ក្រសួងប្រៃសណីយ៍ និងទូរគមនាគមន៍បើកសិក្ខាសាលាស្តីពីការពង្រឹងសមត្ថភាពអនុវត្តការងារដល់មន្ត្រីនៅថ្នាក់មន្ទីរប្រៃសណីយ៍ និងទូរគមនាគមន៍មកពីបណ្តាខេត្តចំនួន១៤ដើម្បីប្រសិទ្ធភាពអនុវត្តការងារ

ខេត្តសៀមរាប ÷ ក្រសួងប្រៃសណីយ៍ និងទូរគមនាគមន៍ បានយកចិត្តទុកដាក់ជាខ្លាំង ក្នុងការអភិវឌ្ឍធនធានមនុស្សទាំងនៅថ្នាក់ជាតិ ក៏ដូចជាថ្នាក់ក្រោមជាតិហើយជាពិសេសគឺ ដើម្បីផ្តល់លទ្ធភាព ឲ្យថ្នាក់ក្រោមជាតិអាចអនុវត្តការងារបានកាន់តែមានប្រសិទ្ធភាពថែមទៀត ជាក់ស្តែងនាព្រឹកថ្ងៃទី២៥ខែមេសាឆ្នាំ២០២៣នេះនៅខេត្តសៀមរាប ក្រសួងប្រៃសណីយ៍និងទូរគមនាគមន៍បានបើកសិក្ខាសាលាបណ្តុះបណ្តាលស្តីពីការពង្រឹងសមត្ថភាពអនុវត្តការងារដល់មន្ត្រីថ្នាក់ក្រោមជាតិ(ជំហ៊ានទី២)ដែលមាន លោក លោកស្រី ប្រធាន អនុប្រធានមន្ទីរ មន្ត្រីរាជការនៃ មន្ទីរប្រៃសណីយ៍និង ទូរគមនាគមន៍ មកពីបណ្តាខេត្តចំនួន១៤ខេត្តចូលរួមជាសិក្ខាកាមប្រមាណចំនួនជាង១០០នាក់  ។

នៅក្នុងពិធីបើកសិក្ខាសាលានេះដែរស្ថិតក្រោមអធិបតីភាព ឯកឧត្តម ខាយ ឃុនហេង រដ្ឋលេខាធិការក្រសួង ប្រៃសណីយ៍ និងទូរគមនាគមន៍ ព្រមទាំងមានការអញ្ជើញចូលរួមពីសំណាក់លោក យុន លីនណេ អភិបាលរងខេត្តសៀមរាប និង ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការក្រសួងប្រៃសណីយ៍ និងទូរគមនាគមន៍ អញ្ជើញចូលរួមផងដែរ ។

លោក សុខ សីហា ប្រធានមន្ទីរមន្ទីរប្រៃសណីយ៍និង ទូរគមនាគមន៍ខេត្តសៀមរាបបានមានប្រសាសន៍ថា ថ្នាក់ដឹកនាំក្រសួងប្រៃសណីយ៍និងទូរគមនាគមន៍ បានសម្រេចជ្រើសរើសយកខេត្តសៀមរាបធ្វើជាម្ចាស់ផ្ទះដើម្បីរៀបចំសិក្ខាសាលាស្តីពី ការពង្រឹងសមត្ថភាពអនុវត្ត ការងារមន្ទីរប្រៃសណីយ៍ និងទូរគមនាគមន៍ (ជំហានទី២)ដល់ ថ្នាក់ដឹកនាំនិងមន្ត្រីរាជការនៃមន្ទីរប្រៃសណីយ៍និងទូរគមនាគមន៍ ដែលអញ្ជើញមកពី ១៤ខេត្តមាន៖ខេត្តសៀមរាប តាកែវ ប៉ៃ លិន ព្រះវិហារ ក្រចេះ ព្រៃវែង ស្ទឹងត្រែង កោះកុង ស្វាយរៀង កែប កំពង់ឆ្នាំង មណ្ឌលគិរី រតនគិរី និងខេត្តកណ្តាល ចូលរួមសិក្ខាសាលាដើម្បីទទួលយកចំណេះដឹងនិងបទពិសោធន៍ថ្មីៗពីគ្រូឧទ្ទេស វាគ្មិន ដើម្បីលើកកម្ពស់សមត្ថភាព ដើម្បីបំពេញការងារទាំងអស់គ្នាឱ្យកាន់តែមានប្រសិទ្ធភាពខ្ពស់និងដើម្បីអនុវត្តតួនាទីនិងភារកិច្ចរបស់ខ្លួនអោយ បានកាន់តែល្អប្រសើរ។

