ខេត្តសៀមរាប ÷ នៅព្រឹកថ្ងៃទី២៥ ខែសីហា ឆ្នាំ២០២៣ នេះគណៈកម្មាធិការជាតិជំរុញចលនាភូមិ១ផលិតផល១ សហគ្រិនខ្មែរ និងអង្គការអុកស្វាម ក្រោមកិច្ចសហការជាមួយរដ្ឋបាល ខេត្ត សៀមរាប បានរៀបចំវេទិកាផ្គូផ្គងរវាងអ្នកផលិត និងអ្នកទិញ និងការតាំងបង្ហាញផលិតផលក្នុងស្រុករយៈពេល៣ថ្ងៃ ចាប់ពីថ្ងៃទី២៥ ដល់ថ្ងៃទី២៧ ខែសីហា ឆ្នាំ ២០២៣ នៅផ្សារម៉ាក្រូសៀមរាប ដើម្បីបង្កើនលទ្ធភាពទទួលបានទីផ្សារសម្រាប់អ្នកផលិតក្នុងស្រុក និងសហគ្រាស ធុនមីក្រូ តូច និងមធ្យម នៅប្រទេសកម្ពុជា ក្រោមវត្តមានរបស់ ឯកឧត្តមបណ្ឌិត សួង ណយ អគ្គលេខាធិការរង គណៈកម្មា ធិការជាតិជំរុញចលនាភូមិមួយផលិតផលមួយ និងលោក យន់ លីនណេ អភិបាលរងនៃគណៈអភិបាល ខេត្ត ជាអនុប្រធានគណៈកម្មាធិការជម្រុញចលនាភូមិមួយផលិតផលមួយខេត្តសៀមរាប ដោយមានតំណាងអាជ្ញាធរខេត្ត និងសភាពាណិជ្ជកម្ម អស់ លោកលោកស្រីជាផលិតករ មកពីបណ្តាខេត្តចំនួន១០ ខេត្ត ព្រមទាំងសហភាពសហព័ន្ធយុវជនកម្ពុជាខេត្ត ប្រតិបត្តិករទេសចរណ៍ និង សិស្សានុ សិស្សផងដែរ ។
មានប្រសាសន៍នោះដែរលោក យន់ លីនណេ អភិបាលរងខេត្ត បានលើកឡើងថា វេទិកាផ្គូផ្គងរវាងអ្នកផលិត និងអ្នកទិញនាពេលនេះនិងសូមថ្លែង អំណរគុណចំពោះគណៈកម្មាធិការជាតិជំរុញចលនាភូមិមួយផលិតផលមួយ នៃទីស្តីការគណៈរដ្ឋមន្ត្រី ដែលបានរៀបចំវេទិកាផ្គូផ្គងរវាងអ្នកផលិត និងអ្នកទិញ និងការតាំងបង្ហាញផលិតផលក្នុងស្រុក ក្រោមគម្រោង ការទទួលបានទីផ្សារសម្រាប់អ្នកផលិតក្នុងស្រុក និងសហគ្រាសធុនមីក្រូ តូច និងមធ្យម ក្នុងគោលបំណង ដើម្បីឲ្យអ្នកផលិត និងអ្នកទិញ បានជួបគ្នានឹងធ្វើបទបង្ហាញពីផលិតផលរបស់ខ្លួន និងការរកទីផ្សារផលិតផលក្នុងស្រុក ព្រម ទាំងការចងក្រងផលិតករ សេវាករ និងសិប្បករ នៅតាមមូលដ្ឋានឱ្យចូលជាសមាជិកចលនាភូមិមួយផលិតផលមួយ និងអង្គភាព-ស្ថាប័នពាក់ព័ន្ធ ដែលជាសមាជិកគណៈកម្មាធិការជាតិជំរុញចលនាភូមិមួយផលិតផលមួយ ។
លោកបានបញ្ជាក់ថា គោលបំណងដូចបានជម្រាប ជូនខាងលើនេះ រដ្ឋបាលខេត្ត ក៏ដូចជាគណៈកម្មាធិការជំរុញចលនាភូមិ១ ផលិតផល១ ខេត្តសៀម រាប និងក្រុមលេខាធិការដ្ឋាន ដែលជាជំនួយការឲ្យគណៈកម្មា ធិការ សូមគាំទ្រ និងចូលរួមផ្សព្វផ្សាយ និងជម្រុញការអនុវត្តចលនាភូមិ១ ផលិតផល១ឲ្យបានជោគជ័យ ដើម្បីរួមចំណែកអនុវត្តគោល នយោបាយរបស់រាជរដ្ឋាភិបាលឲ្យទទួលបាន ជោគជ័យ ។
