ខេត្តសៀមរាប ÷ ថ្លែងបិទវគ្គបណ្តុះបណ្តាលមិត្តអប់រំមិត្តតាមរយៈ “យុវជនជាភ្នាក់ងារនៃការផ្លាស់ប្តូរឥរិយាបថ(YABC)”នៅសណ្ឋាគារ សោមាទេវី អង្គរ ខេត្តសៀមរាប នារសៀលថ្ងៃទី២៤ ខែកុម្ភៈ ឆ្នាំ ២០២៣ ឯកឧត្ដម យូ ឡាណា អគ្គលេខាធិការរងទី២ កាកបាទក្រហមកម្ពុជា មានប្រសាសន៍ថា៖ វគ្គYABC នឹងបន្តក្លាយជាវេទិកាមួយដើម្បីបំផុស និងជំរុញការផ្តល់សិទ្ធិពេញលេញដល់យុវជនក្នុងសមាគមជាតិកាកបាទក្រហម និងអឌ្ឍចន្ទក្រហម ហេតុនេះសូមលើកទឹកចិត្តសហព័ន្ធអន្តជាតិ និងសមាគមជាតិឱ្យបន្តរៀបចំវគ្គបណ្តុះបណ្តាលនេះទៅថ្ងៃអនាគត ក្នុងគោល បំណងលើកកម្ពស់វប្បធម៌អហិង្សា និងសន្តិភាព នៅកម្រិតប្រទេសរបស់ខ្លួន និងតំបន់។ ទន្ទឹមនឹងនេះក៏ស្នើសុំឱ្យសហព័ន្ធអន្តរជាតិបង្កើតថ្នាលប្រព័ន្ធផ្សព្វ ផ្សាយសង្គម ដែលសមាគមជាតិទាំងអស់អាចចែក រំលែកបទពិសោធន៍អំពី YABC និងបង្កើតបណ្ដាញធនធានមនុស្ស YABC ដែលសមាគមជាតិនានា អាចប្រើប្រាស់ធនធាននេះ សម្រាប់ការបណ្តុះបណ្តាល YABC ក្នុងភូមិភាគ ឬតំបន់។ ឯកឧត្តម យូ ឡាណា មានប្រសាសន៍បន្តថា៖ក្នុងបរិបទរបស់កាកបាទក្រហមកម្ពុជា យុវជនគឺជាភ្នាក់ងារនៃការផ្លាស់ប្តូរជាវិជ្ជមាននៅក្នុងសហគមន៍ ដូច្នេះពួកគេអាចចូលរួមបានទូលំទូលាយ និងធ្វើសកម្មភាពកាន់តែមានប្រសិទ្ធភាពក្នុងការផ្តល់ជំនួយមនុស្សធម៌ដល់ជនរងគ្រោះ និងជនងាយរងគ្រោះបំផុតបានទាន់ពេលវេលា និងទូទាំងប្រទេស។ លើសពីនេះ កាកបាទក្រហមកម្ពុជា បាននិងកំពុងដាក់បញ្ចូល កម្មវិធីបណ្តុះបណ្តាលយុវជនជាភ្នាក់ងារ នៃការផ្លាស់ប្ដូរឥរិយាបថជាវិជ្ជមាន ទៅក្នុងកម្មវិធីយុវជន ការចូលរួមកាត់បន្ថយការប្រែប្រួលអាកាសធាតុ សុវត្ថិភាពចរាចរណ៍ ការការពារកុមារតាមអ៊ីនធឺណិត និងផ្នែកផ្សេងៗទៀត ហើយយើងជំរុញបន្ថែមទៀតកម្មវិធីនេះក្នុងបច្ចុប្បន្ន នឹងទៅខាងមុខ។
ឯកឧត្តម បានបញ្ជាក់ថា៖កាកបាទក្រហមកម្ពុជាដែលមាន សម្តេចព្រះមហាក្សត្រី នរោត្តម មុនីនាថ សីហនុជាព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាប្រធាន ព្រមទាំងមានរចនាសម្ព័ន្ធកាកបាទក្រហមកម្ពុជា៖ មានទីស្នាក់ការកណ្តាល នៅរាជធានីភ្នំពេញ និងមានសាខាទូទាំង ២៥ រាជធានី ខេត្ត, អនុសាខា(នៅថ្នាក់ស្រុក) និងក្រុមកាកបាទក្រហម(នៅថ្នាក់ឃុំ)។ មានអ្នកស្ម័គ្រចិត្តជាង ២០,០០០ នាក់ នៅតាមសហគមន៍ និងយុវជន ក្រីក្រជាង ២០,០០០ នាក់ នៅតាមអនុវិទ្យាល័យ វិទ្យាល័យ ក៏ដូចជានៅថ្នាក់សាកលវិទ្យាល័យ។កាកបាទក្រហមកម្ពុជា តែងតែយកចិត្តទុកដាក់ ជាពិសេសលើកទឹកចិត្តយុវជនឱ្យចូលរួមជាអ្នកស្ម័គ្រចិត្ត