ខេត្តសៀមរាប៖ នៅក្នុងពិធីបើកបវេសនកាលឆ្នាំសិក្សា ២០២៥-២០២៦ និងប្រគល់សញ្ញាបត្របញ្ចប់ការសិក្សានិងប័ណ្ណសរសើរជូនដល់សិស្សឆ្នើមក្នុងឆ្នាំសិក្សា២០២៤-២០២៥ របស់សាលាអន្តរជាតិខេម សាខាក្រុងរុនតាឯកតេជោសែន នាព្រឹកថ្ងៃទី ២៧ ខែ តុលា ឆ្នាំ២០២៥នេះ លោក ឌី រ៉ាដូ អភិបាលរងខេត្តសៀមរាប បានថ្លែងថាវិស័យអប់រំគឺជាវិស័យអាទិភាពចម្បងលើគ្រប់វិស័យដទៃទៀតក្នុងការអភិវឌ្ឍធនធានមនុស្សដើម្បីអភិវឌ្ឍមូលដ្ឋានហើយជាមួយគ្នានេះ ចំណេះដឹង គឺមានសារៈសំខាន់បំផុតសម្រាប់មនុស្សគ្រប់រូប។
លោកអភិបាលរងខេត្តបន្តថា រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បាននឹងកំពុងយកចិត្តទុកដាក់យ៉ាងខ្លាំង ក្នុងការកសាង អភិវឌ្ឍធន ធានមនុស្សលើគ្រប់ផ្នែក ប្រកបដោយគុណភាព និងមានគុណធម៌ល្អប្រពៃ ដើម្បីឆ្លើយតបទៅនឹងសំណូមពរ នៃការអភិវឌ្ឍសង្គម សេដ្ឋកិច្ច ដើម្បីកសាងកម្ពុជាឱ្យក្លាយជាប្រទេសរីកចម្រើន ជឿនលឿន ឈរលើឆាកជាតិ និងអន្តរជាតិ។
លោក ឌី រ៉ាដូ ថាចំណេះដឹង មានប្រភពមកពី កន្លែងផ្សេងៗគ្នា មានទាំងការសិក្សាជាមួយលោកគ្រូ អ្នកគ្រូ ឬនៅសាលា និងបានមកពីការធ្វើស្វ័យសិក្សា ឬការសិក្សាស្រាវជ្រាវដោយខ្លួនឯងព្រមទាំងបានមកពីបទពិសោធន៍ក្នុងជីវិតផងដែរ ចំពោះការសិក្សាពីសាលារៀន គឺត្រូវសិក្សាជាមួយលោកគ្រូ អ្នកគ្រូ ស្របទៅតាមកម្មវិធីសិក្សារបស់ក្រសួង និងតាមកាលវិភាគរបស់សាលារៀន។ ក្នុងនោះដែរលោកអភិបាលរងខេត្ត ក៏បានមានប្រសាសន៍ • ជំរុញឱ្យនាយកសាលា និងលោកគ្រូ អ្នកគ្រូ បន្តអនុវត្តឱ្យបានម៉ឺងម៉ាត់នូវគោលនយោបាយ និងកំណែទម្រង់នានាដែលដាក់ចេញដោយក្រសួងអប់រំ យុវជន និងកីឡា ជាពិសេសស្តង់ដាសាលារៀនគំរូ និងបន្តផ្តោតលើការកែលម្អទាំងគុណភាពបង្រៀន និងបណ្តុះសីលធម៌ដល់សិស្ស ដើម្បីធានាថាការអប់រំគឺមានទាំងចំណេះដឹង និងចរិយាសម្បទា ហើយត្រូវធានាថា សាលារៀនមានបរិស្ថានស្អាត បៃតង និងមានអនាម័យល្អ ព្រមទាំងផ្តល់ការការពារសុវត្ថិភាពខ្ពស់ដល់សិស្សានុសិស្សផងដែរ។
