ខេត្តសៀមរាប ÷ នៅថ្ងៃទី ០២ ខែធ្នូ ឆ្នាំ២០២២ មន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តសហការជាមួយរដ្ឋបាលស្រុកបន្ទាយស្រីនិងមន្ត្រីអនុវត្តកម្មវិធីអនុវិស័យរដ្ឋបាលដីធ្លី បានរៀបចំ បិទផ្សាយជាសាធារណៈនូវឯកសារនៃការវិនិច្ឆ័យក្បាលដីចំនួន៧៣១ក្បាលដី សម្រាប់តែក្បាលដីពាក់ព័ន្ឋក្នុងអនុក្រឹត្យលេខ ១៥៥ អនក្រ.បក ចុះថ្ងៃទី ២២ ខែកក្កដា ឆ្នាំ ២០២២ស្ថិតនៅភូមិតានី ឃុំរុនតាឯក ស្រុកបន្ទាយស្រី ខេត្ដសៀមរាបតែប៉ុណ្ណោះ។
លោក ប៊ូ ជុំសម្បត្តិ អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្ត មានប្រសាសន៍ថា ក្បាលដីចំនួន៧៣១ក្បាលដីនេះ អនុវត្តតាមការចុះបញ្ចីដីធ្លីមានលក្ខណៈជាប្រព័ន្ឋរបស់កម្មវិធីអនុវិស័យរដ្ឋបាលដីធ្លីដែលគាំទ្រថវិកាដោយរាជរដ្ឋាភិបាល កម្ពុជា ក្រោមការដឹកនាំរបស់ក្រសួងរៀបចំដែនដី នគរូបនីយកម្ម និងសំណង់ អនុវត្តការងារដោយមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ដោយមានកិច្ចសហការ ពីអាជ្ញាធរដែនដី ជាពិសេសតាមការចង្អុលបង្ហាញរបស់ឯកឧត្តម អភិបាលនៃគណៈអភិបាលខេត្តសៀមរាប ហើយការអនុវត្តនីតិវិធីការកសាងប្លង់សុរិយោដី និងសៀវភៅគល់បញ្ជីដីធ្លីដើម្បីធានាបាននូវសុវត្ថិភាពក្នុងការកាន់កាប់ដីធ្លីរបស់ប្រជាពលរដ្ឋតាមរយៈការចេញវិញ្ញាបនបត្រសម្គាល់ម្ចាស់អចលនវត្ថុ(ប័ណ្ណកម្មសិទ្ឋិ)ជូនដល់ប្រជាពលរដ្ឋខ្មែរ។
លោកអនុប្រធានមន្ទីរ បានមានប្រសាសន៍បញ្ជាក់ថា ៖ការបិទផ្សាយជាសាធារណៈនូវឯកសារនៃការវិនិច្ឆ័យមានរយៈពេល១៥ថ្ងៃចាប់ពីថ្ងៃទី០២ដល់ថ្ងៃទី១៦ខែធ្នូឆ្នាំ២០២២គិតទាំងថ្ងៃបុណ្យនិងថ្ងៃឈប់សម្រាក ដែលមានទីតាំងនៅក្នុងបរិវេណផ្ទះគំរូ ក្នុងភូមិតានី អាស្រ័យហេតុនេះ សូមបងប្អូនប្រជាពលរដ្ឋដែលជាម្ចាស់ដី និងអ្នកកាន់កាប់ដីព្រមទាំងស្ថាប័ននិងអង្គភាពពាក់ព័ន្ឋទាំងអស់មកពិនិត្យផ្ទៀងផ្ទាត់មើលទិន្នន័យឱ្យបានគ្រប់ៗគ្នា ជាពិសេសផ្ទៀងផ្ទាត់នៅលើឈ្មោះម្ចាស់ដី ដោយត្រូវផ្ទៀងផ្ទាត់ឈ្មោះ សាវតា ទំហំដី ប្រភេទទ្រព្យ និងត្រូវពិនិត្យផងដែរនៅ លើប្លង់សុរិយោដីនូវទីតាំងដីនិងរូបរាងដី ព្រោះនេះជាឱកាសចុងក្រោយដែលបងប្អូននិងអ្នកពាក់ព័ន្ឋទាំងអស់មានសិទ្ឋិធ្វើការកែតម្រូវឬជំទាស់តវ៉ាក្នុងករណីដែលពិនិត្យទៅឃើញថាមានកំហុសឆ្គង ជូនមកគណៈកម្មការរដ្ឋបាលពិនិត្យនិងកែតម្រូវជូនទាំងនេះមានសារៈសំខាន់ណាស់ដើម្បីធានាបានភាពសុក្រឹត្យត្រឹមត្រូវក្នុងការចេញវិញ្ញាបនបត្រសម្គាល់ម្ចាស់អចលនវត្ថុ ។
