ទីក្រុងញ៉ូយក ៖ សម្តេចនាយករដ្ឋមន្ត្រីហ៊ុន សែន ថ្លែងនៅអង្គការសហប្រជាជាតិដោយបង្ហាញពីក្តីកង្វល់ចំពោះ ការកើនឡើងជម្លោះហិង្សាអូសបន្លាយ និងវិបត្តិមនុស្សធម៌ដែលលោកថា មិនធ្លាប់កើតមាន កាលពីមុននោះទេ។
ថ្លែងនៅអង្គការសហប្រជាជាតិកាលពីម្សិលមិញសម្តេច ហ៊ុន សែន ថាពិភពលោកបច្ចុប្បន្ន កំពុងជួបប្រទះអស្ថិរភាពកាន់តែធ្ងន់ធ្ងរ ហើយការគំរាមកំហែង ចំពោះសន្តិភាពក៏កើតមាន ច្រើនសណ្ឋានដែរគឺលោកថា ច្រើនជាងអ្វីដែលធ្លាប់កើតមានរយៈពេល២៥ឆ្នាំកន្លងទៅ។
លោកថ្លែងថា ៖ យើងបារម្ភយ៉ាងខ្លាំង ចំពោះភាពតានតឹងដែលបង្កឡើងដោយមហាអំណាច ពិភពលោកលំដាប់ទី១ នៅក្នុងរង្វង់ទំនាក់ទំនងការទូត និងជម្លោះផ្ទៃក្នុងច្រើនកន្លែងដែល កំពុងកើតឡើងដោយសារការជ្រៀតជ្រែកពីសំណាក់មហាអំណាចនេះ។
ក្នុងឱកាសនោះសម្តេចនាយករដ្ឋមន្ត្រីក៏បានលើកឡើងថា ប្រជាជនកម្ពុជាកំពុងតែសប្បាយ រីករាយទទួលផលពីសុខសន្តិភាព ស្ថិរភាព និងការអភិវឌ្ឍន៍ ក្រោមការដឹកនាំរបស់សម្តេច។ ក្រៅពីនេះសម្តេចនាយករដ្ឋមន្ត្រី ក៏បានយកវេទិកាមហាសន្និបាតអង្គការសហប្រជាជាតិ លេីកទី៧៣នេះ បង្ហាញដល់អន្តរជាតិឱ្យឃើញថា កម្ពុជាជាដែលបានផ្តល់ធាតុចូល និងការជ្រោមជ្រែងច្រើនជូនពិភពលោកទាំងមូល។
សម្តេច ហ៊ុន សែន បានបញ្ជាក់នៅក្នុងអង្គមហាសន្និបាតថា៖ «កម្ពុជាតូចមែនពិត ប៉ុន្តែយើងក៏មាន ទស្សនវិស័យវែងឆ្ងាយ សម្រាប់ពិភពលោកមួយ ដែលយើងត្រូវចែកគ្នារស់នៅជាមួយបណ្ដា ប្រទេសផ្សេងៗ និងរួមគ្នាថែរក្សាឱ្យបានយូរអង្វែង។ កិច្ចប្រជុំលើកនេះ យើងបានឃើញកាន់តែ ច្បាស់នូវស្ថានភាព «គីង្គក់ដើរលក់ថ្នាំស្រែង» ដែលផ្គើនចេញជាចំហ»។
នៅក្នុងមហាសន្និបាតអង្គការសហប្រជាជាតិ សម្តេច ហ៊ុន សែនបានអំពាវនាវឡើងវិញ ឱ្យមានការ គោរពសិទ្ធិអធិបតេយ្យ នៃប្រជាជាតិទាំងឡាយ ដោយមិនលូកដៃចូលកិច្ចការផ្ទៃក្នុងរបស់ប្រទេស ណាមួយ ទោះតូចតាច ឬក្រក្រីយ៉ាងណាក្តី។ សម្តេច ហ៊ុន សែន ថែមទាំងបានស្នើសុំឱ្យមានការ គោរពច្បាប់អន្តរជាតិ និងគោរពគោលការណ៍ពហុនិយម ដែលមានអង្គការសហប្រជាជាតិជាអ្នក សម្របសម្រួល ដើម្បីពិភពលោកមួយ ពោរពេញដោយសន្តិភាពនិងការអភិវឌ្ឍន៍។
សម្តេចបានបញ្ជាក់ថា៖ «សូមខ្មែរគ្រប់រូបមានមោទនភាព លើជាតិរបស់ខ្លួនក្នុងឆាកអន្តរជាតិ កម្ពុជាដ៏តូចមួយនេះ បានផ្តល់ធាតុចូល និងការជ្រោមជ្រែងច្រើនណាស់ជូនពិភពលោកទាំងមូល ដូចពាក្យថា “តូចតែខ្លឹម”»។ សូមបញ្ជាក់ថាលើកនេះ កម្ពុជាត្រូវបានជ្រើសរើសជាអនុប្រធាន មហាសន្និបាតអង្គការ សហប្រជាជាតិ(អ.ស.ប) លើកទី៧៣ នៃអង្គការសហប្រជាជាតិអាណត្តិឆ្នាំ២០១៨-២០១៩។ កម្ពុជាបានដើរតួនាទីជាអនុប្រធាននៃមហាសន្និបាតអង្គការសហប្រជាជាតិចំនួនពីរលើកហើយ គឺលើកទី១ នៅក្នុងសម័យប្រជុំមហាសន្និបាតអង្គការសហប្រជាជាតិលើកទី៥៦ អាណត្តិឆ្នាំ ២០០១-២០០២ និងលើកទី២ នៅក្នុងសម័យប្រជុំមហាសន្និបាតអង្គការសហប្រជាជាតិលើកទី៧៣ អាណត្តិឆ្នាំ២០១៨-២០១៩។
តាមរយៈតួនាទីនេះ កម្ពុជាអាចមានឱកាសដឹកនាំកិច្ចប្រជុំរបស់មហាសន្និបាត ជំនួសមុខប្រធាន និងតាមសំណើររបស់ប្រធាន៕