លោក មាន់ សុភី នាយកសាលាអន្តរជាតិខេមក្នុងខេត្តសៀមរាប បានមានប្រសាសន៍ថា ការៀបចំពិធីដ៏មានសារសំខាន់នេះឡើងគឺដើម្បីបង្ហាញពីការយកទុកចិត្តដាក់របស់គណៈគ្រប់គ្រងសាលាដល់សិស្សានុ សិស្ស និងបង្កើនទំនាក់ទំនងរវាងមាតាបិតា អ្នកអាណាព្យាបាលសិស្សនិងជាមួយសាលាអន្តរជាតិខេម និងជាការលើកទឹកចិត្តដល់សិស្សឱ្យកាន់តែខិតខំសិក្សាបន្ថែមទៀត ដើម្បីពង្រឹងវិសាលភាពរបស់អប់រំរបស់សាលាក៏ដូចជាធ្វើឱ្យសិស្សមានភាពសប្បាយរីករាយក្នុងការរៀនសូត្រនិងបង្កើតទំនាក់ទំនងល្អទៅកាន់សង្គមខាងក្រៅផងដែរ ។
លោក មាន់ សុភី បន្តថាសាលាអន្តរជាតិខេមត្រូវបានបង្កើតឡើងដោយផ្អែកលើគោលការណ៍ នៃគុណភាពវិជ្ជា ការអភិវឌ្ឍសិស្សជាស្រុង និងការចូលរួមជាមួយសហគមន៍ ដែល មានភាពថ្កុំថ្កើងបែបគ្រួសារ មានភាពចូលរួម និងបង្កើតឱកាសឲ្យសិស្សទទួលបានការរីកចម្រើនទាំងផ្នែកបញ្ញា សង្គម និង អារម្មណ៍ ហើយគ្រូបង្រៀន និងបុគ្គលិកសាលា ទាំងអស់បានចូលរួមក្នុងកម្មវិធី បណ្តុះបណ្តាលវិជ្ជាជីវៈ និងការអភិវឌ្ឍសមត្ថភាពបន្ត ដើម្បីធានាថា ការបង្រៀនមាន គុណភាព ប្រសិទ្ធភាព និងស្របតាមស្តង់ដារអន្តរជាតិ។
លោក មាន់ សុភី នាយកសាលាអន្តរជាតិខេម បានមានប្រសាសន៍បន្ថែមថា សិស្សឆ្នើមជាច្រើន ត្រូវបានជ្រើសរើសទទួល វិញ្ញាបនបត្រនិងប័ណ្ណសរសើរ ដើម្បីលើកទឹកចិត្ត និងអបអរសាទរដល់ លទ្ធផលឆ្នើមនៃការខិតខំប្រឹងប្រែង។ហើយសាលាក៍មានអាហារូបករណ៍សម្រាប់គ្រួសារក្រីក្រ ត្រូវបានផ្តល់ជាប្រចាំ ដើម្បីជួយឲ្យកុមារទាំងអស់មានឱកាសសិក្សាស្មើភាពគ្មានការរើសអើង។ លោកបានបញ្ជាក់ថាសម្រាប់សិស្សដែលមកពីគ្រួសារដែលមានស្ថានភាពសេដ្ឋកិច្ចទាបគឺសាលាផ្តល់ជាឱកាសសិក្សាឥតគិតថ្លៃ ឬបញ្ចុះតម្លៃថ្នាក់សិក្សាគាំទ្រផ្នែកសម្ភារៈសិក្សា និងសម្លៀកបំពាក់សាលា ដើម្បីឱកាសអភិវឌ្ឍន៍សមត្ថភាព និងចូលរួមសកម្មភាពសាលានិង ដើម្បីបង្កើនឱកាសអប់រំស្មើភាពសម្រាប់កុមារទាំងអស់ ។
លោក មាន់ សុភី ក៏បានមានប្រសាសន៍បញ្ជាក់បន្ថែមផង ដែរ ថា ការប្រារព្ធពិធីបើកបវេសនកាលឆ្នាំសិក្សា ២០២៥-២០២៦ និងប្រគល់សញ្ញាបត្របញ្ចប់ការសិក្សានិងប័ណ្ណសរសើរជូនដល់សិស្សឆ្នើមក្នុងឆ្នាំសិក្សា២០២៤-២០២៥ នៃសាលាទាំង៤សាខាគឺសាលាអន្តរជាតិខេមនៅក្រុងរុនតាឯកតេជោសែន .សាលាអន្តរជាតិខេមស្រុកវ៉ារិន .សាលាអន្តរជាតិខេមស្រុកសូទ្រនិគម និងសាលាអន្តរជាតិខេមស្វាយលើ ក្នុងខេត្តសៀមរាប ៕
ដោយ៖ ពន្លឺ
