ខេត្តសៀមរាប÷ នាព្រឹកថ្ងៃទី២៤ខែតុលាឆ្នាំ២០២៤ នេះអគ្គនាយកដ្ឋានរដ្ឋបាល និងហិរញ្ញវត្ថុនៃក្រសួងព័ត៌មាន រួមសហការជាមួយក្រសួងសេដ្ឋកិច្ច និងហិរញ្ញវត្ថុបានបើកសិក្ខាសាលាស្តីពីនីតិវិធីនៃការរៀបចំបញ្ជីសារពើភណ្ឌទ្រព្យសម្បត្តិរដ្ឋតាមប្រព័ន្ធ SARMIS(online)ដល់មន្ត្រីជំនាញនៃមន្ទីរព័ត៌មានរាជធានីខេត្តទាំងអស់ក្រោមឱវាទក្រសួងព័ត៌មាន នៅសណ្ឋាគារអង្គរប៉ារ៉ាឌីខេត្តសៀមរាប ស្ថិតក្រោមអធិបតីភាពឯកឧត្តម ប្រាក់ ថាវអមិដា អនុរដ្ឋលេខាធិការនិងជានាយកខុទ្ទកាល័យរដ្ឋមន្រ្តីក្រសួងព័ត៌មាន។
លោកជំទាវ ទេស ផល្លីន អគ្គនាយិការដ្ឋបាលនិងហិរញ្ញវត្ថុនៃក្រសួងព័ត៌មានបានមានប្រសាសន៍ថាការបើកសិក្ខាសាលាស្តីពីនីតិវិធីនៃការរៀបចំបញ្ជីសារពើភណ្ឌទ្រព្យសម្បត្តិរដ្ឋតាមប្រព័ន្ធSARMIS(online)នាពេលនេះគឺ ក្នុងគោលបំណងពង្រឹងសមត្ថភាពបន្ថែមជូនមន្ត្រីពាក់ព័ន្ធ ឱ្យយល់ដឹងកាន់តែច្បាស់ លើការ គ្រប់គ្រង ការប្រើប្រាស់ និងចាត់ចែងលើទ្រព្យសម្បត្តិរដ្ឋ ព្រមទាំងកំណត់អំពីក្របខណ្ឌច្បាប់ និងស្ថាប័នជាគោលសំដៅចូលរួម ចំណែកបម្រើឧត្តមប្រយោជន៍នៃការអភិវឌ្ឍសេដ្ឋកិច្ច សង្គម បរិស្ថាន និងវប្បធម៌ និង គោលដៅពង្រឹងពង្រីកសមត្ថភាព និងលើកកម្ពស់ការយល់ដឹងថែមទៀត ជូនមន្រ្តីរាជការទទួលបន្ទុកការងារពាក់ព័ន្ធនឹងការគ្រប់គ្រងទ្រព្យសម្បត្តិរដ្ឋ ទាំងថ្នាក់កណ្តាល និងមន្ទីរទាំង ២៥ រាជធានីខេត្ត ដើម្បីរៀបចំបញ្ជីសារពើភណ្ឌទ្រព្យសម្បត្តិរដ្ឋ តាមប្រព័ន្ធបច្ចេកវិទ្យាព័ត៌មាន គ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ-SARMIS (Online) ឱ្យបានត្រឹមត្រូវ និងចូលរួមអនុវត្តផងដែរនូវកម្មវិធីកែទម្រង់ការគ្រប់គ្រង ហិរញ្ញវត្ថុសាធារណៈ និងរួមចំណែកការឆ្លើយ តបទៅនឹងចរន្តសកលនៃសេដ្ឋកិច្ចឌីជីថល និងបដិវត្តន៍ឧស្សាហកម្មទី ៤.០ ។
លោកជំទាវ ទេស ផល្លីន បានបន្តថា ការងារការគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ គឺជាចលករដ៏មុខស្រួចរបស់រាជរដ្ឋាភិបាល ក្នុងការកែលម្អការគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋនៅកម្ពុជា ដោយមានប្រព័ន្ធ SAMIS (Online) គឺជាឧបករណ៍ស្នូលមិនអាចខ្វះបាន ក្នុងការគាំទ្រដល់ដំណើរការនៃការកែទម្រង់ហិរញ្ញវត្ថុសាធារណៈនៅក្នុងដំណាក់កាលនីមួយៗផងដែរ ។ ឯកឧត្តម ប្រាក់ ថាវអមិដា អនុរដ្ឋលេខាធិការនិងជានាយកខុទ្ទកាល័យរដ្ឋមន្រ្តីក្រសួងព័ត៌មាន បានមានប្រសាសន៍ថា