ឯក​ឧត្តម​រដ្ឋមន្ដ្រី ​វេង ​សាខុន ​ចុះ​ពិនិត្យ​កសិដ្ឋាន​បង្កាត់​គោ​សិប្បនិម្មិត្ដ​ នៅ​ស្រុក​ទ្រាំង ​ខេត្ត​តាកែវ ​រក​ចំណូល​បាន​ខ្ទង​ម៉ឺន​ដុល្លារ​ក្នុង១ឆ្នាំ

ខេត្តតាកែវ៖ នៅរសៀលថ្ងៃទី០២ ខែកុម្ភៈ ឆ្នាំ២០១៩នេះ បន្ទាប់ពី​អញ្ជើញចុះទៅពិនិត្យ ការប្រមូលស្រូវប្រាំង នៅស្រុកអង្គរបូរីរួចមក លោករដ្ឋមន្ត្រី វេង សាខុន រដ្ឋមន្ដ្រីក្រសួងកសិកម្ម រុក្ខាប្រមាញ់​ និងនេសាទ និងសហការី បានបន្ដ​ពិនិត្យការបង្កាត់គោដោយសិប្បនិម្មិត្តប្រភេទពូជ ប្រាម៉ាន់ នៅភូមិកំពង់ជ្រៃ ឃុំស្មោង ស្រុកទ្រាំង។

ថ្លែងប្រាប់រដ្ឋមន្ដ្រីក្រសួងកសិកម្មក្នុងទឹកចិត្តសប្បាយរីករាយ លោក​ សែម សង្វាត បានបញ្ជាក់ថា ក្រោយចូលនិវត្តន៍ពីការងារជាមន្ត្រីរាជការ លោក​ចាប់ផ្តើមចិញ្ចឹមគោ​៣ឆ្នាំមកហើយ។

បច្ចុប្បន្នគ្រួសារលោកមានជីវភាពធូរធារ កូនៗរៀនចប់បរិញ្ញាបត្រ មានការងារធ្វើ មានប្រាក់ចំណូលសមរម្យ ដោយសារចំណូលពីការ​ចិញ្ចឹមគោ​ចំនួន​​២៣ក្បាល។ លោកបន្ថែមថា ​មេគោពេញវ័យមួយក្បាលអាចលក់បានជាង​៣ពាន់ដុល្លារជាមធ្យមក្នុងមួយឆ្នាំ ហើយអាចទទួលបាន​ចំណូល​ពី១ម៉ឺន ទៅ​១៥,០០០ដុល្លារ រួមផ្សំជាមួយផលស្រូវ។

ជាមួយគ្នានេះ លោករដ្ឋមន្ត្រីបានធ្វើការកោតសរសើរ ចំពោះការខិតខំប្រឹងប្រែងរបស់លោកសង្វាត ដែលបានប្រកាន់យករបរចិញ្ចឹមគោ ដែល​ជា​ប្រភពចំណូលយ៉ាងល្អប្រសើរ ក្នុងការកែប្រែជីវភាពគ្រួសារ។ ចំណូលដ៏ខ្ពស់នេះ ធ្វើឲ្យគ្រួសារ​មានជីវភាពល្អប្រសើរ គ្រួសារមានសុភមង្គល នេះ​ជាលទ្ធផលយ៉ាងល្អប្រសើរដែលបានពីការអភិវឌ្ឍនៃវិស័យកសិកម្ម។​

ឯកឧត្តមរដ្ឋមន្ត្រី វេង សាខុន បានណែនាំឲ្យការិយាល័យផលិតកម្មសត្វ និងសុខភាពសត្វ ត្រូវខិតខំបន្ថែមទៀតលើការងារបង្កាត់ពូជគោ និង​ត្រូវ​កែប្រែប្រព័ន្ធផលិតកម្មចិញ្ចឹម ពីចិញ្ចឹមជាលក្ខណៈគ្រួសារ ទៅចិញ្ចឹមជាលក្ខណៈពាក់កណ្តាលឧស្សហកម្មវិញ ប្រយោជន៍ដើម្បីលើកកម្ពស់​គុណភាព ផលិតកម្មធានាបានគុណភាព អនាម័យ និងសុវត្ថិភាព។​

ដោយឡែកអគ្គនាយកដ្ឋានផលិតកម្មសត្វ និងសុខភាពសត្វ ត្រូវរៀបចំកម្មវិធីប្រឡងប្រណាំងកសិករឆ្នើម ដែលមានស្នាដៃចិញ្ចឹមសត្វបានល្អ និងមានគំនិតច្នៃប្រឌិត ដោយផ្តល់ជាប័ណ្ណសរសើរ ឬប្រាក់រង្វាន់លើកទឹកចិត្ត ដើម្បីជំរុញការងារផលិតកម្មសត្វឲ្យរីកចម្រើន ធានាបានការផ្គត់ផ្គង់​ទីផ្សារក្នុងស្រុក និងឈានទៅកាត់បន្ថយការនាំចូល។ បច្ចុប្បន្នទូទាំងខេត្តតាកែវ បានបង្កាត់គោដោយសិប្បនិម្មិត្ត បានជាង​១ពាន់ក្បាល។

ចេញពីកសិដ្ឋានចិញ្ចឹមគោ លោករដ្ឋមន្ត្រីបានបន្តដំណើរមកពិនិត្យកសិដ្ឋានចិញ្ចឹមមាន់យកពងរបស់បងស្រី ទួត ផល្លាយ ដែលរស់នៅភូមិធ្នោះ ឃុំអង្គកែវ ស្រុងទាំ្រង។ សូមបញ្ជាក់ថា កសិដ្ឋានចិញ្ចឹមមាន់ពងចំនួនជាង ១.៥ ម៉ឺនក្បាលដោយក្នុង១ថ្ងៃ គាត់អាចប្រមូលពងមាន់​បានប្រមាណ​៩ពាន់ពង និងចំពោះពងមាន់លេខមួយគាត់ អាចលក់បានជាង៤០០រៀល ហើយក្នុងមួយខែ គាត់អាចរកប្រាក់ចំណូលបានជាង១ពាន់ដុល្លារ ដែលចំណូលនេះបានលើកស្ទួយជីវភាពគ្រួសារគាត់បានយ៉ាងល្អប្រសើរ។

ក្នុងដំណើរទស្សនកិច្ចនេះ លោករដ្ឋមន្ត្រីបានធ្វើការណែនាំ ដល់ការិយាល័យសុខភាពសត្វ និងផលិតកម្មសត្វឱ្យជួយផ្តល់​បច្ចេកទេស​ថ្មីៗជូនគាត់​បន្ថែមទៀត បំណងលើកកម្ពស់ផលិតភាព គុណភាព អនាម័យ និងបរិស្ថាន ដើម្បីធានាបាននូវសុខភាពអ្នកបរិភោគ និងអ្នករស់នៅជិតខាង៕

ដោយ ៖ សិរីបុត្រ