លោក យុន លីនណេ អភិបាលរងខេត្តសៀមរាបបានថ្លែងថា វិស័យប្រៃសណីយ៍ និងទូរគមនាគមន៍ ក្នុងខេត្តសៀមរាប យើងមានការរីកចម្រើន គួរឱ្យកត់ សម្គាល់ដោយរយ:ពេលកន្លងមក យើងបានសហការជាមួយអ្នកពាក់ព័ន្ធ បានចុះរៀបចំសោភ័ណភាព សណ្តាប់ធ្នាប់ និងរបៀបរៀបរយសាធារណ: បណ្តាញ ខ្សែអាកាសក្នុងក្រុងសៀមរាប។ លោកបន្តទៀតថា ចំពោះវិស័យទូរគមនាគមន៍ គឺជាវិស័យមួយ ដ៍សំខាន់មិនអាចខ្វះបានក្នុងយុគសម័យនេះ ដែលជាចលករដើម្បី ឈានទៅរដ្ឋាភិបាល ឌីជីថល ដែលយើងបានគិតគួរផងដែរ។ ដោយ ឡែក ចំពោះវិស័យសេវាទូរស័ព្ទមានវិសាលភាពគ្របដណ្តប់ទូទាំង ខេត្តសៀមរាបក្នុងនោះ សេវាទូរស័ព្ទ និងអ៊ិនធឺណេតមានការរីក ចម្រើនគួរឱ្យកត់សំគាល់ និងទទួលបានការគាំទ្រពីមជ្ឈដ្ឋានប្រជាពលរដ្ឋទូទៅ ដោយនៅក្នុងក្រុងសៀមរាបខ្សែអ៊ិនធឺណិតបានដាក់ចូលក្នុងបំពង់ក្រោមដីនៅលើផ្លូវសំខាន់ៗ ហើយ ជាមួយគ្នានោះសេវាទូរស័ព្ទក្នុងខេត្តសៀមរាប ឃើញថាមានភាពល្អប្រសើរជាងមុនច្រើនដែលកន្លែងទីប្រជុំជនយើងឃើញមានសេវាល្អគ្រប់ក្រុមហ៊ុនតែទោះជាយ៉ាងនេះក្តីក៏នៅមានតំបន់មួយចំនួន ដែលពុំទាន់មានសេវាទូរស័ព្ទ និងអ៊ិនធឺណេតគ្រប់គ្រាន់គឺផ្នែកខ្លះនៃស្រុក វ៉ារិន ស្រុកស្វាយលើ និងស្រុកជីក្រែងខេត្តសៀមរាប និងតំបន់ ទេសចរណ៍ដាច់ស្រយាលមួយចំនួន និងសហគមន៍ទេសចរណ៍ជាច្រើនទៀត ដោយខេត្តសៀមរាប ជាគោលដៅទេសចរណ៍ដ៏សំខាន់ក្នុងចំណោម ខេត្តនានានឹងស្របពេល ដែលបច្ចេកវិទ្យាមានការរីកចំរើនសេវាទូរសព្ទ និងសេវាអ៊ិនធឺណេតពិតជាមានសារសំខាន់មិនអាចខ្វះបាន។

ក្នុងឱកាសនោះដែរ ក្នុងនាមក្រុមប្រឹក្សាខេត្ត និងក្នុងនាមគណៈអភិបាលខេត្ត លោក យុន លីនណេ ក៏បានមានប្រសាសន៍សំណូមពរដល់ក្រសួងប្រៃណីយ៍និងទូរគមនាគមន៍ ក៏ដូចជាក្រសួងពាក់ព័ន្ធចូលរួមសហ ការដោះស្រាយលើតំបន់ ទេសចរណ៍ដាច់ស្រយាលនានា ដែលពុំទាន់មានសេវាទូរស័ព្ទ និង អ៊ិនធឺណេតគ្រប់គ្រាន់ ជូនភ្ញៀវជាតិ-អន្តរជាតិ ដែលមកទស្សនា កម្សាន្ត នៅខេត្តសៀមរាប និងប្រជាពលរដ្ឋកំពុងរស់នៅក្នុងមូលដ្ឋានផ្ទាល់ផងដែរ ។ ឯកឧត្តម ខាយ ឃុនហេង រដ្ឋលេខាធិការក្រសួង ប្រៃសណីយ៍ និងទូរគមនាគមន៍ បានមានប្រសាសន៍អោយដឹងថាការបើកសិក្ខាសាលាបណ្តុះបណ្តាលស្តីពីការពង្រឹងសមត្ថភាពអនុវត្តការងារដល់មន្ត្រីថ្នាក់ក្រោមជាតិ នាពេលនេះគឺក្នុងគោលបំណងបង្កើនភាពស្និតស្នាល រវាងមន្ត្រីថ្នាក់ជាតិនិងថ្នាក់ក្រោមជាតិនិងធ្វើ ឲ្យមន្ត្រីថ្នាក់ក្រោមជាតិអាចចាប់ យកព័ត៌មាន ចំណេះដឹង ការយល់ដឹងថ្មីៗ បានត្រឹមត្រូវបន្ថែមជាប្រចាំថ្ងៃឲ្យទាន់បច្ចុប្បន្នភាពវិវត្តជឿនលឿន នៃបច្ចេកវិទ្យាសម័យថ្មី ឲ្យមន្ត្រីថ្នាក់ក្រោម ជាតិអនុវត្តតួនាទី និងភារកិច្ចដែលក្រសួងបានប្រគល់ជូន មានភាពច្បាស់លាស់ និង ផ្តល់គន្លឹះ និងបទពិសោធន៍ ដើម្បីដោះស្រាយប្រកបដោយការច្នៃប្រឌិត និងមានប្រសិទ្ធភាពចំពោះរាល់បញ្ហាប្រឈមនានា មានចំពោះមុខ ដែលមន្ទីរ ប.ទ.កំពុងជួបប្រទះសព្វថ្ងៃ។ ឯកឧត្តម បានបន្តទៀតថា សិក្ខាសាលាក្នុងថ្ងៃនេះ គឺឆ្លុះបញ្ចាំងឲ្យឃើញនូវសារៈសំខាន់ នៃសន្តិសុខបច្ចេកវិទ្យាគមនាគមន៍ដែលមិនមែនតែនៅក្នុងកម្ពុជាប៉ុណ្ណោះទេ ក៏ប៉ុន្តែថែមទាំងថ្នាក់តំបន់ និងសកលលោកផងដែរ ។

