នៅព្រឹកថ្ងៃទី២៥ ខែមីនា ឆ្នាំ២០២៤នេះ នៅសាលប្រជុំសាលាខេត្តសៀមរាប មានបើកកិច្ចប្រជុំក្រុមការងារសិក្សា ពិនិត្យ និងចុះបញ្ជីដីពាក់ព័ន្ធ បុរាណដ្ឋាន ក្នុងភូមិសាស្ត្រខេត្តសៀមរាប ក្រោមអធិបតីភាពឯកឧត្តម សរ សុវណ្ណ រដ្ឋលេខាធិការ ក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងារសិក្សា ពិនិត្យ និងចុះបញ្ជីដីពាក់ព័ន្ធ បុរាណដ្ឋាន ក្នុងភូមិសាស្ត្រខេត្តសៀមរាប ដោយមានការអញ្ជើញចូលរួមពីឯកឧត្តម លោកជំទាវ ជារដ្ឋលេខាធិការ អនុរដ្ឋលេខាធិការ គណៈអភិបាលខេត្ត អាជ្ញាធរជាតិអប្សរា អស់លោកលោកស្រីជាសមាជិកក្រុមការងារថ្នាក់ដឹកនាំមន្ទីរ មន្ត្រីមន្ទីរពាក់ព័ន្ធ អាជ្ញាធរក្រុង ស្រុក មេឃុំ ចៅសង្កាត់ និងមេភូមិ ប្រមាណជា២០០នាក់ចូលរួមផងដែរ។
លោក ហ៊ី សាយ ប្រធានមន្ទីររៀបចំដែនដីនគរូបនីយកម្ម សំណង់ និង សុរិយោដីខេត្តសៀមរាប បានមានប្រសាសន៍បញ្ជាក់ពីការងារចុះបញ្ជីដីធ្លីនៅទូទាំងខេត្តសៀមរាប និង បានបញ្ជាក់ពីទិន្នន័យដីធ្លីប៉ះពាល់បុរាណដ្ឋានទូទាំងខេត្តមានចំនួន១៩.០០០ក្បាលដី និយាយដោយឡែកក្នុងក្រុង/សៀមរាប ដែលមន្ទីរទទួលបានទិន្នន័យបុរាណដ្ឋានពីអាជ្ញាធរជាតិអប្សរា ចំនួន៣២៦ ទីតាំងបុរាណដ្ឋាន ក្នុងសង្កាត់ទាំង១២ ។
ក្នុងនោះបុរាណដ្ឋាន ៤៥ទីតាំងស្ថិតក្នុងតំបន់២ និងតំបន់៣ នៃអាជ្ញាធរបឹងទន្លេសាប ដែលបច្ចុប្បន្នកំពុងវាស់វែងប្រមូលទិន្នន័យ និង២៨១ទីតាំងទៀត ស្ថិតក្នុងតំបន់អនុវត្តនីតិវិធីចុះបញ្ជីដីធ្លីមានលក្ខណៈជាប្រព័ន្ធរួច មានប្រជាពលរដ្ឋកាន់កាប់ជាន់លើបុរាណដ្ឋានចំនួន ៥ពាន់៦៧០ក្បាលដី ។
