ខេត្តសៀមរាប÷ នៅព្រឹកថ្ងៃទី១១ ខែវិច្ឆិកា ឆ្នាំ២០២៤ នេះក្រសួងកសិកម្មរុក្ខាប្រមាញ់និងនេសាទរួមនិងរដ្ឋបាលខត្តសៀមរាបបានសហការជាមួយសាកលវិទ្យាល័យ Charles Sturt នៃប្រទេសអូស្ត្រាលី និងគម្រោងបច្ចេកវិទ្យាជលផលនៅតំបន់អាស៊ីអាគ្នេយ៍ បានបើកវគ្គបណ្តុះបណ្តាលស្តីពីពង្រឹងសមភាពយេនឌ័រពិការភាពនិងបរិយាប័ន្នសង្គមបច្ចេកទេសរចនាប្លង់សាងសង់ជណ្តើរត្រីសម្រាប់ជំនាញការយុវជននៅកម្ពុជានៅសណ្ឋាការរីជិនស៊ីអង្គរខេត្តសៀមរាប ដែលស្ថិតក្រោម អធិបតីភាពឯកឧត្តម ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់និងនេសាទ ដោយមានការចូលរួមពី លោក អ៊ឹង គឹមលាង អភិបាលរងខេត្តសៀមរាប រួមនឹងវត្តមានតំណាងក្រសួងស្ថាប័នពាក់ព័ន្ធមួយចំនួនទៀត។
ការបើកបើកវគ្គបណ្តុះបណ្តាលស្តីពីពង្រឹងសមភាពយេនឌ័រពិការភាពនិងបរិយាប័ន្នសង្គមបច្ចេកទេសរចនាប្លង់សាងសង់ ជណ្តើរត្រីសម្រាប់ជំនាញការយុវជននៅកម្ពុជានេះដែរគឺមានរយៈពេល៣ថ្ងៃ ដោយចាប់ផ្តើមពីថ្ងៃទី១១-១៣ ខែវិច្ឆិកា ឆ្នាំ២០២៤ ដោយគោលបំណងដើម្បីពង្រឹងការចែករំលែកបទពិសោធន៍និងចូលរួមជាមួយអ្នកពាក់ព័ន្ធសំខាន់ៗពីជំនាញវិស្វកម្មធារាសាស្រ្តក្រុមអ្នកវិទ្យាសាស្រ្តជលផលនិងម្ចាស់ជំនួយដើម្បីធ្វើការដោយមត់ចត់សម្រាប់ពេលបច្ចុប្បន្ននិងអនាគត។
លោក អ៊ឹង គឹមលាង អភិបាលរងខេត្តសៀមរាប បានមានប្រសាសន៍ថា ទន្លេមេគង្គ គឺជាជម្រករបស់ត្រីជាច្រើន ដែលមិនបានឃើញពីកន្លែងណាផ្សេងទៀតក្នុង ពិភពលោក ដែលមានត្រីទឹកសាបជាង ១.០០០ប្រភេទ នៅក្នុងទន្លេមេគង្គ។ ដូច្នេះវាមានសារៈសំខាន់ខ្លាំងណាស់ដែលយើងទាំងអស់គ្នាត្រូវបន្តខិតខំការពារធនធានដ៏សំបូរបែបទាំងក្នុងពេលបច្ចុប្បន្ន និងអនាគតសម្រាប់សហគមន៍របស់យើង ដើម្បីប្រើប្រាស់ធនធានទាំងនេះ ប្រកបដោយប្រសិទ្ធភាព។ លោកបន្តថាការសាង សង់ជណ្តើរត្រី ដែលបានរចនាយ៉ាងសមស្រប និងបច្ចេកវិទ្យាឆ្លងកាត់ត្រីផ្សេងទៀត អាចជួយសម្រួលដល់ការអភិវឌ្ឍធន ធានទឹកប្រកបដោយនិរន្តរភាព ដោយការសាងសង់ជណ្តើរត្រី សម្រាប់ត្រីធ្វើការបន្លាស់ទី។ ប្រទេសជាច្រើនជុំវិញពិភពលោកបានចាប់ផ្តើមដាក់បញ្ចូលបច្ចេកវិទ្យា ជណ្តើរត្រីជាមួយទំនប់ធារាសាស្ត្រ ហើយបានបង្ហាញថាវាអាចទៅរួចក្នុងការផលិតអាហារ ទឹក និងថាមពល ដោយមិនប៉ះពាល់ដល់ជលផល។
ក្នុងនាមអាជ្ញាធរខេត្តសៀមរាបលោក អ៊ឹង គឹមលាង បានមានប្រសាសន៍លើកសរសើរនិងមានសេចក្តីរីករាយក្នុងការពិចារ ណាលើគោលនយោបាយវិជ្ជមាន និងការសាងសង់ ជណ្តើរត្រីរួមជាមួយប្រព័ន្ធធារាសាស្ត្រ ដែលផ្តល់អត្ថប្រយោជន៍ដល់អ្នកនេសាទ ប៉ុន្តែក៏ត្រូវផ្អែកលើវិទ្យាសាស្ត្រដ៏រឹងមាំ ដែលបង្ហាញឱ្យឃើញច្បាស់អំពីលទ្ធភាពសេដ្ឋកិច្ច ដើម្បីលើកកម្ពស់សន្តិសុខស្បៀងក្នុងសហគមន៍ផងដែរ។
