមុខ។
នាព្រឹកថ្ងៃទី៨ ខែវិច្ឆិកា ឆ្នាំ២០២៤ អង្គភាពយើងបានទូរស័ព្ទទៅសាកសួរលោក ជ្រុយ នាម៉ោង០៨.៤២ នាទីព្រឹកតាម រយៈលេខ 0៧១ ៩៣៣៨៨៧៧ លោក ជ្រុយ បានឲ្យដឹងថាការកាប់កាប់ព្រៃលិចទឹកយកធ្វើជាសម្រាកនោះគឺពិតជាមាន មែនដោយខ្លួនជាអ្នកបោះទុនដើម្បីសម្របសម្រួលឲ្យប្រជាពលរដ្ឋទាំងអស់នោះទៅកាប់ព្រៃលិចទឹកយកមកធ្វើជាសម្រាកហើយខ្លួនជាអ្នករត់ការជូនពួកគាត់ទាំងអស់គ្នាដោយលុយទូទាត់យកវិញនៅពេលប្រមូលចាប់ត្រីខាងមុខ។
មហាជនបានទន្ទឹងរង់ចាំមើលតើសមត្ថកិច្ចជំនាញអាចនាំខ្លួន ជនដែលបានប្រព្រឹត្តបទល្មើសនិងអ្នកដែលផ្តើមគំនិត(លោកជ្រុយ)យកទៅអនុវត្តទោសតាមច្បាប់បានដែរឬទេ? ខណៈរូបភាពនិងសំឡេងជាភស្តុតាងមួយផ្នែកតូចរួចរាល់ហើយដែលសមត្ថកិច្ចជំនាញគួរតែធ្វើការស៊ើបអង្កេតបឋម៕
ដោយ÷ យុទ្ធា
