ខេត្តសៀមរាប ៖ នាព្រឹកថ្ងៃទី២១ខែ ឧសភា ឆ្នាំ ២០២៤ នេះមន្ទីររៀបចំដែនដី នគររូបនីយកម្ម សំណង់ និងសុរិយោដីខេត្តសៀមរាប រួមជាមួយនិងអាជ្ញាធរស្រុកក្រឡាញ់បានបន្តចុះធ្វើការផ្សព្វផ្សាយសេចក្តីប្រកាសកំណត់តំបន់ធ្វើការវិនិច្ឆ័យសម្រាប់ការចុះបញ្ជីដីធ្លីមានលក្ខណៈប្រព័ន្ធចំនួន៨ភូមិក្នុងឃុំសំបួរ ស្រុកក្រឡាញ់ខេត្តសៀមរាបគឺមានភូមិគោកក្រូច ភូមិអន្លង់សារភូមិដំណាក់ខ្ចាស់ភូមិសំបួរភូមិឪម៉ាល់ភូមិគោកចាស់ ភូមិអំពិល និងភូមិសន្ថន។
ក្នុងពិធីផ្សព្វផ្សាយនេះដែរគឺធ្វើឡើងនៅក្នុងបរិវេណសាលាឃុំសំបួរ ក្រោមវត្តមានចូលរួមពីសំណាក់លោក ប៊ូ ជុំសម្បត្តិ អនុប្រធាន មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាបនិងលោក សុខ ណារ៉េត អភិបាលស្រុកក្រឡាញ់ ។
លោក ប៊ូ ជុំសម្បត្តិ អនុប្រធាន មន្ទីររៀបចំដែនដីនគរូបនីយកម្ម សំណង់ និងសុរិយោដីខេត្តសៀមរាបបានមានប្រសាសន៍ថាការចុះបញ្ជីដីធ្លីមានលក្ខណៈជាប្រព័ន្ធគឺរួមមានការកំណត់ព្រំដី ការវាស់វែង និងការវិនិច្ឆ័យ ដែលអនុវត្តផ្ទាល់ដោយមន្ត្រីជំនាញ នៃមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត សហការជាមួយអាជ្ញាធរដែនដី និងមន្ទីរ អង្គភាពគ្រប់គ្រងដីរដ្ឋដែលពាក់ព័ន្ធផងដែរ។
លោក ក៏បានបន្តថាការការចុះបញ្ជីដីធ្លីមានលក្ខណៈជាប្រព័ន្ធមានគោលបំណង ធ្វើការចុះបញ្ជីលើអចលនវត្ថុទាំងអស់គឺទាំងដីរដ្ឋ និងដីឯកជនឱ្យបានច្បាស់លាស់ដោយធ្វើការផ្ទេរសិទ្ធិលើទ្រព្យទាំងនោះជាផ្លូវការ ដើម្បីទប់ស្កាត់ និងដោះស្រាយវិវាទដីធ្លីសំដៅពង្រឹងសុវត្ថិភាពនៃការកាន់កាប់ដីធ្លីធានានូវទំនុកចិត្ត និងប្រសិទ្ធិភាពនៃទីផ្សារដីធ្លី។ លោក ប៊ូ ជុំសម្បត្តិ ក៏បានមានប្រសាសន៍អំពាវនាវដល់ បងប្អូនប្រជាពលរដ្ឋទាំងអស់ដែលជាម្ចាស់ដី ឬអ្នកកាន់កាប់ដី ត្រូវបោះ បង្គោល ព្រំដីដែលបានឯកភាពព្រំរវាងអ្នកជាប់ព្រំ និងត្រៀមរៀបចំឯកសារមួយចំនួនដែលពាក់ព័ន្ធនឹងអត្តសញ្ញាណម្ចាស់ដី រួមមាន អត្តសញ្ញាណប័ណ្ណ សៀវភៅគ្រួសារ សៀវភៅស្នាក់នៅ សំបុត្រកំណើត សំបុត្រអាពាពិពាហ៍ និងអត្តសញ្ញាណក្បាលដីដូចជា ប័ណ្ណកម្មសិទ្ធិ បង្កាន់ដៃទទួលពាក្យ លិខិតលក់ទិញ លិខិតផ្ទេរសិទ្ធ សេចក្តីសំរេចរបស់តុលាការ ជាមុនសិន មុននឹងដំណើរការនៃការកំណត់ព្រំវាស់វែង វិនិច្ឆ័យឈានចូលមកដល់ផងដែរ ។
ក្នុងនាមអាជ្ញាធរស្រុក លោក សុខ ណារ៉េត អភិបាលស្រុកក្រឡាញ់បានមានប្រសាសន៍ថា ដើម្បីសំរេចទៅដល់ការចេញវិញ្ញាបនប័ត្រសំគាល់ម្ចាស់អចលនវត្ថុ (ប័ណ្ណកម្មសិទ្ធិ)នីមួយៗ គឺមានការងារច្រើនណាស់ដែលទាមទារនូវការខិតខំប្រឹងប្រែងរបស់មន្ត្រីជំនាញ និងការចូលរួមពីសំណាក់ប្រជាពលរដ្ឋជាម្ចាស់ដី ឬ/និងអ្នកកាន់កាប់ដីទាំងអស់ រួមទាំងមន្ទីរនិងស្ថាប័នពាក់ព័ន្ធ ហើយពិសេសគឺអាជ្ញាធរមូលដ្ឋានត្រូវមានកិច្ចសហការល្អជាមួយនឹងមន្ត្រីជំនាញ ដើម្បីធ្វើការវាស់វែងក្បាលដីដោយបានឯកភាពព្រំរវាងអ្នកជាប់ព្រំ និងត្រៀមរៀបចំឯកសារមួយចំនួនដែលពាក់ព័ន្ធនឹងអត្តសញ្ញាណម្ចាស់ដី(អត្តសញ្ញាណប័ណ្ណ សៀវភៅគ្រួសារ សៀវភៅស្នាក់នៅ សំបុត្រកំណើត សំបុត្រអាពាពិពាហ៍ ជាដើម) និងអត្តសញ្ញាណក្បាលដី (ប័ណ្ណកម្មសិទ្ធិ បង្កាន់ដៃទទួលពាក្យ លិខិតលក់ទិញ លិខិតផ្ទេរសិទ្ធ សេចក្តីសំរេចរបស់តុលាការ លិខិតធ្វើអំណោយផ្តាច់…) ជាមុនសិន មុននឹងដំណើរការនៃការកំណត់ព្រំ វាស់វែងឈានចូលមកដល់ ។
លោកអភិបាលស្រុកក៏បានបន្តទៀតថា ក្រោយពីការចុះបញ្ជីដីធ្លីនេះរួច ប្រជាពលរដ្ឋដែលជាម្ចាស់ក្បាលដី អ្នកកាន់កាប់ទទួលបានប័ណ្ណកម្មសិទ្ធិ ហើយតាមរយៈនៃប័ណ្ណកម្មសិទ្ធិនេះបងប្អូនប្រជាពលរដ្ឋ នឹងក្លាយជាម្ចាស់ដីពិតប្រាកដមានសិទ្ធិស្របច្បាប់ក្នុងការកាន់កាប់ប្រើប្រាស់អាស្រ័យផល ហើយមិនត្រឹមតែប៉ុណ្ណោះទេបណ្ណ័កម្មសិទ្ធិ គឺជាឯកសារគតិយុត្តសំរាប់ជាសំអាងនៅពេលមានជំលោះកើតឡើងបញ្ជាក់ថាខ្លួនជាម្ចាស់ដីធ្លីពិតប្រាកដ។
ក្នុងនោះដែរលោកសុខ ណារ៉េត ក៏បានមានប្រសាសន៍កោតសរសើរដល់មន្ទីររៀបចំដែនដី នគរូបនីយកម្ម សំណង់ និងសុរិយោងដីខេត្តសៀមរាប ដែលបានខិតខំប្រឹងប្រែងសម្រេចលទ្ធផលក្នុងការចុះបញ្ជីប្រមូលទិន្នន័យក្បាលដី និងអ្នកកាន់កាប់ដី ដែលកំពុងអនុវត្តចុះកំណត់ព្រំ វាស់វែង ផ្សព្វផ្សាយកំណត់តំបន់វិនិច្ឆ័យ ក្នុងស្រុកក្រឡាញ់ ដើម្បីចុះបញ្ជីដីធ្លីមានលក្ខណៈជាប្រព័ន្ធ និងចេញប័ណ្ណកម្មសិទ្ធិជូនប្រជាពលរដ្ឋ ។
លោកអភិបាលស្រុក ក៏បានស្នើដល់ប្រជាពលរដ្ឋត្រូវកំណត់ព្រំដីឱ្យបានច្បាស់លាស់ដើម្បីមានភាពងាយស្រួលដល់ក្រុមការងារចុះបញ្ជី និងសូមផ្សព្វផ្សាយបន្តដល់បងប្អូនប្រជាពលរដ្ឋដែលមានក្បាលដីក្នុងឃុំសំបួរឱ្យបានដឹងគ្រប់ៗគ្នា និងផ្តល់ការគាំទ្រ យោគយល់ និងផ្តល់កិច្ចសហការជាមួយក្រុមការងារមន្ត្រីជំនាញ ក្នុងដំណើរការចុះបញ្ជីដីធីមានលក្ខណៈជាប្រព័ន្ធនេះឱ្យបានជោគជ័យផងដែរ។
សូមបញ្ជាក់ថាជាលទ្ធផលនៃការចុះបញ្ជីដីធ្លីមានលក្ខណៈជាប្រព័ន្ធសំរាប់ខេត្តសៀមរាប មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប បានសម្រេចប្រកាសកំណត់តំបន់សម្រាប់ធ្វើការវិនិច្ឆ័យដែលមានលក្ខណៈជាប្រព័ន្ធរួចបានចំនួន៤៣៥ភូមិ លើក្រុង/ស្រុកចំនួន ១២៖ គឺ ក្រុងសៀមរាប បានចំនួន៧១ភូមិ ស្រុកពួក បានចំនួន២៩ភូមិ ស្រុកប្រាសាទបាគង បានចំនួន៤៩ភូមិ ស្រុកសូទ្រនិគម បានចំនួន៩០ភូមិ ស្រុកក្រឡាញ់ បានចំនួន៣៦ភូមិ ស្រុកជីក្រែង បានចំនួន៤៨ភូមិ ស្រុកបន្ទាយស្រី បានចំនួន២១ភូមិ ស្រុកអង្គរធំ បានចំនួន១២ភូមិ ស្រុកស្រីស្នំ បានចំនួន១២ភូមិ ស្រុកវ៉ារិន បានចំនួន១៦ភូមិ ស្រុកស្វាយលើ បានចំនួន១៨ភូមិ និងស្រុកអង្គរជុំ បានចំនួន៣៣ភូមិផងដែរ៕
ដោយ ÷ ពន្លឺ