លោក លី សំរិទ្ធ អភិបាលរងខេត្ត បានមានប្រសាសន៍បញ្ជាក់ថា ការបង្កើតក្រុមការងារសិក្សា ពិនិត្យ និង ចុះបញ្ជីដីពាក់ព័ន្ធ បុរាណដ្ឋាន ក្នុងភូមិសាស្ត្រខេត្តសៀមរាប គឺជាការបង្កើតយន្តការសម្រាប់ដោះស្រាយបញ្ហាដែលនៅសេសសល់ ក្នុងភូមិសាស្ត្រខេត្តសៀមរាប ដែលពាក់ព័ន្ធទៅនឹងដីធ្លីបុរាណដ្ឋាន។ ម៉្យាងទៀតកិច្ចប្រជុំនេះ និងកំណត់បាននូលក្ខណៈវិនិច្ឆ័យមួយដ៏សុក្រឹត្យ សម្រាប់ដោះស្រាយ បញ្ហា ពុះបំបែករាល់បញ្ហាប្រឈមទាំងឡាយដែលនៅសេសសល់កន្លងមកត្រូវធ្វើឲ្យបានចប់សព្វគ្រប់នៅតាមក្រុង ស្រុក ជា សំខាន់នៅក្រុងសៀមរាប។
ក្នុងនាមអាជ្ញាធរខេត្ត លោកក៏បានធ្វើការគាំទ្រ និងត្រៀមគ្រប់លក្ខណៈក្នុងកិច្ចសហប្រតិបត្តិការ ដើមី្បដោះស្រាយរាល់បញ្ហាទាំងនេះ។
ក្នុងនោះដែរឯកឧត្តម សរ សុវណ្ណ ក៏បានលើកនូវអនុសាសន៍របស់សម្តេចធិបតី ហ៊ុន ម៉ាណែត នាយករដ្ឋមន្ត្រី និងឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ គឺយើងរួមគ្នាគិត រួមគ្នាធ្វើ រួមគ្នាទទួលខុសត្រូវ រួមគ្នាទទួលផល។
ឯកឧត្តមបន្តទៀតថា រាជរដ្ឋាភិបាលបានយកចិត្តទុកដាក់ខ្ពស់ក្នុងការគិតគួរបងប្អូន មានផលប៉ះពាល់បុរាណដ្ឋានចំនួន៥ពាន់៦៧០ក្បាលដីនៅក្រុងសៀមរាប។ កិច្ចប្រជុំនេះដើមី្បរឹះរកនូវដំណោះស្រាយក្នុងការដោះស្រាយជូនប្រជាពលរដ្ឋ។ ម៉្យាងវិញទៀតនៅទូទាំងខេត្តសៀមរាប ដីដែលប៉ះពាល់បុរាណដ្ឋានមានចំនួន១៩.០០០ក្បាលដីនៅក្នុងតំបន់វិនិច្ឆ័យ។
ក្នុងនោះដែរឯកឧត្តម សរ សុវណ្ណ ក៏សូមឲ្យអាជ្ញាធរស្ថាប័នពាក់ព័ន្ធទាំងអស់ត្រូវរួមគ្នាធ្វើ ដើមី្បដោះស្រាយនូវរាល់ទុក្ខកង្វល់របស់ប្រជាពលរដ្ឋដែលជាម្ចាស់ឆ្នោតរបស់ខ្លួន។ ក្នុងនោះក្រុមការងារក៏បានយកចិត្ត ទុកដាក់ខ្ពស់ក្នុងការដោះស្រាយទៅលើដីបុរាណដ្ឋានដើមី្បឲ្យបងប្អូនមានក្តីសង្ឃឹមទៅមុខ។ ឯកឧត្តមក៏បានបញ្ជាក់ផងដែរនូវខ្លឹមសារអត្ថន័យមូលដ្ឋានគ្រឹះនៃយុទ្ធសាស្ត្របញ្ចកោណដំណាក់កាលទី១របស់រាជរដ្ឋាភិបាល ក្រោមកិច្ចដឹកនាំសម្តេចធិបតី ហ៊ុន ម៉ាណែត នាយករដ្ឋមន្ត្រី ព្រមទាំងបានរំលឹកដល់បងប្អូនត្រូវ អរគុណ សន្តិភាព អរគុណនយោបាយ ឈ្នះ ឈ្នះ!
