យុវជនគណបក្សប្រជាជនកម្ពុជាខេត្តសៀមរាប បារម្ពអំពីការបាត់បង់ខ្លែងឯក និងរំពឹងថា ខ្លែងឯកខ្មែរ នឹងបានចុះក្នុងបញ្ជីសម្បត្តិបេតិកភណ្ឌពិភពលោកនាពេលខាងមុខ

ខេត្តសៀមរាប÷ ក្រុមយុវជនគណបក្សកម្ពុជា ខេត្តសៀមរាប បានលើកឡើងថា ពួកគេមានការព្រួយបារម្ភអំពីការបាត់បង់ ខ្លែងឯក ដែលជាមរតកសិល្បៈដ៏ចំណាស់របស់ខ្មែរ ខណៈដែលចំនួនអ្នកដែលចេះចាំជំនាញធ្វើខ្លែងនេះ កាន់តែតិចទៅ។

ចំណែកលោក ហូ សម័យ ប្រធានក្រុមការងារយុវជនខេត្ត ចុះមូលដ្ឋានស្រុកសូទ្រនិគម បានលើកឡើងថា ក្នុងនាមជាយុវជនម្នាក់លោកពិតជាមានការបារម្ភអំពីការបាត់បង់ ខ្លែងឯក ដែលជាមរតកសិល្បៈដ៏ផូរផង់របស់ខ្មែរយើង។ ដូច្នេះទើបលោក រួមជាមួយក្រុមការងារយុវជនមកពីបណ្តាស្រុកផ្សេងៗនាំគ្នាមករៀនសូត្រអំពីរបៀបធ្វើខ្លែង របៀបធ្វើឯក ពីសំណាក់ព្រឹទ្ធាចារ្យដែលលោកនៅចេះចាំ។ លោកសម័យបន្តថា “ថ្ងៃនេះយើងបាននាំយុវជនជាង៣០នាក់មករៀនជាមួយលោក តាស៊ន់ ដែលរស់នៅភូមិព្រំកុដ្ឋ សង្កាត់បល័ង្គ ក្រុងរុនតាឯកតេជោសែន។ រៀនដើម្បីថែរក្សាប្រពៃណីវប្បធម៌យើង រៀនពីរបៀបធ្វើខ្លែងឯក។ ព្រោះយើងព្រួយបារម្ភខ្លាចបាត់បង់ដោយសារចាស់ៗពីមុនដែលគាត់ចេះហ្នឹងស្ទើរបាត់អស់ទៅហើយ ហើយយុវជនយើងសម័យនេះអត់មានអ្នកគិតគូរឬក៏ខ្វាយខ្វល់អំពីការធ្វើខ្លែងឯកទៀតទេ។ ថ្ងៃនេះយុវជនយើងមកពីបណ្តាស្រុកក្រុងផ្សេងៗគ្នាហ្នឹងបានរៀនពីរបៀបធ្វើឯកឲ្យឮ របៀបបិតឫស្សី ជាពិសេសរបៀបធ្វើកន្ទុយដែលយកស្លឹកត្នោតមកត្បាញតភ្ជាប់ជាប់គ្នា”។

រីឯលោក លឺ ភារុណ ប្រធានក្រុមការងារយុវជនចុះមូលដ្ឋានក្រុងរុនតាឯកតេជោសែន បានលើកឡើងថា ជាការពិតសម្រាប់លោកផ្ទាល់ក៏ពីមុនមកលោកធ្លាប់ឃើញតែខ្លែងសេរី ហើយទើបតែធ្លាប់ឃើញខ្លែងឯកជាលើកទី១នៅពេលដែលមករៀននេះប៉ុណ្ណោះ។

លោក ភារុណ លើកឡើងថា ដូច្នេះហើយដើម្បីឲ្យយុវជនជំនាន់ក្រោយបានស្គាល់ និងបានថែរក្សាមរតកវប្បធម៌នេះ ទើបលោក សហការជាមួយលោកស្រីចៅសង្កាត់បល្ល័ង្គ ស្នើសុំឲ្យលោកតាស៊ន់ ជួយបង្ហាត់បង្រៀនអំពីរបៀបធ្វើខ្លែងឯកនេះ។

