ខេត្តសៀមរាប ÷ សាលាអនុគណក្រុងសៀមរាប សហការជាមួយអាជ្ញាធរខេត្ត មន្ទីរធម្មការនិងសាសនាខេត្ត បានរៀបចំពិធីបំបួសកុលបុត្រ កុលធីតាខ្មែរ ចំនួន ១០២រូប នៅបរិវេណវត្តទេពពោធិវង្ស ស្ថិតក្នុងភូមិត្រពាំងសេះ សង្កាត់គោកចក ក្រុងសៀមរាប មានរយៈពេលមួយអាទិត្យ ចាប់ពីថ្ងៃទី៣០មេសា ដល់ថ្ងៃទី ៥ ខែឧសភា ឆ្នាំ២០២៣ ក្នុងគោលបំណងអប់រំបន្ទុំនិស្ស័យតាមបែបពុទ្ធសាសនា ជាការតបគុណចំពោះមាតាបិតា ចំពោះជាតិ សាសនា ព្រះមហាក្សត្រ និង ចូលរួមប្រារព្ធបុណ្យវិសាខបូជា ដែលជាបុណ្យជាតិនិងអន្តរជាតិផងដែរ ។
ក្នុងបុណ្យវិសាខបូជា និង បំបួសកុលបុត្រកុលធីតានេះ ក្រោមវត្តមាននិមន្ត និង អញ្ជើញចូលរួមពី ព្រះវិជ័យ រងី្ស ឡាច លាង ព្រះរាជាគណៈថ្នាក់កិត្តិយស និងជាព្រះធម្មធរគណខេត្ត និង ជាព្រះគ្រូអនុគណ ក្រុងសៀមរាប និង លោកស្រី យូ សុភា អភិបាលរងខេត្ត តំណាងឲ្យឯកឧត្តម ទៀ សីហា អភិបាលនៃគណៈអភិបាលខេត្ត ដោយមានការនិមន្ត និងអញ្ជើញចូលរួមពីមន្ត្រីសង្ឃ អស់លោកលោកស្រីជាថ្នាក់ដឹកនាំមន្ទីរ អង្គភាព ព្រមទាំងសីលវ័ន្តសីលវន្តី ផងដែរ ។
តាមសង្ឃរាយការណ៍របស់ព្រះសទ្ធម្មប្បកាសនី បណ្ឌិត តាត មហាទី ប្រធានគណៈកម្មការបុណ្យវិសាខបូជា និងបំបួសកុលបុត្រ-កុលធីតា បានឲ្យដឹងថា នេះជាឆ្នាំទី១០ហើយ ដែលកម្មវិធីបួសអបអរបុណ្យវិសាខបូជានៅខេត្តសៀមរាប ។ ក្នុងពិធីបំបួសកុលបុត្រ កុលធីតា ក្នុងថ្ងៃបុណ្យវិសាខបូជានេះ ពិតជាមានសារសំខាន់បំផុត ដើម្បីឆ្លុះបញ្ចាំងពីប្រពៃណីសាសនាផង ដើម្បីឲ្យកុលបុត្រ កុលធីតាខែ្មរ កាន់តែយល់ច្បាស់ពីតម្លៃព្រះពុទ្ធសាសនាផង ។ ម៉្យាងទៀតព្រឹត្តិការណ៍នេះ អាចឲ្យពុទ្ធបរិស័ទទាំងអស់ ចូលរួមអភិវឌ្ឍវិស័យសាសនា ឲ្យមានលំនឹង និងសុក្រឹតភាព តាមព្រះធម៌ រំលឹកឲ្យកូនខ្មែរដឹងពីប្រវត្តិនៃថ្ងៃបុណ្យវិសាខបូជា និង ចូលរួមអនុមោទនាចាប់យកចំណែកបុណ្យកុសលដោយក្តីជ្រះថ្លា ហើយបានក្លាយជាប្រពៃណីមួយសម្រាប់អ្នកខេត្តសៀមរាប ក៏ដូចជាក្លាយជាកម្មវិធីប្រចាំឆ្នាំរបស់ខេត្តផងដែរ ។
មានប្រសាសន៍សំណេះសំណាលជាមួយសមណេ សីលវន្តី លោកស្រី យូ សុភា បានលើកឡើងថា ពិធីបំបួស កុលបុត្រកុលធីតា និង បុណ្យវិសាខបូជានេះ គឺដើមី្បរំលឹកដល់នក្ខត្តសម័យកាលទាំងបី របស់ព្រះសម្មាសម្ពុទ្ធ ទ្រង់ប្រសូត្រ ការយាងត្រាសដឹងនូវសព្វញ្ញូពុទ្ធ ព្រមទាំងកាលដែលព្រះអង្គទ្រង់យាងចូលបរិនិព្វាន្ធ ហើយក៏សម្តែងនូវកតញ្ញូ កតវេទីតា ថ្វាយចំពោះអច្ឆរិយៈបុគ្គលព្រះអង្គ ដែលបានសាងបុណ្យបារមី ដោយលះបង់ព្រះកាយពល និងសេចក្តីសុខ និង ព្រះជន្ម ដើមី្បស្វែង រកព្រះធម៌ បម្រើផលប្រយោជន៍មនុស្សជាតិ នៅលើភពផែនដីនេះ ឲ្យមានសុខសន្តិភាព តាមគន្លងប្រពៃណីព្រះពុទ្ធសាសនាជា រៀងដរាបមក ។