ក្នុងនោះដែរ លោក ភន់ សុខុម អភិបាលស្ដីទី ស្រុកបន្ទាយស្រី បានមានប្រសាសន៍បន្ថែមថា ការចុះបញ្ជីដីមានលក្ខណៈជាប្រព័ន្ធ ដើម្បីសំរេចបានដល់ការចេញវិញ្ញាបនបត្រសម្គាល់ម្ចាស់អចលនវត្ថុ (ប័ណ្ណកម្មសិទ្ធិ) នីមួយៗ គឺមានការងារច្រើនណាស់ដែលទាមទារនូវការខិតខំប្រឹងប្រែងរបស់មន្ត្រីជំនាញ និងការចូលរួមពីសំណាក់ ប្រជាពលរដ្ឋជាម្ចាស់ដី ឬនិងអ្នកកាន់កាប់ដីទាំងអស់រួមទាំងមន្ទីរនិងស្ថាប័នពាក់ព័ន្ធហើយពិសេសគឺ អាជ្ញាធរមូលដ្ឋានត្រូវមានកិច្ចសហការល្អជាមួយនឹងមន្ត្រីជំនាញដោយជួយធ្វើការបញ្ជាក់ឯកសារមួយចំនួនដែលពាក់ព័ន្ធនឹងអត្តសញ្ញាណ ម្ចាស់ដី អត្តសញ្ញាណក្បាលដី និងជួយធ្វើការផ្សព្វផ្សាយអោយដល់ប្រជាពលរដ្ឋដែលជាម្ចាស់ ដី ឬអ្នកកាន់កាប់ដី មកចូលរួមក្នុងការពិនិត្យផ្ទៀងផ្ទាត់ក្បាលដីរបស់ខ្លួនអោយបានគ្រប់គ្នាក្នុងកំឡុងពេលបិទផ្សាយនេះ ដើម្បីធានាបាននូវភាពសុក្រឹត្យត្រឹមត្រូវក្នុងការចេញវិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋក្លាយខ្លួនជាម្ចាស់ដីពិតប្រាកដ និងមានសិទ្ធិពេញលេញក្នុងការចាត់ចែង ។
លោក ភន់ សុខុម បានមានប្រសាសន៍បន្ថែមទៀតថាជាលទ្ធផល រដ្ឋ និងប្រជាពលរដ្ឋជាម្ចាស់ដី ឬនិងអ្នកកាន់កាប់ដី ទទួលបាននូវសារៈប្រយោជន៍ដូចជា ៖ រដ្ឋគ្រប់គ្រងបានដីធ្លី ទាំងដីរដ្ឋ និងដីឯកជន ដែលធ្វើអោយរដ្ឋមានការងាយស្រួលក្នុងការងាររៀបចំ ដែន ដីរដ្ឋបាលដីធ្លី ការបែងចែកដី ការលើកស្ទួយកំរិតជីវភាពរស់នៅរបស់ប្រជាពលរដ្ឋ និងការកាត់បន្ថយទំនាស់ដីធ្លី ធានាសុវត្ថិភាពក្នុងការកាន់កាប់ដីធ្លីរបស់ប្រជាពលរដ្ឋ ទទួលបាននូវសិទ្ធិស្របច្បាប់ ក្លាយជាម្ចាស់ដីពិតប្រាកដ ដែលត្រូវបានការពារដោយច្បាប់ និងធានាដោយរដ្ឋ ដែលអាចធ្វើការបង្កបង្កើនផល ឬប្រកបមុខរបរផ្សេងៗទៀតលើដីធ្លីរបស់ខ្លួនដោយគ្មានការព្រួយបារម្ភ និងអាចប្រើប្រាស់វិញ្ញាបនបត្រសម្គាល់ម្ចាស់អចលនវត្ថុ ដើម្បីផលប្រយោជន៍ផ្សេងៗក្នុងការប្រកបមុខរបរឬអាជីវកម្មរបស់ខ្លួនផងដែរ៕
ដោយ ÷ ពន្លឺ
