ខេត្តសៀមរាប ÷ អស់រយៈពេល២៨ឆ្នាំចុងក្រោយនេះគឺចាប់ពីឆ្នាំ១៩៩៤ដល់២០២២នេះរាជរដ្ឋាភិបាលប្រទេស ជប៉ុនបានផ្ដល់ថវិកាចំនួន២៨.៥៩៤.២៧៥ ដុល្លារអាមេរិកសម្រាប់ការអភិវឌ្ឍន៍គម្រោងអភិរក្សប្រាសាទបាយ័ន និងថវិកាចំនួន៥២០.៨៤៧ដុល្លារដើម្បីទិញយានយន្ដនិងម៉ាស៊ីនធន់ធ្ងន់ព្រមទាំងសម្ភារៈសម្រាប់ការរក្សាលំនឹងតួប៉មនៃប្រាសាទបាយ័ន។
លោកបណ្ឌិត តាគីស៊ិ ណាកាហ្គាវ៉ា(TAKESHI NAKAGAWA) សហប្រធានជប៉ុន អប្សរា សម្រាប់ការអភិរក្សអង្គរ មានប្រសាសន៍នៅក្នុងកិច្ចប្រជុំពេញអង្គ នៃគណៈកម្មាធិការអន្ដរជាតិអាយស៊ីស៊ីអង្គរនាថ្ងៃទី១៦ខែធ្នូឆ្នាំ២០២២នេះថា អង្គការយូណេស្កូបានធ្វើការយ៉ាងជិតស្និទ្ធជាមួយ គម្រោង JAPAN-APSARA សម្រាប់អភិរក្សប្រាសាទបាយ័ន (JASA) ដែលមានអ្នកជំនាញបច្ចេកទេសមកពីសាកលវិទ្យាល័យវ៉ាសិដា និងអាជ្ញាធរជាតិអប្សរា បានធ្វើការងារបុរាណវិទ្យានេះ ទៅលើការជួសជុល និងអភិរក្សនៅប្រាសាទបាយ័ន ដែលមានរយៈពេល២៨ ឆ្នាំមកហើយ។
លោកបន្ដថា គម្រោង “អភិរក្សប្រាសាទបាយ័ន” ចែកចេញជា ៦ដំណាក់កាល គឺដំណាក់កាលទី១ (វិច្ឆិកា១៩៩៤-កញ្ញា ១៩៩៩) ដំណាក់កាលទី២ (ឧសភា១៩៩៩ មេសា២០០៥) ដំណាក់កាលទី៣ (មិថុនា២០០៥-សីហា ២០១១) ដំណាក់កាល ទី៤(កុម្ភៈ២០១២-មិថុនា២០១៨)ដំណាក់កាល ទី៥(កក្កដា២០១៨-មីនា២០២២) និងដំណាក់កាលទី៦ (មេសា២០២២ដល់បច្ចុប្បន្ន)។
តាមរយៈជំនួយបច្ចេកទេសរបស់អង្គការយូណេស្កូ គម្រោងនេះបានដើរតួយ៉ាងសំខាន់ក្នុងការកសាងសមត្ថភាពរបស់បុគ្គលិកការដ្ឋាននិងអ្នកជំនាញកម្ពុជា ក្នុងវិស័យអភិរក្ស បេតិកភណ្ឌវប្បធម៌តាមរយៈការជំរុញឱ្យមានការផ្ទេរសមត្ថភាពរវាងក្រុមការងារជប៉ុន និងក្រុមអជ្ញាធរជាតិអប្សរា ដើម្បីដោះស្រាយបញ្ហាប្រឈមនានាដែលជួបប្រទះនៅប្រាសាទបាយ័ន និងផ្នែកបុរាណវិទ្យាផ្សេងៗទៀតនៅទូទាំងប្រទេសកម្ពុជា ។
