ខេត្តបន្ទាយមានជ័យ ៖ អាជ្ញាធរខេត្តបន្ទាយមានជ័យបានរកឃើញស្ថានីយបុរាណជាង ២០០ កន្លែងទៀតដែលបន្សល់ទុកពីដូនតាខ្មែរជំនាន់មុន។ លោក យង់ តាំងកូយ ប្រធានមន្ទីរវប្បធម៌ និងវិចិត្រសិល្បៈខេត្តបន្ទាយមានជ័យបានឲ្យកម្ពុជាថ្មីដឹងថា ស្ថានីយបុរាណទើបរកឃើញថ្មីមានដូចជា ទួលប្រាសាទ ទួលបុរាណ ទួលកប់សព ស្រះបុរាណ ផ្លូវបុរាណជាដើម។
ការរកឃើញស្ថានីយបុរាណថ្មីបន្ថែមទៀតនេះ ខណៈកន្លងទៅមានពលរដ្ឋមួយចំនួននាំគ្នាជីកគាស់ កកាយទីទួល ឬផ្នូរបុរាណ ដេីម្បីយកដីអាស្រ័យផល និងជាប្រយោជន៍ផ្ទាល់ខ្លួន។
បើតាមលោក យង់ តាំងកូយ ក្នុងខេត្តបន្ទាយមានជ័យមានកេរតំណែលបុព្វបុរសខ្មែរជំនាន់មុនបន្សល់ទុកយ៉ាងច្រើន។ យ៉ាងណាកន្លងទៅ ក៏មានការជីកគាស់កកាយផ្នូរនិងទួលបុរាណពីពលរដ្ឋតាមមូលដ្ឋានមួយចំនួន ដែលធ្វើឲ្យខូចខាតប៉ះពាល់ដល់សម្បត្តិវប្បធម៌របស់ជាតិ។
លោកបន្តថា អាជ្ញាធរនិងមន្ទីរពាក់ព័ន្ធ ចុះទៅបង្រ្កាបបានជាបន្តបន្ទាប់ និងបានខិតខំផ្សព្វផ្សាយដល់ប្រជាពលរដ្ឋនៅតាមមូលដ្ឋានចូលរួមការពារនិងថែរក្សាកេរ្តិ៍តំណែលវប្បធម៌ជាតិកុំឲ្យបាត់បង់។
គិតមកដល់ពេលនេះ មន្ទីរវប្បធម៌ខេត្តបន្ទាយមានជ័យបានស្រាវជ្រាវរកឃើញ ស្ថានីយបុរាណចំនួន ៩១១ កន្លែងនៅទូទាំងខេត្ត។ ក្រៅពីស្ថានីយបុរាណ ខេត្តបន្ទាយមានជ័យនៅសេសសល់សំណង់បុរាណជាប្រាសាទដែលនៅមានរូបរាងចំនួន ៣២ កន្លែង។ ប្រាសាទដែលនៅសេសសល់ទាំង ៣២ កន្លែងមាននៅតាមបណ្តាញស្រុកមួយចំនួនដូចជា៖
១/ ក្រុងសិរីសោភ័ណ្ឌមាន ០១ កន្លែង
-ប្រាសាទភ្នំកងវ៉ា
២/ ស្រុកថ្មពួកមាន ២០ កន្លែង៖
-ប្រាសាទបន្ទាយឆ្មារ
-ប្រាសាទតាស៊ឹម
-ប្រាសាទយាជូន
-ប្រាសាទយាយតុំ
-ប្រាសាទចិញ្ចឹមត្រី
-ប្រាសាទតាណែម
-ប្រាសាទសំណាងតាសុខ
-ប្រាសាទតាប្លាំង
-ប្រាសាទតាព្រហ្ម
-ប្រាសាទមេបុណ្យ (កើត)
-ប្រាសាទបន្ទាយទ័ព
-ប្រាសាទតុប
-ប្រាសាទប្រុស
-ប្រាសាទត្រពាំងមម៉ាំង
-ប្រាសាទល្បើកល្វា
-ប្រាសាទក្រហម
-ប្រាសាទពន្លាក់
-ប្រាសាទកូនដំរី
-ប្រាសាទដំបូក
-ប្រាសាទមេបុណ្យ (ជើង)
៣/ ស្រុកស្វាយចេក មាន ០៦ កន្លែង
-ប្រាសាទភាស
-ប្រាសាទបន្ទាយព្រាវ
-ប្រាសាទគុក
-ប្រាសាទល្បើកស្វាយ
-ប្រាសាទល្បើកអំពិល
-ប្រាសាទសំរោង
៤/ ស្រុកព្រះនេត្រព្រះ មាន ០៣ កន្លែង៖
-ប្រាសាទប្រាំ
-ប្រាសាទចាអើ
-ប្រាសាទចេតិយ៍
៥/ ស្រុកភ្នំស្រុក មាន ០២ កន្លែង
-ប្រាសាទភ្នំកូនខ្លែង
-ប្រាសាទសំរោង
អត្ថបទ៖ ប៊ុណ្ណារ៉ា