ឯកឧត្តមបណ្ឌិត សួង ណយ អគ្គលេខាធិការរង គណៈកម្មាធិការជាតិជំរុញចលនាភូមិ១ផលិត ផល១ បានមានប្រសាសន៍ថាតាមការចង្អុលបង្ហាញរបស់សម្តេចតេជោ ហ៊ុន សែន ស្ថាបនិកនៃចលនាភូមិ១ផលិត ផល១ ដោយសម្តេចសុំឱ្យធ្វើការរួមគ្នា (ចង្កឹះមួយបាច់កាច់មិនបាក់) នាំចេញនៅនឹងកន្លែង ដើម្បីឈានទៅការនាំចេញទៅក្រៅ ប្រទេស និងស្របទៅនឹងយុទ្ធសាស្ត្រចតុកោណរបស់រាជរដ្ឋា ភិបាល គោលនយោ បាយអភិវឌ្ឍជាតិផ្សេងៗហើយគណៈកម្មា ធិការជាតិជំរុញចលនាភូមិ១ផលិតផល ១បានចូលរួមចំណែកក្នុងការអភិវឌ្ឍ និងជាពិសេស កាត់បន្ថយភាពក្រីក តាមរយៈការអភិវឌ្ឍផលិតផលភូមិ១ផលិត ផល១ ដើម្បីលើកកម្ពស់ជីវភាពរស់នៅរបស់ប្រជាពលរដ្ឋ និងសហគមន៍ មូលដ្ឋាន។
ឯកឧត្តមបណ្ឌិត សួង ណយ បានបញ្ជាក់ថា ផលិត ផលភូមិ១ផលិតផល១ គឺជាផលិតផលដែលផលិតឡើងដោយប្រជាពលរដ្ឋតាម ភូមិមួយ ឬច្រើន ដោយផលិតផលទាំងនោះឆ្លុះបញ្ចាំងពីលក្ខណៈវប្បធម៌ប្រពៃណីដែលផ្តល់នូវកិត្តិយសកិត្តិនាម និង មោទនភាពចំពោះភូមិឋានដែលខ្លួនរស់នៅហើយផលិតផល ទាំងនោះមានសក្តានុពលអាចពង្រឹង និងពង្រីកទាំងបរិមាណ និងគុណភាពក្នុងការជួយបង្កើនប្រាក់ចំណូលរបស់ប្រជាពលរដ្ឋ និងការ ផលិតនោះបានស្នើសុំចូលជា សមាជិកភូមិ១ផលិត ផល១។
ឯកឧត្តមបណ្ឌិត សួង ណយ ក៏បានលើកឡើងថា កន្លងមកអ្នកផលិតតែងរអ៊ូរទាំថា អត់ទីផ្សារ ហើយអ្នកទិញ ដែលជាអ្នកនៅក្នុងស្រុកដូចគ្នា អ្នកនៅសៀមរាបដូចគ្នាថា អត់ដឹងថានៅខេត្តសៀមរាបផលិតបានអ្វីខ្លះ? ចឹងវេទិការផ្គូផ្គងរវាងអ្នកផលិតនិងអ្នកទិញ មានន័យថានាំអ្នកផលិតនិងអ្នកទិញឲ្យពួកគាត់ជួបគ្នាដើម្បីឲ្យពួកគាត់ជជែកគ្នា ថាអ្នកផលិត ផលិតបានអី ចំនួនប៉ុន្មាន? ហើយអ្នកទិញត្រូវការអ្វី ត្រូវការចំនួនប៉ុន្មាន? ហើយពួកគាត់ជជែក គ្នាដោយផ្ទាល់ដើម្បីសម្រេចបាននូវកិច្ចព្រមព្រៀងមួយ។
ឯកឧត្តម បណ្ឌិត រំពឹងថា នៅតាមបណ្តាខេត្តរាជ ធានីដ៏ទៃទៀត នឹងបើកវេទិការបែបនេះឲ្យបានញឹកញាប់ ព្រោះវានឹងជំរុញឲ្យមានការផលិត និងការប្រើប្រាស់ផលិតផលរបស់ខ្មែរកាន់តែច្រើនផងដែរ៕
ដោយ ÷ ពន្លឺ