លោកបានបន្ដថា រដ្ឋាភិបាលជប៉ុនបានផ្ដល់ថវិកាសរុប ២៨ .៥៩៤.២៧៥ដុល្លារអាមេរិកសម្រាប់អនុវត្តគម្រោងនេះ ចាប់តាំងពីឆ្នាំ១៩៩៤មក។លើសពីនេះ រដ្ឋាភិបាលជប៉ុន ក៏បានសម្រេចផ្ដល់ជំនួយហិរញ្ញប្បទានបន្ថែម ៥២០ .៨៤៧ដុល្លារអាមេរិកដល់រាជរដ្ឋាភិបាលកម្ពុជា តាមរយៈមូលនិធិសមភាគីជប៉ុនសម្រាប់បាយ័ន ដើម្បីទិញយានយន្តនិងម៉ាស៊ីនធុនធ្ងន់ ព្រមទាំងសម្ភារៈសម្រាប់ការងាររក្សាលំនឹងតួប៉មកណ្ដាលនៃប្រាសាទបាយ័ន។
លោកបណ្ឌិត តាគីស៊ិ ណាកាហ្គាវ៉ា បានបញ្ជាក់ថា សមិទ្ធិផលសំខាន់ៗចាប់តាំងពីឆ្នាំ១៩៩៤រួមមាន ៖ ដំណាក់ទី១ ជួសជុលបណ្ណាល័យខាងជើងប្រាសាទបាយ័ន ដំណាក់កាលទី២៖អភិរក្ស និងជួសជុលបណ្ណាល័យខាងជើងក្នុង បរិវេណខាងក្រៅនៃប្រាសាទអង្គរវត្ត និងប្រាសាទស៊ូព្រ័ត និងបង្កើតផែន ការមេបាយ័ន។ ដំណាក់កាលទី៣៖ជួសជុលបណ្ណាល័យខាងត្បូងប្រាសាទបាយ័ន។ ដំណាក់កាលទី៤៖កែលម្អ អភិរក្ស និងជួសជុលប៉ម ៥៥ និង ៥៧ ដែលជាផ្នែកមួយនៃការកែលម្អសោភ័ណភាពតួប្រាសាទបាយ័នមុខ បែរទៅទិសខាងកើត។ ដំណាក់កាលទី៥៖កែលម្អ អភិរក្ស និងជួសជុលប៉ម៦៩និង ថែវ៧០ ដែលជាផ្នែកមួយនៃការកែលម្អសោភ័ណភាពតួប្រាសាទបាយ័នមុខ បែរទៅទិសខាងកើត។លោកបន្ថែមថា លទ្ធផលនៃការស្រាវជ្រាវនិងការវាយតម្លៃតាមបែបវិទ្យាសាស្ត្រជាបន្តបន្ទាប់នៅក្នុងដំណាក់កាលទី១-៥បានបង្ហាញថា លំនឹងតួប៉មកណ្តាលទាមទារឱ្យមានអន្តរាគមន៍បច្ចេកទេសយ៉ាងទូលំទូលាយ។ ចំណែកដំណាក់កាលទី៦ ផ្តោតលើការអន្តរាគមន៍ផ្នែកជារូបវន្ដដើម្បីធ្វើឱ្យមានលំនឹងដល់តួប៉មកណ្ដាល ព្រមទាំងព្យាយាមកំណត់វិធីសាស្ត្រ អភិរក្ស សមរម្យសម្រាប់ចម្លាក់លៀននៃថែវខាងក្នុង។ លើសពីនេះការកែលម្អសោភ័ណភាពតួប្រា សាទបាយ័នមុខបែរទៅទិសខាងកើត(ផ្នែកខាងជើង) ក៏នឹងត្រូវបានអនុវត្តផងដែរដោយផ្តោត លើប៉ម ៦៩។គម្រោងនេះនឹងបន្តពង្រឹងសមត្ថភាពអ្នកជំនាញកម្ពុជាក្នុងការអភិរក្សនិងគ្រប់គ្រងបេតិកភណ្ឌដើម្បីម្ចាស់ការទាំងស្រុងលើការងារអភិរក្សនិងជួសជុលប្រាសាទបាយ័ននាពេលអនាគតនិងអនុវត្តជំនាញដែលទទួលបានក្នុងការងារអភិរក្សរមណីយដ្ឋានផ្សេងៗទៀត ក្នុងតំបន់អង្គរនិងទូទាំងប្រទេសកម្ពុជា៕
