វត្តអារញ្ញសាគរដង្ហែសង្ឃឹកប្រទីបជ្វាលាដើម្បីសុំខមាលទោសដល់ម្ចាស់ទឹកម្ចាស់ដី 

ខេត្តសៀមរាប÷ ពិធីដង្ហែសង្ឃឹកជាប្រពៃណីទំនៀមទំលាប់អ្នកនៅតំបន់ចុងឃ្នាសប្រកាន់ខ្ជាប់មកដល់សព្វថ្ងៃ និងតែងតែធ្វើឡើងនៅរាត្រីពេញបរមី១៥កើតខែអស្សុជ បន្ទាប់ពីព្រះសង្ឃធ្វើពិធីបវរណាចេញព្រះវស្សា។ នៅរាត្រីពេញបរមីខែអស្សុជត្រូវនឹងថ្ងៃទី១៧ ខែតុលា ឆ្នាំ២០២៤ ព្រះសង្ឃ គណៈកម្មការ អាចារ្យវត្ត និងបងប្អូនប្រជាពលរដ្ឋតាមភូមិនានាចំណុះជើងវត្តអារញ្ញសាគរស្ថិតក្នុងក្រុងសៀមរាប ខេត្តសៀមរាប បានមូលមតិគ្នាជាឯកច្ឆ័ន្ទរៀបចំយ៉ាងអធិកអធមនូវពិធីដង្ហែសង្ឃឹកប្រទីបជ្វាលាទៅកាន់ចុងទឹកក្បែរភូមិសាស្ត្របឹងទន្លេសាប។

ពិធីនេះដែរតែងធ្វើឱបស្ទបជាមួយនឹងពិធីបុណ្យចេញព្រះវស្សាដើម្បីបង្ហាញជាសញ្ញាថារដូវវស្សាឆ្នាំនេះបានឆ្លងផុតហើយ ជាពិសេស និងសំខាន់បំផុតនៃពិធីនេះគឺសុំខមាទោសដល់ម្ចាស់ទឹកម្ចាស់ដីដែលឱ្យយើងប្រើប្រាស់ជារៀងរាល់ថ្ងៃដើម្បីទ្រទ្រង់ជីវិតរបស់យើងគ្រប់គ្នា ក្រែងមានធ្វើអំពើមិនគប្បីណាមួយដោយចេតនាក្តី អចេតនាក្តី ទៅលើព្រះគង្គារ ព្រះធរណី ហើយព្រះសង្ឃក៏ធ្វើពិធីសូត្រជ័យន្តោ ចម្រើនព្រះបរិត្ត ដើម្បីឧទ្ទិសបុណ្យកុសលដល់ម្ចាស់ទឹកម្ចាស់ដីព្រៃព្រឹក្សាផងទាំងឡាយនិងងាកមកឱ្យពរសព្វសាធុកាជ័យមង្គលដល់ប្រជាពុទ្ឋបរិស័ទគ្រប់រូបឱ្យជួបតែសេចក្តីសុខចំរើន។ នេះបើតាមសង្ឃដិការបស់ ព្រះវិភត្តិមុនីញាណ ហ៊ាក់ គឹមហ៊ត់ វិសារទោ ព្រះគ្រូចៅអធិការវត្តអារញ្ញសាគរ។

ព្រះអង្គមានថេរដិកាទៀតថា៖ពិធីនេះចាស់ៗនាំគ្នាធ្វើឡើង ដើម្បី ដឹងគុណដល់ម្ចាស់ទឹកម្ចាស់ដីដែលយើងប្រើប្រាស់ទឹកដីអស់រយៈពេលមួយឆ្នាំ និងដើម្បីបង្ហាញដល់ក្មេងៗស្រករក្រោយឱ្យបានដឹងបានយល់អំពីវប្បធម៌ប្រពៃណីទំនៀមទំលាប់ដែលបុព្វបុរសរបស់ខ្មែរបានបន្សល់ទុកមក ហើយនាំគ្នាគោរពនិងថែរក្សាកុំឱ្យសាបរលាបនិងបាត់បង់ សម្រាប់ទុកជាកេរ្តិ៍ដំណែលតកូនចៅគ្រប់ៗជំនាន់ទៅថ្ងៃក្រោយរបស់យើងឱ្យពួកគាត់បានស្គាល់ផង។ព្រះតេជគុណ ហ៊ាក់ គឹមហ៊ត់ បន្ថែមថា៖ ពិធីដង្ហែសង្ឃឹក ប្រទីបជ្វាលានេះ ជាពិធីនិយមធ្វើតៗគ្នាពីបុរាណរបស់អ្នកនៅតំបន់ចុងទឹកទៅតាមប្រពៃណីទំនៀមទំលាប់នៃប្រជាពលរដ្ឋនៅតំបន់ណាមួយ មិនជាទូទៅទេ ។សព្វថ្ងៃ ប្រពៃណីនេះ នៅខេត្តសៀមរាប ស្ទើរតែបាត់បង់អស់ហើយ មាននៅតែវត្តតិចតួចដែលផ្តួចផ្តើមនិងប្រារព្ឋនាំគ្នាធ្វើ។សូមជំរាបថា៖

សង្ឃឹក, ជាឈ្មោះប្រដាប់មួយប្រភេទ មានជើង៤, មានដងស្នែង២, មានរនាប, មានជញ្ជាំងតឿជារបាំង សម្រាប់ដាក់គ្រឿងបរិក្ខារ រណ្តាប់ដង្វាយឬសំណែនច្រើនមុខ សម្រាប់ដាក់គ្រឿងសំណែនបណ្តែតតាមខ្សែទឹក ឬសែងទៅដាក់លើគោក ដើម្បីឧទ្ទិសដល់ព្រះគង្គា ព្រះធរណី និងទេវតា អារុក្ខអារក្សអ្នកតាម្ចាស់ទឹកម្ចាស់ដី ព្រៃព្រឹក្សា ដែលថែរក្សាស្ថិតនៅតាមព្រៃភ្នំជ្រោះជ្រងជ្រលងដងអូរ៕

ដោយ÷ ពន្លឺ