ខេត្តតាកែវ ៖ ប្រភពសុំលាក់ឈ្មោះពីមន្ត្រីប្រចាំច្រកទ្វារព្រំដែនអន្តរជាតិភ្នំដិន និងអាជីវកររកស៊ីដឹកទំនិញគ្រប់ប្រភេទពីប្រទេស វៀតណាម បានឱ្យដឹងថាក្រោយពីប្រកាសចូលកាន់តំណែងថ្មីរបស់លោក ឈួន សុវណ្ណនរា ជានាយប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិភ្នំដិន ស្រុកគីរីវង់ ខេត្តតាកែវ កាលពីថ្ងៃទី២៤ ខែតុលា ឆ្នំា២០២៥ ជំនួសលោកវរសេនីយ៍ឯក អ៊ុក គឹមកណ្ណិកា អតីតនាយប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិភ្នំដិននោះមក លោក វរសេនីយ៍ឯក ឈួន សុវណ្ណនរា នាយប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិភ្នំដិន ខិតខំបើកដៃឱ្យឈ្មួញ ទាំងតូចទាំងធំសម្រុកដឹកជញ្ជូនទំនិញគេចពន្ធមួយចំនួន ព្រមទាំងទំនិញបង់ពន្ធមិនគ្រប់និងទំនិញខុសច្បាប់យ៉ាងគំហ៊ុកទាំងយប់ទាំងថ្ងៃចូលមកក្នុងប្រទេសកម្ពុជាមិនញញឹតដៃនោះឡើយ។ ប្រភពបន្តថា៖ សកម្មភាពរបស់ក្រុមឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់ចេញពីប្រទេសវៀតណាមចូលមកប្រទេសខ្មែរយ៉ាងគំហុកទាំងយប់ទាំងថ្ងៃ គឺជាប្រភពចំណូលដ៏សំខាន់របស់លោកវរសេនីយ៍ឯក ឈួន សុវណ្ណនរា និងបក្សពួកធ្វើមានបានយ៉ាងសុខស្រួលនិងម្យ៉ាងទៀតដើម្បីស្រង់ដើមផងដែរ។
ប្រភពបានបន្ថែមថា៖ លោកវរសេនីយ៍ឯក ឈួន សុវណ្ណនរា នាយប៉ុស្តិ៍នគរបាលអន្តោប្រវេសន៍ច្រកទ្វារព្រំដែនអន្តរជាតិភ្នំដិនថ្មី ខំប្រមូលលុយតាមរបៀបពុករលួយបានយ៉ាងច្រើនសន្ធឹកសន្ធាប់ក្នុងមួយខែៗ ដោយគ្មានឈ្មួញណាហ៊ានរំលងលោក ឈួន សុវណ្ណនរា នោះបានឡើយ។
ប្រភពពីអាជីវករនិងក្រុមឈ្មួញបានត្អូញត្អែថា ពួកគាត់បង់លុយតាមការកំណត់របស់លោកវរសេនីយ៍ឯក ឈួន សុវណ្ណនរា ទើបអាចដឹកជញ្ជូនទំនិញឆ្លងដែនចេញពីប្រទេសវៀតណាមចូលមកប្រទេសខ្មែរ ដូច្នោះហើយបានជាទំនិញនាំចូលមកត្រូវបូកតម្លៃបន្ថែមទើបអាចសល់បា្រក់ចំណេញខ្លះ ហេតុដូចនោះហើយបានជាទំនិញចូលដល់ក្នុងស្រុកឡើងថ្លៃកប់ពពកជាដើម ។ ប្រភពដែល ស្និទ្ធនឹងលោកវរសេនីយ៍ ឈួន សុវណ្ណនរា បានបង្ហើបឱ្យដឹងទៀតថា ដោយសារអាងមានខ្នងបង្អែករឹងមាំ នៅក្នុងអគ្គនាយកដ្ឋានអន្តោប្រវេសន៍ ទើបលោកវរសេនីយ៍ឯក ឈួន សុវណ្ណនរា ហ៊ានប្រើតួនាទី និងអអំណាចបើកដៃឱ្យឈ្មួញនាំទំនិញចេញពីប្រទេសវៀតណាមចូលមកប្រទេសខ្មែរដើម្បីប្រមូលលុយតាមរបៀបពុករលួយ។
អាជីវករតាមរយៈអ្នកសារព័ត៌មាន ស្នើសុំថ្នាក់ដឹកនាំក្រសួងមហាផ្ទៃ និងឯកឧត្តម វ៉ី សំណាង អភិបាលខេត្តតាកែវ ព្រមទាំងលោកឧត្តមសេនីយ៍ទោ ម៉ែន លី ស្នងការដ្ឋាននគរបាលខេត្តតាកែវជាពិសេសឯកឧត្តម ឧត្តមសេនីយ៍ ឯក សុខ វាសនា អគ្គនាយកនៃអគ្គនាយកដ្ឋាននគរបាលអន្តោប្រវេសន៍ គួរដាក់មន្រ្តីជំនាញចុះសិក្សាស្រាវ ជ្រាវនូវភាពមិនប្រក្រតីតាមរបៀបប្រមូលលុយពុករលួយរបស់លោកវរសេនីយ៍ឯក ឈួន សុវណ្ណនរា នាយប៉ុស្តិ៍នគរបាលអន្តោប្រវេសន៍ច្រកទ្វារព្រំដែនអន្តរជាតិភ្នំដិននេះផង ។
ដោយ៖ សត្យា
រូបភាព៖ សៀមរាបថ្មី
