ខេត្តសៀមរាប ៖ នៅរសៀលថ្ងៃដដែលចេញពីខេត្តឧត្តមានជ័យ ឯកឧត្តមរដ្ឋមន្ត្រី និងសហការីបានបន្តដំណើរឆ្ពោះទៅកាន់ខេត្តសៀមរាប ដើម្បីចុះពិនិត្យស្ថានីយ៍ស្រាវជ្រាវ និងស្តារព្រៃឈើឃុនរាម នៅភូមិត្រពាំងថ្ម ឃុំឃុនរាម ស្រុកបន្ទាយស្រី ខេត្តសៀមរាប។
ស្ថានីយ៍ត្រូវបានបង្កើតឡើងក្នុងឆ្នាំ២០១២ក្រោមជំនួយឧបត្ថម្ភថវិកាពីសាធារណរដ្ឋកូរ៉េក្នុងចំនួនទឹកប្រាក់៣,៥លានដុល្លារ។ស្ថានីយ៍មានគោលដៅស្រាវជ្រាវផ្សព្វផ្សាយនិងបណ្តុះកូនឈើទុកចែកជូនប្រជាពលរដ្ឋដាំដើម្បីបង្កើតគម្របព្រៃឈើនៅតំបន់បន្ទាយស្រី និងនៅទូទាំងខេត្តសៀមរាប។ ជាមធ្យមក្នុង ១ឆ្នាំស្ថានីយបណ្តុះឈើបាន ១០ម៉ឺនកូន និងបានរៀបចំសួនដាំឈើអនុស្សាវរីយ៍ទុកជូនសាធារណជនដាំ និងបង្កើតចំការពូជ បង្កើតឡូតិ៍ពិសោធន៍ជម្រើសដើមកូន។
ក្រៅពីនេះ ស្ថានីយ៍ក៍ដើរតួនាទីជាកន្លែងស្រាវជ្រាវសេនេទិកព្រៃឈើ បណ្តុះបណ្តាល និងផ្សព្វផ្សាយបច្ចេកទេសដល់និស្សិត និងប្រជាពលរដ្ឋផងដែរទាក់ទងនឹងបច្ចេកទេសដាំឈើ មើលថែទាំ និងការពារ ការប្រើប្រាស់ដីប្រកបដោយប្រសិទ្ធភាពនិងបណ្តុះបណ្តាលបច្ចេកទេសកសិកម្មចម្រុះ។
បន្ទាប់ពីបានដើរពិនិត្យពីស្ថានភាពរួមរបស់ស្ថានីយរួចមក ឯកឧត្តមរដ្ឋមន្ត្រីបានវាយតម្លៃខ្ពស់ចំពោះជំនួយឧបត្ថម្ភរបស់រដ្ឋាភិបាលកូរ៉េ និងមន្រ្តីរដ្ឋបាលព្រៃឈើទាំងអស់ដែលបានខិតខំអភិវឌ្ឍស្ថានីយទទួលបានសមិទ្ធផលយ៉ាងធំធេងគួរជាទីមោទន។
នាឱកាសនេះលោកបានណែនាំឲ្យរដ្ឋបាលព្រៃឈើ និងមន្ទីរកសិកម្ម រុក្ខាប្រមាញ់ និងនេសាទខេត្ត ត្រូវសហការជាមួយអាជ្ញាធរខេត្ត ដើម្បីរៀបចំផែនការដាំដុះកូនឈើលើដីរបស់រដ្ឋទីសាធារណ: ក្នុងវត្តអារាម មន្ទីរពេទ្យ តាមដងវិថីក្នុងក្រុង ស្រុក និងសាលារៀន ដើម្បីបង្កើតគម្របព្រៃឈើបៃតងឡើងវិញ និងជាពិសេសជួយកាត់បន្ថយការឡើងកំដៅ។
ដោយកម្ពុជានិងក្លាយជាសមាជិកនៃអង្គការបណ្តាញអន្តរជាតិឫស្សី និងផ្តៅនាពេលអនាគតយ៉ាងខ្លីនេះ ហេតុនេះលោកបានណែនាំឲ្យរដ្ឋបាលព្រៃឈើ សហការជាមួយមន្ទីរកសិកម្ម រុក្ខាប្រមាញ់ និងនេសាទគ្រប់រាជធានី ខេត្ត ត្រូវគិតគូដាំ មើលថែរទាំ និងការពារឫស្សី និងផ្តៅឲ្យបានត្រឹមត្រូវតាមលក្ខណ: បច្ចេកទេសដើម្បីបង្កើនផលិតកម្មវត្ថុធាតុដើមទាំងនេះ រក្សាបាននិរន្តរភាពនៃការផ្គត់ផ្គង់បម្រើឲ្យវិស័យកែច្នៃឫស្សី និងផ្តៅឲ្យបានគ្រប់គ្រាន់ទាំងបរិមាណ និងគុណភាព។
មួយវិញទៀតទាំងរដ្ឋបាលព្រៃឈើនិងមន្ទីរគួរជំរុញបន្ថែមទៀតលើការផ្សព្វផ្សាយបច្ចេកទេសកសិកម្មចម្រុះដល់ប្រជាសហគមន៍ដើម្បីឲ្យពួកគាត់ មានមុខរបរច្បាស់លាស់ មានចំណូលថិតថេរដែលទទួលបានពីផលដំណាំ បន្លែ និងការចិញ្ចឹមសត្វ ចិញ្ចឹមត្រី ហើយពិតណាស់ចំណូលនេះអាចនឹងជួយពួកគាត់ឈប់ចូលព្រៃដើម្បីកាប់ឈើ រកផល និងអនុផលព្រៃឈើដែលប្រឈមហានីភ័យខ្ពស់ និងធ្វើឲ្យប៉ះពាល់ដល់ធនធានធម្មជាតិផងដែរ។
ចំពោះករណីនេះ មន្ទីរត្រូវចុះតាមដានសកម្មភាពរបស់ពួកគាត់ជាប្រចាំប្រការក្រែការអនុវត្តបច្ចេកទេសមិនបានត្រឹមត្រូវ ដែលនាំឲ្យគាត់បោះបង់ រួចធ្វើចំណាកស្រុក ហើយក៏ត្រូវទាមទារឲ្យរៀនសូត្របន្ថែមផងដែរ ធ្វើយ៉ាងនេះទើបធ្វើឲ្យការអភិវឌ្ឍន៏អាជីពរបស់ពួកគាត់អាចរក្សាបាននូវចីរភាព និងនិរន្តរភាពពិតប្រាកដ៕
ដោយ ៖ កូឡាប