– ដឹងគុណស្ថាបនិកមគ្គុទេសក៍ឯក ប្រតិបត្តិករនយោបាយ ឈ្នះ ឈ្នះ ដែលបាននាំមកនូវសន្តិភាព ឯកភាពជាតិ ពេញលេញ ជូនដល់ប្រទេសកម្ពុជាធ្វើឲ្យមានការអភិវឌ្ឍន៍រីកចម្រើលើគ្រប់វិស័យ។ ឯកឧត្តមបានបន្តទៀតថាយុទ្ធនាការនេះសំដៅក្នុងការចុះបញ្ជីដីបញ្ចប់ សេវាទាន់ចិត្ត និងបរិយាកាសគ្មានវិវាទ ដោយដីនៅព្រះរាជាណាចក្រកម្ពុជាទាំងអស់ត្រូវរួមគ្នាបញ្ចប់ការចុះបញ្ជីឲ្យអស់។ រាល់សកម្មភាពការចុះបញ្ជីដីធ្លីនៅទូទាំងប្រទេស ជាលទ្ធផល បានចំនួន ៧លាន ៣សែនក្បាលដី ដោយមានការចូលរួមគ្រប់បណ្តារាជធានី ខេត្ត ហើយនិយាយដោយឡែកនៅខេត្តសៀមរាប ការចុះបញ្ជីដីធ្លីបានប្រមាណ៣០ម៉ឺនក្បាលដីផងដែរ។ យោងតាមការប៉ាន់ប្រមាណនៅទូទាំងប្រទេស ការមិនទាន់បានចុះបញ្ជីមានប្រមាណ ៥លានក្បាលដី ។ ក្នុងនោះដែរឯកឧត្តមក៏បានជម្រុញដល់ក្រុមការងារ និងអាជ្ញាធរមូលដ្ឋាន ស្ថាប័នពាក់ព័ន្ធរួមកិច្ចសហការគ្នា ធ្វើ ការជម្រះនូវរាល់បញ្ហាសេសសល់ និងជម្រុញការអនុវត្តនូវផែនការថ្មីរបស់រាជរដ្ឋាភិបាលក្នុងការចុះបញ្ជីបញ្ចប់ សេវាទាន់ចិត្ត និងបរិយាកាសគ្មានវិវាទឲ្យបានរួចរាល់នៅឆ្នាំ២០២៥។
ឯកឧត្តមបន្តថា ខេត្តសៀមរាប នៅសេសសល់ក្បាលដីមិនទាន់ចុះបញ្ជីដីធ្លីប្រមាណ៥សែនក្បាលដី ដោយអនុវត្តនៅដីផ្នែកខាងលើ និងដីផ្នែកខាងក្រោមក្នុងតំបន់៣ តំបន់២ បឹងទន្លេសាប ។ ឯកឧត្តមបានគូសបញ្ជាក់ថាការចុះបញ្ជីដីធ្លីនេះ គឺសេវាគាប់ចិត្ត សេវាចុះបញ្ជីដីធ្លីប្រកបដោយតម្លាភាពធ្វើឲ្យអ្នក ទទួលសេវាមានការជឿទុកចិត្ត សេវាសុវត្ថិភាព។ ម៉្យាងទៀតសូមក្រុមការងារ និងអាជ្ញាធរមូលដ្ឋាន ធ្វើយ៉ាងណាឲ្យប្រជាពលរដ្ឋមានភាពកក់ក្តៅជឿជាក់លើការដឹងនាំរបស់រាជរដ្ឋាភិបាល ព្រមទាំងការចុះបញ្ជីដីធ្លីបញ្ចប់នូវរាល់វិវាទ។
ឯកឧត្ដមបន្តទៀតថា ការសម្របសម្រួលដោះស្រាយទំនាស់ដីធ្លីជូនប្រជាពលរដ្ឋ ជាយន្តការមួយដ៏មានសារ:សំខាន់សម្រាប់សង្គម និងប្រជាពលរដ្ឋ និងជាលទ្ធផលនយោបាយឈ្នះឈ្នះ នៃសម័យប្រទេសកំពុងមានសុខសន្តិភាព និងការអភិវឌ្ឍពេញលេញ ប្រកបដោយបរិយាប័ន្ន និងសមធម៌ សន្តិភាព អនុញ្ញាត ឲ្យមានកាលានុវត្តភាព ក្នុងនូវការកាត់បន្ថយវិវាទ ដើម្បីការអភិវឌ្ឍសង្គមជាតិផងដែរ៕
ដោយ ៖ ពន្លឺ
