សភាពាណិជ្ជកម្មខេត្តសៀមរាប-ឧត្តរមានជ័យ និងសាខាពន្ធដាខេត្តសៀមរាប ចូលរួមយុទ្ធនាការដាំដើមឈើបន្ថែមដើម្បីអភិរក្សរមណីយដ្ឋានអង្គរ

ខេត្តសៀមរាប ÷ កាលពីរសៀលថ្ងៃទី២៨ ខែមីនា ឆ្នាំ២០២៣ ថ្នាក់ដឹកនាំសភាពាណិជ្ជកម្មខេត្តសៀមរាប-ឧត្តរមានជ័យ ដែលមានលោកឧកញ៉ា បណ្ឌិត ហ៊ុយ ភៀវ ប្រធានសភាពាណិជ្ជកម្មសៀមរាប-ឧត្តមានជ័យ និង សាខាពន្ធដាខេត្តសៀមរាប ដឹកនាំដោយលោក ចៅ ម៉ៅមុន្នី ប្រធានសាខាពន្ធដារខេត្ត បានចូលរួមសហការណ៍ជាមួយអាជ្ញាធរជាតិអប្សរា ដើម្បីបន្តយុទ្ធនាការដាំដើមឈើចម្រុះ ចំនួនប្រមាណ១.២០០ដើម នៅបរិវេណខាងលិចត្រពាំងសេះ ដើម្បីអភិរក្សរមណីយដ្ឋានអង្គរ ឲ្យមានទេសភាពស្រស់ស្អាត បៃតងគ្រប់រដូវកាល សាកសមជាតំបន់បេតិកភណ្ឌពិភពលោក ។ ក្នុងយុទ្ធនាការដាំដើមឈើនេះដែរក៏មានវត្តមានអញ្ជើញចូលរួមរបស់ឯកឧត្តម ឡុង កុសល អគ្គនាយករង រួមទាំងមន្ត្រី-បុគ្គលិកជាច្រើននាក់ទៀតចូលរួមផងដែរ

ឯកឧត្តម ឡុង កុសល បានមានប្រសាសន៍ថា ដើម ឈើមិនត្រឹមតែមានសារៈសំខាន់ខ្លាំងដល់រមណីយដ្ឋានអង្គរទាំងមូលប៉ុណ្ណោះទេ តែក៏ផ្តល់ជាប្រយោជន៍ទៅដល់មនុស្ស សត្វនិងបរិស្ថានជុំវិញផង ។ ក្រោយពេលដាំរួច ដើមឈើទាំងនោះ ត្រូវបានថែទាំនិងស្រោចទឹកជាប្រចាំ ដោយក្រុមការងារអាជ្ញាធរជាតិអប្សរា ដើម្បីទុកជាកេរ្តិ៍ដំណែលដល់កូនចៅជំនាន់ក្រោយ ។ ឯកឧត្តមអគ្គនាយករង ក៏បានថ្លែងអំណរគុណ ដល់ថ្នាក់ដឹកនាំសភាពាណិជ្ជកម្មខេត្តសៀមរាប-ឧត្តរមានជ័យ និងសាខាពន្ធដាខេត្តសៀមរាប និងស្ថាប័នពាក់ពាក់ព័ន្ធជាច្រើន រួមទាំងវិស័យឯកជនផង ដែលបានចូលរួមចំណែកក្នុងការងារដាំដុះដើមឈើឡើងវិញ នៅក្នុងតំបន់រមណីយដ្ឋានអង្គរ ។

ក្នុងនោះដែរ លោកឧកញ៉ាបណ្ឌិត ហ៊ុយ ភៀវ ប្រធានសភាពាណិជ្ជកម្មសៀមរាប-ឧត្តមានជ័យ និងលោក ចៅ ម៉ៅមុន្នី ប្រធានសាខាពន្ធដារខេត្តសៀមរាប ក៏បានមានប្រសាសន៍ថ្លែងអំណរគុណអាជ្ញាធរជាតិអប្សរា ចំពោះការផ្តល់ឱកាសដល់ស្ថាប័នលោកឱ្យបានចូលរួមក្នុងសកម្មភាពដាំដើមឈើឡើងវិញ នៅក្នុងតំបន់រមណីយដ្ឋានអង្គរ ព្រោះថាដើមឈើដែលបានដាំនៅពេលនេះ ដើម្បីទុកជាប្រយោជន៍សម្រាប់មនុស្សជាតិ និងជាកេរ្តិ៍មរតកសម្រាប់កូនចៅជំនាន់ក្រោយ ។

លោកឧកញ៉ាបណ្ឌិត ហ៊ុយ ភៀវ ក៏បានបង្ហាញក្តីសប្បាយរីករាយ ក្នុងឱកាសចូលរួមយុទ្ធនាការដាំដើមឈើឡើងវិញ នៅខាងមុខប្រាសាទអង្គរ ដើម្បីលើកកម្ពស់ទេសភាពបៃតង និងចូលរួមចំណែកថែរក្សាបរិស្ថាន នៅតំបន់រមណីយដ្ឋានអង្គរ ហើយជាពិសេសពេលដើមឈើទាំងនេះ ពេលវាធំនៅថ្ងៃអនាគត និងធ្វើឱ្យតំបន់បេតិកភណ្ឌរបស់យើង កាន់តែមានភាពស្រស់បំព្រង និងកាន់តែមានតំម្លៃ។ ដូចនេះហើយក្នុងនាមសភាពាណិជ្ជកម្មសៀមរាប-ឧត្តមានជ័យ ឧកញ៉ាបណ្ឌិត ពេញចិត្តក្នុងការចូលរួមជាមួយអាជ្ញាធរជាតិអប្សរា ដើម្បីអភិរក្សរមណីយដ្ឋានអង្គរ បេតិកភណ្ឌពិភពលោក ឱ្យកាន់តែមានតម្លៃ និងនៅបានយូរអង្វែតទៅទៀត។

សូមជម្រាបផងដែរថា ក្រោយពេលប្រជាជនមួយចំនួន បានស្ម័គ្រចិត្តផ្លាស់ប្តូរទីលំនៅចេញពីតំបន់អង្គរ ទៅកាន់ទីកន្លែងថ្មី ដែលរាជរដ្ឋាភិបាលបានគាំទ្រនិងផ្តល់ជូន អាជ្ញាធរជាតិអប្សរាបានចាប់ផ្តើមយុទ្ធនាការដាំដើមឈើ និងស្មៅ នៅលើទីតាំងដីទំនេរ និងបានកៀរគរស្ថាប័នពាក់ព័ន្ធ និងវិស័យឯកជន ដើម្បីចូលរួមចំណែកក្នុងយុទ្ធនាការនេះផងដែរ ៕

ដោយ ÷ ពន្លឺ