ចំណែកលោក ខៀវ ប្រសើរ ប្រធានផែន ផែនការនិងរបាយការណ៍ និងជាតំណាងឲ្យក្រុមការងារយុវជនគណបក្សប្រជាជនកម្ពុជាខេត្តសៀមរាប បានធ្វើការអំពាវនាវដល់យុវជនទាំងអស់ចូលរួមជួយថែរក្សាវប្បធម៌ប្រពៃណីដែលដូនតាយើងបានបន្សល់ទុកឲ្យ ដោយនាំគ្នាស្វែងយល់ សិក្សា និងគាស់រំលឹកមកវិញនូវអ្វីដែលស្ទើរនឹងបាត់បង់ ដូចជាខ្លែងឯកនេះជាដើម។ លោកខៀវ ប្រសើរ បានលើកឡើងថា ពាក់ព័ន្ធនឹងខ្លែងនេះ ក្រសួងវប្បធម៌និងវិចិត្រសិល្បៈ បានកសាងសារមន្ទីរខ្លែងខ្មែរតាំងពីឆ្នាំ២០០៣ ប៉ុន្តែសួរថាតើយុវជនយើងប៉ុន្មានអ្នកដែលដឹង? ដូចនេះសូមយុវជនយើងទៅសិក្សាស្វែងយល់បន្ថែមពីខ្លែងឯកនៅទីនោះផ្ទាល់។ ហើយក៏មានសមាគមអភិរក្ស និងអភិវឌ្ឍខ្លែងខ្មែរ ដើម្បីប្រមូលអ្នកស្រលាញ់វិស័យខ្លែងខ្មរ ឲ្យមកជួយថែរក្សាលើកស្ទួយវប្បធម៌ប្រពៃណីមួយនេះ និងដើម្បីចែករំលែកចំណេះដឹងផងដែរ។

ទន្ទឹមនឹងការព្រួយបារម្ភអំពីការបាត់បង់នេះ ក្រុមយុវជនខេត្តសៀមរាប បានបង្ហាញនូវការរំពឹងខ្ពស់ថា តាមរយៈការយកចិត្តទុកដាក់ពីសំណាក់រាជរដ្ឋាភិបាលកម្ពុជា ដែលដឹកនាំដោយ   សម្តេចធិបតី ហ៊ុន ម៉ាណែត និងមានក្រសួងវប្បធម៌ និងវិចិត្រសិល្បៈជាសេនាធិការ នឹងនាំយកនូវខ្លែងឯក ដែលជាសម្បត្តិវប្បធម៌របស់ខ្មែរនេះ ចុះក្នុងបញ្ជីបេតិកភណ្ឌពិភពលោកនាពេលខាងមុខនេះ ។

សូមជម្រាបថា ដើម្បីថែរក្សា និងផ្សព្វផ្សាយអំពីខ្លែងឯកខ្មែរនេះ រដ្ឋបាលខេត្តសៀមរាប នឹងប្រារព្ធព្រឹត្តិការណ៍បង្ហោះខ្លែងដ៏ធំមួយរយៈពេលបីថ្ងៃចាប់ពីថ្ងៃទី២៧ដល់ទី២៩ ខែធ្នូ ឆ្នាំ២០២៤ នៅព្រលានយន្តហោះសៀមរាបចាស់ នាក្រុងសៀមរាប។ ព្រឹត្តិការណ៍នេះ ត្រូវបានអ្នករៀបចំរំពឹងថា នឹងមានខ្លែងឯកមកពីទីនានាចូលរួមប្រមាណ១០០ខ្លែង រួមជាមួយនឹងខ្លែងសេរីមួយចំនួនផងដែរ៕

ដោយ÷ ពន្លឺ