ឯកឧត្តម ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់និងនេសាទ បានមានប្រសាសន៍ថា ផ្អែកតាមយុទ្ធសាស្ត្រ និងគោលនយោបាយ របស់រាជរដ្ឋាភិបាលដែលមាន សម្តេចធិបតី ហ៊ុន ម៉ាណែត ជានាយករដ្ឋមន្ត្រីនៃព្រះរាជាណា ចក្រកម្ពុជា ក្រសួងកសិកម្ម រុក្ខាប្រមាញ់ និងនេសាទ ដែលមានឯកឧត្តម ឌិត ទីណា ជារដ្ឋមន្ត្រី មានចក្ខុវិស័យកសិកម្ម វែងឆ្ងាយ៤គឺ÷ ១.កសិករមានហូប ២.មានប្រើ ៣.មានបាន និង៤.មានរហូត។ ឯកឧត្តម បន្តថានិយាយដោយឡែកធនធានជលផលជាពិសេសគឺត្រីពិតជាមានសារៈសំខាន់សម្រាប់ជាមួយអាហារទ្រទ្រង់ ជីវភាពប្រចាំថ្ងៃរបស់ប្រជាជនហើយក៏ជាមុខរបរសម្រាប់បងប្អូនប្រជានេសាទប្រកបមុខរបរចិញ្ចឹមជីវិតនិងអាស្រ័យ ផលសម្រាប់បង្កើនប្រាក់ចំណូលក្នុងគ្រួសារផងដែរ។ ឯកឧត្តម ឃុន សាវឿន បន្តថាកន្លងមក ដើម្បីអភិរក្សធនធានជលផល និងបង្កើនផលត្រីក្នុងធនធានធម្មជាតិ ក្រសួងកសិកម្ម រុក្ខាប្រមាញ់ និងនេសាទ បានសាង សង់ជណ្តើរត្រីបង្ហាញ និងដាក់ឱ្យប្រើជាផ្លូវការជណ្តើរត្រីបង្ហាញនៅតាមបណ្តាខេត្តមួយចំនួន ដែលជាជំនួយរបស់ Australian Aid មជ្ឈមណ្ឌលអូស្ត្រាលីសម្រាប់ការស្រាវជ្រាវកសិកម្មអន្តរជាតិ (ACIAR)។ ជណ្តើរត្រីមានសក្តានុពលក្នុងការធានានូវប្រសិទ្ធិភាពបំលាស់ទីរបស់ត្រីក្នុងអាងទឹកធម្មជាតិជាពិសេសជួយ បង្កើនផលិតភាពធនធានជលផលនិងជួយគាំទ្រការអភិរក្សត្រីធម្មជាតិរបស់ប្រទេសកម្ពុជា។ គុណប្រយោជន៍នៃ ជណ្តើរត្រីត្រូវបានទទួលស្គាល់ដោយរាជរដ្ឋាភិបាលកម្ពុជាក្នុងបរិបទនៃការងារគ្រប់គ្រង់និងធានាបាននិរន្តរភាពនៃការគ្រប់គ្រងធនធានជលផល។
ឯកឧត្តមរដ្ឋលេខាធិការក្រសួងកសិកម្ម រុក្ខាប្រមាញ់និងនេសាទ បានមានប្រសាសន៍បន្ថែមថាវគ្គបណ្តុះបណ្តាលដែលបានរៀបចំឡើងនាពេលនេះគឺពិតជាមានសារៈសំខាន់ក្នុងការចូលរួមចំណែកគ្រប់គ្រងធនធាន ផលផល ប្រកបដោយប្រសិទ្ធភាព និងវិវិត្តភាព សំដៅបង្កើនប្រាក់ចំណូលប្រជាជន និងធានានូវសន្តិសុខស្បៀង ដូច្នេះ ខ្ញុំស្នើសុំឱ្យអ្នកចូលរួមទាំងអស់យកចិត្តទុកដាក់ស្តាប់ការធ្វើបទបង្ហាញ និងទទួលការចែករំលែកបទពិសោធន៍ ពីអ្នកជំនាញ ដើម្បីយល់ដឹងកាន់តែច្បាស់យកទៅអនុវត្ត។ ក្នុងនោះដែរឯកឧត្តម ឃុន សាវឿន ក៏បានមានប្រសាសន៍ស្នើសុំឱ្យឯកឧត្តម លោក លោកស្រី និងស្ថាប័នពាក់ព័ន្ធទាំងអស់បន្តផ្តល់ការគាំទ្របច្ចេកទេសនិងសហប្រតិបត្តិការដើម្បីជួយកសាងជណ្តើរត្រីបង្ហាញ នៅកម្ពុជា និងបណ្តុះបណ្តាលមន្ត្រីជំនាញជាបន្តបន្ទាប់ ដើម្បីចូលរួមថែររក្សានិងបង្កើនផលធម្មជាតិនៅកម្ពុជាបន្ថែមទៀតផងដែរ៕
ដោយ÷ ពន្លឺ