ដើម្បីធានានិរន្តរភាពនៃកម្លាំងមនុស្សធម៌វ័យក្មេង ដែលជាអ្នកបន្តវេនចូលរួមសកម្មភាពជួយសហគមន៍របស់ពួកគាត់។ ការពង្រីកអ្នកស្ម័គ្រចិត្ត និងយុវជន ក្រីក្រចាំបាច់ត្រូវមានផែនការរយៈពេលវែង និងធនធានគ្រប់គ្រាន់ រួមទាំងធនធានមនុស្ស និងហិរញ្ញវត្ថុ។ សម្ដេចកិត្តិព្រឹទ្ធបណ្ឌិតប្រធាន ជានិច្ចជាកាលតែងតែលើកទឹកចិត្តយុវជនទាំងអស់ឱ្យយកចិត្តទុកដាក់លើសកម្មភាព មិត្តអប់រំមិត្ត មិត្តជួយមិត្ត ទាំងនៅក្លឹបយុវជននៃគ្រឹះស្ថានសិក្សា ក៏ដូចសហគមន៍ ដោយ ជួយដល់សិស្ស និស្សិត ដែលជួបការលំបាកក្នុងការសិក្សា និងជីវភាពរស់នៅប្រចាំថ្ងៃ ដោយមិនមានការរើសអើង ដូចក្នុងពាក្យស្លោក៖ “កាកបាទក្រហមកម្ពុជា មានគ្រប់ទីកន្លែងសម្រាប់គ្រប់ៗគ្នា ដោយមិនទុកនរណាម្នាក់ចោល”។ សូមជំរាបថា៖ការបណ្តុះបណ្តាលមិត្តអប់រំមិត្ត តាមរយៈយុវជនជាភ្នាក់ងារនៃការផ្លាស់ប្តូរឥរិយាបថ រៀបចំដោយសហព័ន្ធអន្តរជាតិនៃសមាគមកាកបាទក្រហមនិងអឌ្ឍចន្ទក្រហម សហការជាមួយកាកបាទក្រហមកម្ពុជា មានរយៈពេល៦ថ្ងៃចាប់ពីថ្ងៃទី១៩ដល់ទី២៤ ខែកុម្ភៈ ឆ្នាំ ២០២៣ នៅសណ្ឋាគារសោមាទេវីខេត្តសៀមរាប ដោយមានអ្នកសម្របសម្រួលការងារស្ម័គ្រចិត្តរបស់ IFRC ប្រចាំតំបន់អាស៊ី-ប៉ាស៊ីហ្វិក នៃអង្គភាពសេវាកម្មសមាជិកភាព នៅទីក្រុងគូឡាឡាំពួ ប្រទេស ម៉ាឡេស៊ី មន្ត្រីជាន់ខ្ពស់របស់សហព័ន្ធអន្តរជាតិ ទទួលបន្ទុកការងារយុវជន និងអ្នកស្ម័គ្រចិត្ត ប្រចាំកម្រងប្រទេសថៃ កម្ពុជា ឡាវ និងវៀតណាម និងមានវត្តមានអញ្ជើញចូលរួមពី លោក លោកស្រី មន្ត្រី-បុគ្គលិក អ្នកស្ម័គ្រចិត្ត និងយុវជន មកពីសាខាកាកបាទក្រហមកម្ពុជា អ្នកស្ម័គ្រចិត្ត ពីកាកបាទក្រហមថៃ សិង្ហបុរី ឡាវ ជប៉ុន និងអ៊ីតាលី អ្នកសម្របសម្រួល និងគ្រូបណ្តុះបណ្តាលមិត្តអប់រំមិត្ត និងមានសិក្ខាកាមមកពីសហព័ន្ធអន្តរជាតិ កាកបាទក្រហមកម្ពុជា កាកបាទក្រហមអ៊ីតាលី កាកបាទក្រហមជប៉ុន កាកបាទក្រហមសិង្ហបុរី សមាគមជាតិកាកបាទក្រហមឡាវ និងសមាគមជាតិកាកបាទក្រហមថៃ សម្រាប់ការចូលរួម ។ វគ្គបណ្តុះបណ្តាលនេះធ្វើឡើងក្នុងគោលបំណង ឆ្លុះបញ្ចាំងពីឆន្ទៈ និងការចែករំលែកចំណេះដឹង “ផ្លាស់ប្តូរខ្លួនអ្នក នឹងបំផុសគំនិតអ្នកដទៃឱ្យមានការផ្លាស់ប្តូរផ្នត់គំនិត បែបជាវិជ្ជមាន” ហើយបន្តដំណើរឆ្ពោះទៅមុខជាមួយគ្នា ” ស្វែងយល់ស៊ីជម្រៅបន្ថែមអំពីគំនិតផ្តួចផ្តើម និងសារៈសំខាន់ យុវជនជាភ្នាក់ងារ នៃការផ្លាស់ប្ដូរឥរិយាបថជាវិជ្ជមាន និងការចូលរួមរបស់យុវជនដើម្បីលើកកម្ពស់វប្បធម៌អហិង្សា និងសន្តិភាព” ៕
ដោយ ÷ ពន្លឺ
