ខេត្តសៀមរាប÷ កាលពីល្ងាចថ្ងៃទី០៥ ខែមករា ឆ្នាំ២០២៥ លោកស្រី ហួន ខេង ជាសមាជិកគណ:កម្មាធិការអនុសាខាកាកបាទក្រហមក្រុងសៀមរាប តំណាងលោក នួន ពុទ្ធារ៉ា ប្រធានគណៈកម្មាធិការអនុសាខាកាកបាទក្រហមក្រុង រួមដំណើរមានមន្រ្តីប្រចាំការកាកបាទក្រហមក្រុង លោកចៅសង្កាត់ចុងឃ្នៀស ប្រធានអ្នកស្ម័គ្រចិត្តសង្កាត់ និងមេភូមិទី៤ បាននាំយកអំណោយមនុស្សធម៌របស់អនុសាខាកាកបាទក្រុងសៀមរាប ជូនដល់គ្រួសាររងគ្រោះដោយភ្លើងឆេះផ្ទះកាលពីថ្ងៃទី០១ខែមករា ឆ្នាំ២០២៥ ដែលមាន ឈ្មោះ ជិន លីណា ភេទស្រី អាយុ៣១ឆ្នាំ រស់នៅនៅភូមិទី៤ សង្កាត់ចុងឃ្នៀស ក្រុងសៀមរាប។
ក្នុងឱកាសនោះ លោកស្រី ហួន ខេង សមាជិកគណៈកម្មាធិការអនុសាខាក្រុងក៏បានពាំនាំនូវការផ្តាំផ្ញើសួរសុខទុក្ខនិងចូលរួមសោកស្តាយពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និង ឯកឧត្តម ប្រាក់ សោភ័ណ ប្រធានគណៈកម្មាធិការសាខាកាកបាទក្រហម ខេត្តសៀមរាប និង លោក នួន ពុទ្ធារ៉ា ប្រធានគណៈកម្មាធិការសាខាកាកបាទក្រហមកម្ពុជាក្រុងសៀមរាប ដែលតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ដូចដែលលើកឡើងថា “កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា មិនទុកនរណាម្នាក់ចោលឡើយ។
ជាមួយគ្នានោះដែរ ក្រុមការងារទាំងអស់ ក៏បានលើកទឹកចិត្តដល់ក្រុមគ្រួសាររងគ្រោះ សូមមេត្តាកាត់ចិត្ត ទប់អារម្មណ៍ ព្រោះហេតុការណ៍ទាំងអស់នេះ វាក៏បានកន្លងផុតអស់ ហើយ តែអ្វីដែលយើងត្រូវគិតគូរដោះស្រាយជាបន្តនោះ គឺការងាររកចំណូល សម្រាប់ទ្រទ្រង់ដល់ជីវភាពគ្រួសារឡើងវិញឱ្យមានភាពល្អប្រសើរឡើ។ អំណោយមនុស្សធម៌មាន៖ អង្ករ ៣០ គីឡូក្រាម. មី ១កេស. ត្រីខ ១យួរ .ទឹកត្រី ១យួរ. ទឹកស៊ីអ៊ីវ ១យួរ .ទឹកសុទ្ធ១យួរ. កន្ទេល មុង ភួយ សារ៉ុង ក្រមា ចាន ៥ ស្លាបព្រាបាយ ៥ ឆ្នាំង១ ចានស្រាក់ ១ កំសៀវដាំទឹក ១ ថាសដែក ១ ប្រដាប់គ្របម្ហូប ១ ខ្ទះឆា ២វែកឆា ១វែកសម្ល១ វែកបាយ ១ ធុងដាក់ទឹកកាវធំ ១ ចង្អើរអាំងត្រី១ កន្ថោរ ១ និងថវិកា ២០០.០០០រៀល(ពីរសែនរៀល) ក្នុងនោះដែរលោកស្រី ហ៊ី គា បានឧបត្ថម្ភថវិកាបន្ថែម ៥០,០០០រៀល (ប្រាំម៉ឺនរៀល) ព្រមទាំងមានថវិកាពីក្រុមការងារបានចូលរួមបន្ថែមទៀតផងដែរ៕
