ខេត្តព្រះសីហនុ ៖ អភិបាលខេត្តព្រះសីហនុ ឯកឧត្តម យន្ត មីន បានអំពាវនាវជាថ្មីទៀត ដល់ម្ចាស់ក្រុមហ៊ុនសំណង់ អាជីវករ និងប្រជាពលរដ្ឋ រស់ក្នុងក្រុងព្រះសីហនុទាំងអស់ ឲ្យបន្តចូលរួមវេចខ្ចប់កាកសំណល់សំរាម នៅតាមទីតាំងរៀងៗខ្លួន ឲ្យបានត្រឹមត្រូវ។
ឯកឧត្តមបានស្នើដល់ អាជីវករ និងប្រជាពលរដ្ឋរស់នៅក្នុងទីប្រជុំជនទាំងអស់ ត្រូវ រៀបចំទុកដាក់អោយមានរបៀបរៀបរយ និងបញ្ចេញសំរាម ឬកាកសំណល់ផ្សេងៗ ត្រូវនាំយកមកគរទុកនៅលើចិញ្ចើមផ្លូវ នៅពេលយប់ ដើម្បីឲ្យក្រុមហ៊ុន KSWM មកប្រមូលសំរាមយកទៅចោលឲ្យបានទៀងទាត់។ ត្រង់ចំណុចនេះ ឯកឧត្តម អភិបាលខេត្ត ស្នើដល់ប្រជាពលរដ្ឋ និងអាជីវករ នៅតាមទីតាំងនីមួយៗ មិនត្រូវបញ្ចេញកាកសំណល់សំរាម មកគរទុកចោលតាមចិញ្ចើមផ្លូវ នៅពេលថ្ងៃទៀតទេ ព្រោះនាំឲ្យបាត់បង់សោភ័ណភាពក្រុងទេសចរណ៏មាត់សមុទ្រ។
ការអំពាវនាវបែបនេះ ត្រូវបានធ្វើឡើងនៅព្រឹកថ្ងៃទី០២ ខែឧសភា ឆ្នាំ២០១៩នេះ ក្នុងអំឡុងពេលរូបឯកឧត្តម បានដឹកនាំ អភិបាលរង មន្ត្រីរាជការ នៅតាមស្ថាប័នពាក់ព័ន្ធ ក្រោមឱវាទរដ្ឋបាលខេត្តព្រះសីហនុ ចុះពិនិត្យ និងអប់រំណែនាំដល់ម្ចាស់ការដ្ឋាននានា អំពីបញ្ហាឡានដឹកដីធ្លាក់ប្រឡាក់ផ្លូវ ការចោលកាកសំណល់សំរាម ពាសវាលពាសកាល និងបញ្ហាបណ្តាញខ្សែកាប និងខែ្សភ្ជាប់បណ្តាញអ៉ិនធឺណែត ដែលមានភាពរញ៉េរញ៉ៃ នៅតាមបង្គោលភ្លើង ដោយបានណែនាំ ដល់មន្ត្រីជំនាញកាត់ចេញ ទុកតែខ្សែណា ដែលនៅប្រើប្រាស់ ដើម្បីរក្សាសោភ័ណភាពក្រុងព្រះសីហនុ ឲ្យបានប្រសើរឡើង។
បន្ថែមលើនេះ ឯកឧត្តមអភិបាលខេត្តព្រះសីហនុ បានណែនាំទៅម្ចាស់ការដ្ឋាន ឬមេការក្រុមហ៊ុនសំណង់មួយចំនួន ត្រូវសំអាតអនាម័យបរិស្ថាន នៅបរិវេណខាងមុខការដ្ឋាន របស់ខ្លួនឲ្យបានស្អាត។ ជាងនេះចំពោះម្ចាស់រថយន្តដឹកដី ក៏មិនត្រូវផ្ទុកដីលើសបរិមាណ ដែលនាំឲ្យហៀរកំពប់ដីប្រឡាក់ផ្លូវ និងនាំឲ្យខូចផ្លូវកៅស៊ូនោះទេ៕
ដោយ ៖ វិបុល
\
