គ្រួសារជនរងគ្រោះខកចិត្តចំពោះទង្វើរបស់នគរបាលស្រុកដំណាក់ចង្អើរបានដោះលែងជនបង្កខណៈជនរងគ្រោះបានបាត់បង់ជីវិតករណីគ្រោះថ្នាក់ចរាចរណ៍!

ខេត្តកែប÷ លោក ពេ គឹមសាន អាយុ ៤៣ឆ្នាំ ភូមិរនេស ឃុំពងទឹក ស្រុកដំណាក់ចង្អើរ ខេត្តកែប បានដាក់ពាក្យបណ្ដឹងចូលទៅអធិការនគរបាលស្រុកដំណាក់ចង្អើរសុំប្ដឹងឈ្មោះ ទូច សុគន្ធ ភេទប្រុសអាយុ១៥ ឆ្នាំមុខរបរ សិស្សរស់នៅភូមិអង្គទៀន ឃុំសំរោងលើ ស្រុកអង្គស្នូល ខេត្តកណ្ដាល ករណីគ្រោះថ្នាក់ចរាចរណ៍ដែលបណ្ដាលឱ្យភរិយារបស់លោកឈ្មោះ ហ៊ សុធាវី អាយុ៤១ឆ្នាំ បានស្លាប់បាត់បង់ជីវិតនៅពេលដឹកទៅព្យាបាលនៅប្រទេសវៀតណាម។

សូមជម្រាបផងដែរថាគ្រោះថ្នាក់ចរាចរណ៍នេះបានកើតឡើងនៅថ្ងៃទី១៥ ខែកញ្ញា ឆ្នាំ២០២៤ វេលាម៉ោង ៦:៥០ នាទីនៅលើផ្លូវជាតិលេខ៣៣ ស្ថិតនៅភូមិអូរដូង ឃុំពងទឹក ស្រុកដំណាក់ចង្អើរ ខេត្តកែប។ ខណៈនៅពេលមានគ្រោះ ថ្នាក់ចរាចរណ៍ជនរងគ្រោះ និងជនបង្កត្រូវបានសមត្ថកិច្ចដឹកបញ្ជូនទៅព្យាបាលនៅមន្ទីរពេទ្យបង្អែកខេត្តកែបភ្លាមៗតែដោយស្ថានភាពជនរងគ្រោះមានសភាពខ្លាំងមិនអាចព្យាបាលបានគ្រូពេទ្យបានណែនាំឲ្យក្រុមគ្រួសារ យកជនរង គ្រោះទៅព្យាបាលនៅឯប្រទេសវៀតណាម ខណៈនៅពេលទៅដល់ប្រទេសវៀតណាមបានរយៈពេល៤៨ម៉ោង ជនរងគ្រោះក៏បានបាត់បង់ជីវិត។ ចំណែកជនបង្កបានសម្រាកព្យាបាលនូវមន្ទីរពេទ្យក្រោយមកនគរបាលស្រុកដំណាក់ចង្អើរបានអនុញ្ញតឲ្យជនបង្កត្រឡប់ទៅផ្ទះវិញ ដោយមិនបន្តនីតិវិធីរបស់សមត្ថកិច្ចឡើយដែលធ្វើឲ្យជនបង្កមានឱកាសគេចវេសមិនទទួលខុសត្រូវចំពោះបទល្មើសចរាចរណ៍ដែលខ្លួនបានប្រព្រឹត្តទៅលើជនដទៃនៅលើផ្លូវសាធារណៈ។

នៅថ្ងៃទី២១ ខែកញ្ញា ឆ្នាំ២០២៤ អ្នកសារព័ត៌មានយើងបានទាក់ ទងសារសួរលោក ស៊ូ ចាយ អធិការនៃអធិការដ្ឋានស្រុកដំណាក់ចង្អើរ ពីករណីគ្រោះថ្នាក់ចរាចរណ៍ខាងលើ លោកបានឆ្លើយថា កម្លាំងជំនាញរបស់លោកកំពុងរៀបចំសំណុំ រឿងបញ្ជូនទៅលើដើម្បីបន្តនីតិធីតាមច្បាប់។

ទោះជាយ៉ាងណាលោក ពេ គឹមសាន ដែលជាតំណាងឲ្យគ្រួសារ ជនរងគ្រោះមានការខកចិត្តជាខ្លាំងទៅលើចំណាត់ ការរបស់នគរបាលចរាចរណ៍ស្រុកដំណាក់ចង្អើរដែលបណ្ដែតបណ្ដោយ ដោះលែងជនបង្កឱ្យមានសេរីភាពខណៈក្រុមគ្រួសាររបស់លោកមានទុកជាទម្ងន់។ រហូតដល់ថ្ងៃទី២ ខែតុលា ឆ្នាំ២០២៤ ក្រុមគ្រួសារនៃសពអំពាវនាវដល់សមត្ថកិច្ចនគរបាលស្រុកដំណាក់ចង្អើរ នៃស្នងការដ្ឋាននគរបាលខេត្តកែបមេត្តាពន្លឿនីតិវិធីដើម្បីស្វែងរកជនបង្កមកផ្ដន្ទាទោសទៅតាមច្បាប់និងសងសំណងរដ្ឋប្បវេណីដល់ក្រុមគ្រួសារនៃជនរងគ្រោះ៕

ដោយ÷ នេ ប៉ក់