ខេត្តសៀមរាប៖ នារសៀលថ្ងៃទី២ខែវិច្ឆិកាឆ្នាំ២០២៥ សាលាអន្តរជាតិអេអិលអេ (ALA) ខេត្តសៀមរាបបានរៀបចំប្រគល់ប័ណ្ណសរសើរដល់សិស្សពូកែឆ្នាំ សិក្សា២០២៤-២០២៥ នៅសាលប្រជុំនៃសាលាគរុកោសល្យនិងវិក្រិតការខេត្ត ដោយមានការអញ្ជើញចូលរួមពីសំណាក់ លោកនាយក លោកគ្រូ អ្នកគ្រូ សាស្ត្រចារ្យ និងមាតាបិតា អាណាព្យាបាលសិស្ស ជាច្រើន ។
លោកស្រី ហ៊ុន មករា នាយិកាខេមរភាសានៃសាលាអន្តរជាតិអេអិលអេ បានកោតសរសើរនូវការចូលរួមលះបង់ពេលវេលានិងគំនិតស្មារតីជួយជំរុញដាស់តឿននិងតាមដានការសិក្សារបស់កូនៗនៅឯផ្ទះ ទើបការសិក្សារបស់កូនៗទទួលបានលទ្ឋផលល្អ តែដើម្បីចូលឱ្យបានជ្រៅនិងឆ្លើយតបបានទៅក្នុងស្តង់ដារសាលាបឋមសិក្សាគំរូនិងដើម្បីកូនៗទទួលបាននិទ្ទេសល្អ យើងជាមាតាបិតាអ្នកអាណាព្យាបាលសិស្សត្រូវជួយតម្រង់ទិសក្នុងគន្លងអប់រំឱ្យបានត្រឹមត្រូវ លើសពីនេះដើម្បីឆ្លើយតបទៅនឹងបរិបទនៃការវីវដ្តរបស់សង្គម បន្ថែមលើភាសាជាតិ កូនៗត្រូវរៀននិងចេះ ភាសាផ្សេងលើសពីមួយភាសាបន្ថែមទៀត។
លោក នង វុត្ថា នាយកស្ថានិកសាលាអន្តរជាតិអេអេលអេបាន មានប្រសាសន៍ថា៖ សាលានេះបានបង្កើតឡើងនៅឆ្នាំ ២០១០ ក្នុងបំណងរួមចំណែកកសាងសហគមន៍ធនធានមនុស្ស ផ្តល់ចំណេះដឹងដល់គ្រួសារកុមារ និងមានកម្មវិធីសិក្សាឈានមុខនិងគ្រូៗសុទ្ឋតែមានគរុកោសល្យច្បាស់លាស់មកពីសាលាគរុកោសល្យ បានស្ម័គ្រចិត្តចូលរួមអភិវឌ្ឍន៌សាលាអន្តរជាតិអេអេលអេប្រកបដោយឆន្ទះលះបង់ខ្ពស់ដើម្បីប្រយោជន៌ដល់សិស្សក្រីក្រីដែលពុំមានលទ្ធភាពទៅរៀនសាលាល្អនិងមានតម្លៃសិក្សាថ្លៃនោះ ហើយមានឱកាសចូលរៀននិងទទួលបានគុណភាពដូចគេដែរ។
ទន្ទឹមនេះ សាលាកំពុងបោះជំហានទៅរកការអប់រំកុមារតូចដែលមានលក្ខណៈពិសេសតាមគោលការណ៍បីសំខាន់គឺបណ្តុះស្មារតីឱ្យស្រឡាញ់ការសិក្សា អប់រំកុមារឱ្យមានទម្លាប់និងអាកប្បកិរិយាល្អ និងផ្តល់នូវបរិស្ថានសិក្សាជាវិជ្ជមាន។
លោក នង វត្ថា បន្ថែមថា៖ក្រៅពីកម្មវិធីសិក្សាស្នូល សាលាបានបណ្តុះនូវគុណតម្លៃដល់សិស្សឱ្យមានភាពជឿជាក់ មានទំនាក់ទំនងល្អជាមួយមិត្តភក្រ័ បណ្តុះនូវស្មារតីស្រឡាញ់បរិស្ថាន បណ្តុះនូវចរិយាសម្បទា តាមរយៈការអប់រំផ្នែកសីលធម៌ សុជីវធម៌ បណ្តុះនូវវិជ្ជាសម្បទា និងបំណិនសម្បទា ជាដើម៕
ដោយ៖ ពន្លឺ
