ខេត្តសៀមរាប ÷ នៅព្រឹកថ្ងៃទី១៦ខែសីហាឆ្នាំ២០២៣នេះ អាជ្ញាធរជាតិអប្សរាដឹកនាំដោយ ឯកឧត្តមបណ្ឌិត ហង់ ពៅ អគ្គនាយកអាជ្ញាធរជាតិអប្សរា និង ថ្នាក់ដឹកនាំ សហការីក្រោមឱវាទ រួមជាមួយភរិយាក្រុមគ្រួសារ របស់ថ្នាក់ដឹកនាំ និងមន្ត្រីអាជ្ញាធរជាតិអប្សរា សរុបចំនួនប្រមាណជាង៤០០នាក់ បាននាំគ្នាដាំកូនឈើចម្រុះគ្រប់ប្រភេទចំនួន១.២០០ដើម និងស្មៅចំនួន៤០០ម៉ែត្រក្រឡា នៅបរិវេណខាងមុខប្រាសាទអង្គរវត្ត ក្បែរស្រះទឹកត្រពាំងសេស ដែលស្ថិតក្នុងក្រុងសៀមរាបខេត្តសៀមរាប ។
ឯកឧត្តមបណ្ឌិត ហង់ ពៅ បានលើកពីគុណតម្លៃដើមឈើនិងព្រៃឈើក្រៅពីមានតួនាទីយ៉ាងសំខាន់សម្រាប់ភាវៈរសវាក៏ដើរតួយ៉ាងសកម្មក្នុងការជំរុញ សេដ្ឋកិច្ចវិស័យទេសចរណ៍ និងជួយបង្កើនសម្រស់បរិស្ថានធម្មជាតិបៃតងនៅតំបន់អង្គរ ឲ្យកាន់តែមានសោភណ្ឌភាពល្អស្រស់បំព្រងមួយកម្រិតថែម។
ឯកឧត្តមបណ្ឌិត បានមានប្រសាសន៍ចាត់ទុក ទឹក ព្រៃឈើ និងប្រាសាទជាធាតុផ្សំដែលមិនអាចចែកចេញពីគ្នាបាន ហើយធាតុទាំងបីនេះ បានជួយរក្សាតុល្យភាព និងស្ថេរភាពលំនឹងគ្រឹះប្រាសាទ ដូច្នេះបើយើងដាំដើមឈើ ដើមឈើទាំងនោះនឹងជួយកាត់បន្ថយភាពរំហូតឬភាពហូរច្រោះនៃទឹកនៅក្រោមដី លើសពីនេះ ដើមឈើ ដុះនៅជិតប្រាសាទ នឹងបញ្ចេញសំណើម ធ្វើរស្មីសំយោគ ជួយកាត់បន្ថយកម្តៅនៃប្រាសាទ ជាហេតុនាំឱ្យថ្មមិនងាយប្រះផុយ ឬរលំ និងកាត់បន្ថយនូវភាពសិករិករឹលនៃប្រាសាទទៀតផង។ មួយវិញទៀត ព្រៃឈើ នឹងជួយកាត់បន្ថយល្បឿនខ្យល់ ដែលផ្តល់ហានិភ័យទៅដល់ប្រាសាទបុរាណ ជួយកាត់បន្ថយឥទ្ធិពលជាអវិជ្ជមាន ពីការប្រែប្រួលអាកាសធាតុ ទប់ស្កាត់ទឹកជំនន់ ខ្យល់ព្យុះ ការហូរច្រោះដី គ្រោះរាំងស្ងួត និងជួយស្រួបយកជាតិ ពុលពីបរិយាកាសជាដើម ព្រមទាំងផ្តល់នូវផលអនុផលព្រៃឈើជាច្រើនឥតគណនាដល់ជីវភាពរស់នៅប្រចាំថ្ងៃរបស់មនុស្សនិងសត្វផងដែរ។
ឯកឧត្តមបណ្ឌិត អគ្គនាយកអាជ្ញាធរជាតិអប្សារា មានប្រសាន៍ថា៖ ទីតាំងដែលបានដាំស្មៅ និងកូនឈើឡើងវិញនេះ ជាទីតាំងល្អបំផុតនៅបរិវេណខាងមុខប្រាសាទអង្គរ ព្រោះទីនេះកន្លងមកជាកន្លែងដែលអាជ្ញាធរជាតិអប្សរា រៀបចំដាក់សម្ភារៈសំណង់ ដើម្បីបម្រើការងារជួសជុលស្ពានហាលប្រាសាទអង្គរវត្ត និងគោលដៅមួយចំនួនក្នុងតំបន់អង្គរ ផ្សេងៗ។
ឯកឧត្តម មានប្រសាសន៍ទៀតថា៖ក្រៅពីការងារនិងភារកិច្ចស្នូល អាជ្ញាធរជាតិអប្សរា បានបណ្តុះកូនឈើគ្រប់ប្រភេទ សម្រាប់សាធារណៈជនគ្រប់មជ្ឈដ្ឋាន យកទៅដាំតាមអង្គភាពមន្ទីរ វត្តអារាមនានាដោយឥតគិតថ្លៃ។ ក្នុងរយៈពេល១៩ឆ្នាំកន្លងមកនេះ ដើមឈើប្រមាណ២លានដើម ត្រូវបានដាំដុះនៅក្នុងតំបន់អង្គរ នេះមិនបានរាប់បញ្ជូលការចែកចាយកូនឈើ ទៅកាន់ស្ថាប័នរដ្ឋ និងឯកជនផ្សេងឡើយ។ ទន្ទឹមនឹងនោះ នៅក្នុងឆ្នាំ២០២២ និង២០២៣នេះ ក្រោយការសម្រេចរបស់រាជរដ្ឋាភិបាល ក្នុងការរៀបចំឡើងវិញនៅក្នុងតំបន់អង្គរ ដោះស្រាយនូវបញ្ហាផលប៉ះពាល់ទេសភាពវប្បធម៌ និងតម្លៃជាសាកលរបស់អង្គរ ទើបអាជ្ញាធរជាតិអប្សរា មានឱកាស បង្កើនការថែទាំនិងលើកតម្លៃតំបន់រមណីយដ្ឋានអង្គរ។ ក្នុងនោះចាប់ពីអំឡុងចុងឆ្នាំ២០២២ មកដល់បច្ចុប្បន្ន កូនឈើចម្រុះចំនួនជាង៤៧.០០០ដើម ត្រូវបានដំាដុះយ៉ាងឆាប់រហ័ស លើផ្ទៃដីទំនេរ នៅជុំវិញតំបន់អង្គរផងដែរ៕
ដោយ ÷ ពន្លឺ
