ខេត្តសៀមរាប ÷ នៅថ្ងៃទី២២ខែកញ្ញាឆ្នាំ២០២៣ នេះអគ្គនាយកដ្ឋានសហគ្រាសធុនតូច និងមធ្យម នៃក្រសួងឧស្សាហកម្ម វិទ្យាសាស្ត្រ និងនវានុវត្តន៍ និងមន្ទីរឧស្សាហកម្ម វិទ្យាសាស្ត្រ និងនវានុវត្តន៍ ខេត្តសៀមរាប ក្រោមកិច្ចសហការគាំទ្រពីគម្រោងប្រឹក្សានិងដំណោះស្រាយ (Task Program) នៃវិទ្យាស្ថានស្រាវជ្រាវម្ហូបអាហារកូរ៉េ បានរៀបចំសិក្ខាសាលាផ្សព្វផ្សាយស្តីពីភាពជោគជ័យនៃការអនុវត្តគម្រោង Task Program ដំណាក់កាលទី១និងទី២ នៅកម្ពុជានិងការផ្សព្វផ្សាយគម្រោងមជ្ឈមណ្ឌលស្រាវជ្រាវម្ហូបអាហារ សុវត្ថិភាព និងច្បាប់ម្ហូបអាហារនៅក្នុងខេត្តសៀមរាប ដោយការអញ្ជើញចូលរួមពីម្ចាស់ឬតំណាងសហគ្រាសផលិត សិប្បកម្មកែខ្នៃម្ហូបអាហារ មកពីវិទ្យាស្ថានពហុបច្ចេកទេសតេជោសែន សៀមរាប វិទ្យាស្ថានពហុបច្ចេកទេសអង្គរ និងអង្គការដៃគូមួយចំនួនចូលរួមជាច្រើននាក់ផងដែរ។
លោក Kim Youngchan នាយកគម្រោងប្រឹក្សានិងដំណោះស្រាយ និងវិទ្យាស្ថានស្រាវជ្រាវម្ហូបអាហារកូរ៉េ (Task Program and FTC) មានប្រសាសន៍ ថា៖គម្រោងប្រឹក្សានិងដំណោះស្រាយ និងវិទ្យាស្ថានស្រាវជ្រាវម្ហូបអាហារកូរ៉េទទួលបានកិច្ចសហការគាំ ទ្រពីក្រសួងឧស្សាហកម្ម វិទ្យាសាស្ត្រ និងនវានុវត្តន៍របស់កម្ពុជា យើងបានអនុវត្តលើគម្រោងដំណោះស្រាយបច្ចេកទេសផ្នែកម្ហូបអាហារដំណាក់កាលទី១ ចាប់ដំណើរការពីឆ្នាំ២០១៨ដល់ ២០២០ ដោយ ផ្តោតលើគោលដៅរាជធានីភ្នំពេញតែមួយប៉ុណ្ណោះ ជាមួយគ្នានោះ ក្នុងចំណោមសហគ្រាសប្រមាណជា២០០មូលដ្ឋាន យើងបានចំរ៉ាញ់យកចំនួន១២ មូលដ្ឋាន ដោយបានផ្តល់ប្រឹក្សា ផ្លាស់ប្តូរបទពិសោធ ពីគ្នាទៅវិញទៅមក ជួយបណ្តុះបណ្តាលបច្ចេកទេស និងវាយតម្លៃលើគុណភាពនៃការផលិត។ ដោយឡែកសម្រាប់ការអនុវត្តគម្រោង Task Program ដំនាក់កាលទី២ចាប់ផ្តើមពីឆ្នាំ២០២១ ដល់២០២៣ ដោយពង្រីកគោលដៅបន្ថែមទៅបាត់ដំបងនិងសៀមរាប។
លោក អេង រត្នមុនី អនុប្រធាននាយកដ្ឋានសហគ្រាសធុនតូច និងមធ្យម នៃក្រសួងឧស្សាហកម្ម វិទ្យាសាស្ត្រ និងនវានុវត្តន៍ មានប្រសាសន៍ថា៖ ដោយភាពជោគជ័យនៃការអនុវត្តគម្រោង Task Program ទាំងពីរលើកនេះ នៅពេលខាងមុខឆាប់ៗភាគីកូរ៉េ និងបន្តគាំទ្រ និងបង្កើតនូវមជ្ឈមណ្ឌលស្រាវ ជ្រាវម្ហូបអាហារនៅកម្ពុជាដែលនឹងលេចរូបរាងនៅ ពេលខាងមុខ ហើយទោះបីជាគម្រោង នឹងត្រូវបញ្ចប់ក៏ដោយក៏អ្នកជំនាញកូរ៉េ នឹងបន្តការងាររបស់ខ្លួនតាមមជ្ឈមណ្ឌលស្រាវជ្រាវម្ហូបអាហារកម្ពុជា ដែលមាន រយៈពេល៥ឆ្នាំបន្តទៀត ដើម្បីជួយដោះស្រាយបញ្ហាផ្សេងៗពាក់ព័ន្ឋទៅនឹងបច្ចេកទេស ការបង្កើតមុខផលិតផលថ្មីៗ។ល។
លោក អេង រត្នមុនី បញ្ជាក់បន្ថែមថា៖គម្រោង Task Programដំណាក់កាលទី២ បានចាប់អនុវត្តពីឆ្នាំ ២០២១ដល់២០២៣ដោយបានពង្រឹកវិសាលភាពទៅខេត្តបាត់ដំបង ចំនួន៥មូលដ្ឋាន សៀមរាប ៥មូល ដ្ឋាន ដែលចំរ៉ាញ់ចេញពីសហគ្រាសប្រមាណ ៧០ មូលដ្ឋានក្នុងខេត្តនីមួយៗនិងសហគ្រាស២ទៀតនៅរាជធានីភ្នំពេញយកចេញពីការអនុវត្តគម្រោងដំណាក់កាលទី១ ដោយសារសហគ្រាសនេះបានពង្រីកមុខផលិតផលរបស់ខ្លួនដែលតម្រូវឱ្យមានការគាំទ្របន្តពី គម្រោង។
លោក អេង រត្នមុនី បន្តថាគម្រោង Task Program នឹងត្រូវបញ្ចប់នៅចុងឆ្នាំ២០២៣ ចំណែកម្ចាស់សហគ្រាសដែលស្ថិតក្នុងគម្រោងដំណាក់កាលទី២នឹងត្រូវបានអញ្ជើញទៅធ្វើទស្សនកិច្ចសិក្សានិងតាំងពិព័រណ៌ផលិតផលរបស់ខ្លួននៅប្រទេសកូរ៉េ ហេតុនេះសូមបងប្អូននាំគ្នាយកចិត្តទុកដាក់រៀនសូត្រ និងផ្សព្វផ្សាយពីផលិតផលរបស់ប្រទេសយើងសម្រាប់ទីផ្សារកូរ៉េ និង ទីផ្សាពិភពលោកផងដែរ ជាពិសេសខិតខំផលិតនិង កែច្នៃម្ហូបអាហារប្រកបដោយគុណភាព ដើម្បីបង្កើនជំនឿទុកចិត្តដល់ផលិតផលក្នុងស្រុកពីមួយថ្ងៃទៅមួយថ្ងៃឱ្យកាន់តែច្រើនឡើងៗផងដែរ៕
ដោយ ÷ ពន្លឺ