ឯកឧត្តមបន្ថែមទៀតថា រាជរដ្ឋាភិបាលកម្ពុជាបានទទួលស្គាល់ នូវការរីកចំរើន ដ៏ខ្លាំងក្លានៃបច្ចេកវិទ្យា ក៏ដូចជាការវិវឌ្ឍនៃទីផ្សារ និងសេដ្ឋកិច្ចនៅក្នុងវិស័យបច្ចេកវិទ្យាគមនាគមន៍ និងព័ត៌មាន ដែលបានជម្រុញនូវ ផលិតភាព ដែលអាចធ្វើឲ្យប្រសើរឡើងនូវការរស់នៅរបស់ប្រជារាស្រ្តកម្ពុជា។ បច្ចេកវិទ្យាគមនា គមន៍ និងព័ត៌មាននៅតែបន្តជាចលករសំខាន់មួយនាថ្ងៃអនាគត ស្របពេលដែលកម្ពុជាបានកំពុងប្រឹងប្រែងបំលែងខ្លួនឯងទៅជាសេដ្ឋកិច្ចឌីជីថល ។ ក្នុងខណៈពេលដែល វិស័យបច្ចេកវិទ្យាគមនាគម នាគមន៍ និងព័ត៌មាន បាននាំមកនូវឱកាសថ្មីៗ វាក៏បាននាំមកនូវភាពងាយរងគ្រោះថ្មីៗផងដែរ ។ ជាសកលការគំរាមគំហែងតាមប្រព័ន្ធអ៊ីនធឺណិតកាន់តែមានភាពស្មុគស្មាញ ហើយផលប៉ៈពាលកាន់តែធ្ងន់ធ្ងរផងដែរ ។

ឯកឧត្តមបានបន្តទៀតថា សិក្ខាសាលានេះនឹងផ្តល់ជាចំណេះដឹងដល់អស់លោក លោកស្រីមកពី ១៤នៃមន្ទីរប្រៃសណីយ៍និងទូរគមនាគមន៍ខេត្តពេលនេះ ឲ្យកាន់តែយល់ដឹងអំពីហានិភ័យនានាដែលអាចកើតមានឡើងចំពោះប្រព័ន្ធឌីជីថល និងការគំរាមគំហែង , យល់ដឹងអំពីប្រភេទនៃការវាយប្រហារដែលអ្នកអាច ជួបប្រទៈ និងស្វែងយល់ដឹងអំពីវិធីសាស្ត្រក្នុងការស្វែងរកនូវចំនុចខ្សោយ និងការជួសជុល , យល់ដឹងអំពីច្បាប់ គោលនយោបាយ និងបទដ្ឋានគតិយុត្តិនានាពាក់ព័ន្ធទៅនឹងសន្តិសុខបច្ចេកវិទ្យា គមនាគមន៍ និងព័ត៌មានរបស់កម្ពុជា ។ ក្នុងនោះដែរ ឯកឧត្តមរដ្ឋលេខាធិការ ក៏បានទទួលស្គាល់នូវកង្វះខាតមួយចំនួន ដែលអាជ្ញាធរខេត្តលើកឡើង និង រាល់សំណូមពររបស់មន្ទីរប្រៃសណីយ៍និងទូរគមនាគមន៍ខេត្តលើកឡើង ព្រមទាំងបានផ្តាំផ្ញើឲ្យអ្នកចូលរួមទាំងអស់ ក្នុងអង្គសិក្ខាសាលា ធ្វើការប្រឹងប្រែងទាញយកចំណេះដឹង និងបទពិសោធន៍ឲ្យបានច្រើនពីអ្នកជំនាញដែលបានមកបង្ហាត់បង្ហាញក្នុងពេលនេះផងដែរ ៕

ដោយ ÷ ពន្លឺ