ខេត្តសៀមរាប ÷ នៅព្រឹកថ្ងៃទី៨ ខែមករា ឆ្នាំ២០២៣ ឯកឧត្តមបណ្ឌិត ស៊ាន បូរ៉ាត រដ្ឋលេខាធិការក្រសួង អបរំ យុវជននិងកីឡា អនុប្រធានអង្គភាពប្រឆាំងអំពើពុករលួយ និងជាប្រធានក្រុមការងាររាជរដ្ឋា ភិបាល ចុះមូលដ្ឋានស្រុកស្រីស្នំ ខេត្តសៀមរាប រួមជាមួយប្រតិភូអមដំណើរនិងក្រុមការងារចុះជួយមូល ដ្ឋានស្រុកស្រីស្នំ បាននាំយកកុំព្យួទ័រចំនួន៧ គ្រឿងនិងម៉ាស៊ីនព្រីនធឺរចំនួន៧គ្រឿងប្រគល់ជូនគណ:គ្រប់គ្រងនៃវិទ្យាល័យ២៨មករា សម្រាប់បំពេញបន្ថែមលើការខ្វះខាត និងចាំបាច់ក្នុងការ សិក្សារៀនសូត្រ និងបណ្ដុះបណ្ដាលដល់សិស្សានុសិស្ស ផ្នែកបច្ចេក វិទ្យាព័ត៌មានវិទ្យា ស្របតាមគោលនយោបាយរបស់រាជរដ្ឋាភិបាលដែលបានប្រកាន់ខ្ជាប់ជារដ្ឋាភិបាល ឌីជីថល ។ សម្ភារៈនេះ ជាអំណោយសប្បុរសធម៌របស់សមាគមលើកកម្ពស់ពលករនិងអតីតពលករដើម្បីសប្បុរសធម៌ ផ្តល់តាមរយៈក្រសួងអប់រំដើម្បីចូលរួមចំណែកជាមួយរាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃនិងប៉ិនប្រសព្វរបស់សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រី ខណៈដែលសមាគមនេះបានចូលរួមការងារសង្គមនិងការងារមនុស្សធម៌ជាច្រើនក្នុងការជួយលើកកម្ពស់ជីវភាពរស់នៅរបស់ប្រជាជនកម្ពុជាទៅតាមលទ្ធភាពដែលអាចធ្វើបាន ជាពិសេសនៅខេត្តគោលដៅចំនួនពីរគឺកំពង់ធំ និងខេត្តសៀមរាប។
ឯកឧត្តមបណ្ឌិតស៊ាន បូរ៉ាត បានជំរុញលើកទឹកចិត្តដល់ប្អូនៗជាសិស្សានុសិស្ស ទោះជាសិក្សាលើជំនាញអ្វីក៏ដោយត្រូវកំណត់គោលដៅឱ្យបានពិតប្រាកដ ដើម្បីឆ្លើយតបបានទៅនឹងប្រសិទ្ឋិភាពនៃចំណង់ចំណូលចិត្តរបស់ខ្លួនសម្រាប់ជាត្រីវិស័យ ជាផែនការអភិវឌ្ឍគោលដៅជីវិត។
ឯកឧត្តម មានប្រសាសន៍ថា៖សញ្ញាបត្រប្រឡង គ្រាន់តែជាឯកសារតឹកតាង បញ្ជាក់អំពីការខិតខំប្រឹងប្រែងរៀនសូត្រ តែការកំណត់គោលដៅជីវិតច្បាស់លាស់ ទើបអាចសម្រេចបំណងរបស់ខ្លួនដែលចង់បាន បើទោះជាគោលដៅនោះ ទទួលជោគជ័យឬមិនទទួលបានជោគជ័យក្តី តែវាជាការបង្ហាញពីតាំងចិត្តច្បាស់លាស់របស់យើងម្នាក់ៗដែរ។ ឯកឧត្តម ស៊ាន បូរ៉ាត បានផ្តាំផ្ញើនិងជំរុញដល់យុវសិស្សទាំងអស់ត្រូវបន្តការអនុវត្តដោយយកចំណុចខ្លាំងនិងចំណុចខ្សោយនៃការសិក្សារបស់ខ្លួនមកប្រៀបធៀប បើដឹង ថាខ្សោយផ្នែកណាយើងត្រូវសិក្សាផ្នែកនោះបន្ថែម។ បន្ថែមពីនេះត្រូវស្គាល់អំពីតម្លៃនៃបច្ចេកវិទ្យា និងក្តាប់ យកឱកាសជោគជ័យកុំឱ្យរបូតដោយសារការធ្វេសប្រហែសរបស់ខ្លួន។
ឯកឧត្តម បានលើកផងដែរថា៖រាជរដ្ឋាភិបាលកម្ពុជា បានចាត់ទុកយុវជន គឺជាធនធានដ៏មានតម្លៃបំផុតសម្រាប់ចូលរួមអភិវឌ្ឍសេដ្ឋកិច្ច សង្គមកិច្ច វប្បធម៌ បរិស្ថាន និងជាកម្លាំងចលករដ៏សំខាន់ ដើម្បីរក្សាបាន នូវកំណើនសេដ្ឋកិច្ចជាតិទាំងពេលបច្ចុប្បន្ន និងអនាគត។ ថ្មីៗនេះរាជរដ្ឋាភិបាលកម្ពុជាបាន អនុម័ត លើ “ក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥” សម្រាប់ដាក់ចេញនូវចក្ខុវិស័យវែងឆ្ងាយ ក្នុងការកសាងសេដ្ឋកិច្ច និងសង្គម ឌីជីថលរស់រវើក តាមរយៈការរៀបចំមូល ដ្ឋានគ្រឹះជំរុញការទទួលយក និងការធើ្វបរិវត្តកម្មឌីជី ថលនៅក្នុងគ្រប់តួអង្គសង្គម ទាំងរដ្ឋ ពលរដ្ឋ និងធុរជន ដើម្បីជំរុញសន្ទុះកំណើនសេដ្ឋកិច្ចថ្មី និងលើកកម្ពស់សុខុមាលភាពសង្គម ដោយផ្អែកលើគន្លង “ប្រក្រតីភាពថ្មី”។
បើតាមរបាយការណ៍ លោក ហុង អេងគាំង នាយកវិទ្យាល័យ ២៨មករាថា៖វិទ្យាល័យនេះ បានចាប់ដំណើរកម្រិតវិទ្យាល័យនៅឆ្នាំសិក្សា២០០៧ -២០០៨។ បច្ចុប្បន្ន មានអគារចំនួន៧ខ្នង មានអន្តេវាសិកដ្ឋាន៣ខ្នងនិងទីចាត់ការ១ខ្នង មានសិស្សសរុបចំនួន១៦៦៨នាក់ស្រីជាង៨០០នាក់៕
