ប្រជាពលរដ្ឋមានជីវភាពខ្វះខាតចំនួន៥៩៨ គ្រួសារ នៅស្រុកចុងកាល់ខេត្តឧត្តរមានជ័យ នៅស្រុកស្រីស្នំខេត្តសៀមរាប ទទួលបានស្បៀងអាហារពីសប្បុរស់ជននៅសហរដ្ឋអាមេរិក

ខេត្តសៀមរាប៖ នាថ្ងៃទី៤ ខែ វិច្ឆិកា ឆ្នាំ២០២៥ ព្រះសង្ឃខេត្តសៀមរាប ដឹកនាំដោយព្រះបវរវិជ្ជា ទេព ភឿន ព្រះវិន័យធរ គណ ខេត្តសៀមរាប បាននិមន្តសួរសុខទុក្ខ នឹងចែកស្បៀងអាហារជូនដល់ប្រជាពលរដ្ឋមានជីវភាពខ្វះខាតចំនួន ៥៩៨ គ្រួសារស្ថិតនៅស្រុកស្រីស្នំ ខេត្តសៀមរាប និងស្រុកចុងកាល ខេត្តឧត្តរមានជ័យ ដែលជាអំណោយរបស់ សប្បុរសជននៅសហរដ្ឋអាមេរិក ដែលផ្តល់តាមរយៈសម្ដេចព្រះព្រហ្មរតនមុនី ពិន សែម សិរីសុវណ្ណោ ព្រះប្រធានថេរសភាសង្ឃព្រះពុទ្ធសាសនានៃព្រះរាជាណាចក្រកម្ពុជា ។

ព្រះបវរវិជ្ជា ទេព ភឿន មានថេរៈដីកាថា ព្រះពុទ្ធសាសនា ផ្សារភ្ជាប់នឹងសង្គម ហើយអ្វីដែលព្រះសង្ឃដែលអាចជួយទៅបាន គឺនៅពេលដែលមើលឃើញអំពីទុក្ខលំបាករបស់បងប្អូនប្រជាពលរដ្ឋ និងពុទ្ធបរិស័ទ គឺជាទុក្ខលំបាករបស់ព្រះសង្ឃដែរ ពី ព្រោះព្រះសង្ឃរស់នៅបាន គឺអាស្រ័យនឹងពុទ្ធបរិស័ទផងដែរ ។ ជាការពិតសព្វសត្វ អាចទ្រទ្រង់ជីវិតបានអាស្រ័យលើអាហារជាចាំបាច់ ។

ព្រះបវរវិជ្ជាបានមានសង្ឃដីកាបន្តថា អំណោយដែលបានធ្វើការប្រគល់ជូនដល់បងប្អូនប្រជាពលរដ្ឋនាពេលនេះ គ្រាន់តែជាចំណែកតូចមួយជួយរំលែកការលំបាកមួយគ្រាៗតែប៉ុណ្ណោះ មិនអាចឆ្លើយតបតាមសេចក្តីខ្វះខាតរបស់បងប្អូនឡើយ ដួច្នេះសូមឱ្យបងប្អូនប្រជាពលរដ្ឋយើងនៅផ្ទះ សូមធ្វើការដាំបន្លែបង្កាគ្រប់មុខក្នុងដីរបស់ខ្លួនបន្ថែមទៀត ដើម្បីកុំឱ្យមានការខ្វះខាតហូបចុក ព្រោះថាបន្លែបង្កាដែលយើងបានដាំ គឺអាចជួយសម្រាលជីវភាពបាន ហើយសំខាន់ បើចង់រួចផុតពីសេចក្តីទុក្ខ គឺត្រូវខំប្រឹងព្យាយាម និងកែខៃមុខរបរអាជីវកម្មឱ្យស្របតាមសមត្ថភាពរបស់ខ្លួន។

ព្រះបវរវិជ្ជាបន្តថា កន្លងមកនេះ សម្ដេចព្រះព្រហ្មរតនមុនី ពិន សែម តែងតែបាននិមន្តចុះសួរសុខទុក្ខដល់ញាតិញោមដែល ជួបការលំបាកជាច្រើន ទាំងប្រជាពលរដ្ឋមានជីវភាពខ្វះខាត និងប្រជាពលរដ្ឋភៀសសឹកកន្លងមក៕

ដោយ÷ ពន្លឺ