រាជរដ្ឋាភិបាលកម្ពុជាបានជំរុញការធ្វើបរិវត្តកម្មឌីជីថលលើគ្រប់វិស័យតាមរយៈការដាក់ចេញនូវក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥ ដែលជាមាគ៌ា តម្រង់ទិសមួយដ៏សំខាន់សម្រាប់គ្រប់តួអង្គពាក់ព័ន្ធ ឱ្យ ផ្តោតការយកចិត្តទុកដាក់និងជំរុញការចាប់ យកប្រយោជន៍ជាអតិបរមានពីបច្ចេកវិទ្យា ឌីជីថល ក្នុងការបង្កើនផលិតភាព និងប្រសិទ្ធភាពការងារ។ ឯកឧត្តម ប្រាក់ ថាវអមិដា បន្តថា ប្រព័ន្ធបច្ចេកវិទ្យាព័ត៌មានគ្រប់គ្រងបញ្ជីសារពើភណ្ឌ ទ្រព្យសម្បត្តិរដ្ឋគឺ តម្រូវ ឱ្យក្រសួងនិងមន្ទីរដែលជាអាជ្ញាធរទទួលបន្ទុកគ្រប់គ្រងទ្រព្យសម្បត្តិរដ្ឋ ត្រូវរៀបចំបញ្ជីសារពើភណ្ឌក្នុងដែនសមត្ថកិច្ចរបស់ខ្លួន តាមគំរូនិងប្លង់ របស់ក្រសួងសេដ្ឋកិច្ច និងហិរញ្ញវត្ថុ ដើម្បីគ្រប់គ្រងទ្រព្យសម្បត្តិរដ្ឋប្រកបដោយ គុណភាព គណនេយ្យភាព តម្លាភាព ប្រសិទ្ធភាព ស័ក្តិសិទ្ធភាព និងបូរណភាព ដើម្បីសម្រេចគោលនយោបាយអាទិភាពរបស់រាជរដ្ឋាភិបាល។
ឯកឧត្តម បន្ថែមថាក្រសួងព័ត៌មាន នៅតែបន្តការពង្រីកវិសាលភាពនៃ ការប្រើប្រាស់ប្រព័ន្ធ SARMIS (Online) បន្ថែមទៀត រហូតដល់មន្ទីររាជធានី-ខេត្ត ដែលនៅសេសសល់ ដើម្បីជំរុញឱ្យទាន់ដំណាក់កាលនៃការធ្វើបរិវត្តកម្មឌីជីថលទៅ ក្នុងប្រព័ន្ធការងារ ពោលគឺការលើកកម្ពស់ប្រសិទ្ធភាពនៃការអនុវត្តនីតិវិធីការងារ បែបឌីជីថល។ ឯកឧត្តម ប្រាក់ ថាវអមិដា ក៏បានមានប្រសាសន៍រំលឹកពីប្រសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេ ជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភានៃព្រះរាជាណាចក្រកម្ពុជា ដែលតែងដាស់តឿនយើងទាំងអស់គ្នាថា “កែទម្រង់រស់ មិនកែទម្រង់ស្លាប់” រួមជាមួយនឹងអភិក្រមចំនួន ៥ ចំណុច ក្នុងការអនុវត្តការកែទម្រង់ស៊ីជម្រៅ គឺ “ឆ្លុះកញ្ចក់, ងូតទឹក, ដុសក្អែល, ព្យាបាល និងវះកាត់” ហើយប្រសាសន៍ដ៏ខ្ពង់ខ្ពស់ និងអភិក្រមទាំង៥នេះ នៅបន្តអនុវត្តយ៉ាងម៉ឺងម៉ាត់នៅក្នុងនីតិកាលទី ៧នៃរដ្ឋសភា ក្រោមការដឹកនាំប្រកបដោយចក្ខុវិស័យ និងភាពប្រាកដនិយម របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
ឯកឧត្តម អនុរដ្ឋលេខាធិការក្រសួងព័ត៌មាន បានមានប្រសាសន៍ផ្តាំផ្ញើរដល់ថ្នាក់ដឹកនាំ និងមន្ត្រីគ្រប់ជាន់ថ្នាក់ ដែលមានតួនាទី និងភារកិច្ចក្នុងការបំពេញកិច្ចការគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ ត្រូវ ត្រៀមខ្លួនជាស្រេចក្នុងការផ្លាស់ប្តូរជានិច្ច និងបំពេញភារកិច្ចរបស់ខ្លួនឱ្យបានត្រឹមត្រូវ ប្រកបដោយវិជ្ជាជីវៈផងដែរ៕
ដោយ÷ ពន្លឺ