លោកស្រីអភិបាលរងបានបន្តទៀតថា ព្រឹត្តិការណ៍ដ៏អធិកអធមនៅតាមវត្តអារាមទូទាំងប្រទេស ប្រមុខរាជរដ្ឋាភិបាលបានផ្តល់តួនាទីយ៉ាងសំខាន់ដល់ព្រះពុទ្ធសាសនាក្នុងសង្គមខ្មែរ ដោយបានចារិកក្នុងរដ្ឋធម្មនុញ្ញ (ជាសាសនា របស់រដ្ឋ ) ។ ដូច្នេះពុទ្ធសាសនិកម្នាក់ៗតែងតែប្រតិបត្តិ គោរពស្រឡាញ់ចំពោះព្រះពុទ្ធសាសនា និង ចង់ឲ្យវិស័យព្រះពុទ្ធ សាសនានៅតាមទីវត្តអារាមបំពេញ និង បន្តវេននូវតួនាទីរបស់ខ្លួន ដើមី្បឧត្តមប្រយោជន៍ដល់ពុទ្ធបរិស័ទសង្គមជាតិ និង សម្រាប់ជាទីពឹងពំនាក់របស់ពុទ្ធបរិស័ទគ្រប់រូបទៀតផង ។ លោកស្រីបានបញ្ជាក់ថា បុណ្យវិសាខបូជា ជាពិធីបុណ្យជាតិដ៏ធំមួយក្នុងព្រះពុទ្ធសាសនា ហើយការប្រារព្ធពិធីបុណ្យវិសាខបូជា ដើម្បីរំលឹកដល់ព្រឹត្តិការណ៍ពិសេសចំនួន ៣ធំៗ ដូចជា ការប្រសូត ការត្រាស់ដឹង និងការចូលព្រះនិពា្វន ។ ព្រះពុទ្ធមានព្រះនាមថា សិទ្ធត្ថ (អានថា សិត-ធ័ត)។ ព្រះអង្គទ្រង់ប្រសូត នៅថ្ងៃពេញបូណ៌មី ខែវិសាខ មុនគ្រិស្តសករាជ ចំនួន ៦២៣ឆ្នាំ ។ ព្រះអង្គត្រាស់ដឹងជាព្រះពុទ្ធ នៅថ្ងៃពុធ ពេញបូណ៌មី ខែវិសាខ នាវេលាទៀបភ្លឺ ។ ព្រះអង្គ ទ្រង់ចូលបរិព្វាន នៅថ្ងៃអង្គារ ពេញបូណ៌មី ខែវិសាខ នៅពេលដែលព្រះអង្គមានព្រះជន្ម ៨០វស្សា។ ដោយសារតែទ្រង់ប្រសូត ត្រាស់ដឹង និងចូលបរិព្វាន នៅក្នុងថ្ងៃ ១៥កើត ពេញបូណ៌មី ខែវិសាខ ដូចគ្នាគឺខុសតែឆ្នាំតែប៉ុណ្ណោះ ហើយ បុណ្យវិសាខបូជា គឺជាការរំលឹកដល់ថ្ងៃទាំង៣របស់ព្រះអង្គ ។ បើតាមការសិក្សាស្រាវជ្រាវ ឲ្យដឹងថា នៅប្រទេសមួយចំនួន ដូចជាប្រទេសឥណ្ឌា និងប្រទេសស្រីលង្កា ជាដើម ពិធីបុណ្យវិសាខបូជា ត្រូវបានធ្វើតាំងពីប៉ុន្មានរយឆ្នាំ ក្រោយពេលដែលព្រះពុទ្ធបរិនិព្វានម្ល៉េះ ។ ចំណែកនៅប្រទេសកម្ពុជា ទើបតែត្រូវបានធ្វើឡើងនៅឆ្នាំ១៨៥៥ គឺក្នុងរជ្ចកាលព្រះបាទអង្គឌួង តែប៉ុណ្ណោះ ដោយកាលណោះ ពិធីបុណ្យនេះ ធ្វើនៅរាជធានីឧដុង្គ ។ ចំណែកអ្នកដែលបានប្រារព្ធពិធីបុណ្យវិសាខបូជា មុនគេ គឺព្រះសង្ឃ និងពុទ្ធបរិស័ទ ផ្នែកខាងធម្មយុត្តិកនិកាយ ។ លុះដល់រជ្ជកាលព្រះបាទស៊ីសុវត្ថិ (១៩០៤-១៩២៧) ទើបព្រះសង្ឃនិងពុទ្ធបរិស័ទខាង គណៈមហានិកាយ ប្រារព្ធធ្វើជាផ្លូវការរហូតមកដល់សព្វថ្ងៃ ។
ឆ្លៀតក្នុងឱកាសនោះដែរលោកស្រីក៏បានធ្វើការក្រើនរំលឹកដល់ ព្រះសង្ឃ សាមណេ សីលវន្តី និង ពុទ្ធបរិស័ទទាំងអស់ សូមអញ្ជើទៅបោះឆ្នោតឲ្យបានគ្រប់ៗគ្នា ក្នុងការជ្រើសតាំងតំណាងរាស្ត្រ នីតិកាល ទី៧ នៅថ្ងៃ អាទិត្យ ទី ២៣ ខែ កក្កដាឆ្នាំ២០២៣ ដើមី្បរស់នៅក្រោដំបូលសន្តិភាពនៅកម្ពុជាតទៅអនាគត ៕
ដោយ ÷ ពន្លឺ
