តើអាជីវកម្មរុករករ៉ែមាសរបស់លោក សីហា បានអនុលោមតាមច្បាប់ស្តីពីការគ្រប់គ្រង និងការធ្វើអាជីវកម្មធនធានរ៉ែហើយឬនៅ?

ខេត្តបាត់ដំបង៖ តាមប្រភពច្បាស់ការបានរាយការណ៍ឱ្យដឹងនៅថ្ងៃទី២២ ខែកក្កដា ឆ្នាំ២០២៥ ថាមានទីតាំងរុករកធ្វើអាជីវកម្ម រ៉ែមាសខុសច្បាប់ចំនួន២ទីតាំងដែលស្ថិតនៅភូមិភ្នំព្រឹក ឃុំភ្នំព្រឹក ស្រុកភ្នំព្រឹក ខេត្តបាត់ដំបង ។

ក្រោយពីបានទទួលដំណឹងថាមានទីតាំងធ្វើអាជីវកម្មរ៉ែមាសខុសច្បាប់នោះភ្លាមអ្នកសារព័ត៌មានយើងបានចុះទៅផ្តិតរូបភាពនៅទីតាំងនោះតែម្តង និងបានសាកសួរកម្មករដែលកំពុងបម្រើការនៅទីនោះ ទើបដឹងថា ទីតាំងនោះជារបស់បុគ្គលឈ្មោះ សីហា មានទីលំនៅភូមិបារាំងធ្លាក់ ឃុំបារាំង ស្រុកភ្នំព្រឹក ខេត្តបាត់ដំបង ។ កម្មករនៅទី នោះបានបន្ថែមថាទីតាំងធ្វើរ៉ែនេះបើកដំណើរការយួរមកហើយ ដោយតែងតែឃើញមានមនុស្សខ្លះពាក់ឯកសណ្ឋាន និងខ្លះទៅសំលៀកបំពាក់ធម្មតាចេញចូលហើយក៏ទៅបាត់ ។

ដើម្បីគោរពទៅតាមវិជ្ជាជីវៈអ្នកសារព័ត៌មានសហការីយើងបានទូរស័ព្ទសាកសួរព័តមានបន្ថែមម្ចាស់ទីតាំងអាជីវកម្មរ៉ែនោះដែលមានឈ្មោះ សីហា តាមទូរស័ព្ទលេខ ០៣១៥៥៥៥៤៦៦ ដោយលោកឆ្លើយថា លោកមិននៅកន្លែងនោះទេ ដោយឱ្យទំនាក់ទំនងទៅកាន់អ្នកកាន់លុយតាមរយៈលេខ ០៧១៦៧៧៧៧៦៥ លេខទូរស័ព្ទនេះភ្នាក់ងារយើងទូរស័ព្ទចូលជាច្រើនដងតែគ្មានអ្នកលើក ។

តាមប្រភពបានប្រាប់បន្ថែមថា ទីតាំងធ្វើអាជីវកម្មរ៉ែនោះ ធ្លាប់មានកម្លាំងអធិការរដ្ឋាននគរបាលស្រុកភ្នំព្រឹក ចុះធ្វើការបង្ក្រាបមួយលើកកន្លងមកហើយ មួយរយៈចុងក្រោយនេះនៅបន្តធ្វើដដែរមិនដឹងថាគេមានខ្នងធំប៉ុណ្ណានេះទេ ។

នៅរសៀលថ្ងៃទី២២ ខែកក្កដា ឆ្នាំ២០២៥ ការីនិពន្ធនៃអង្គភាពយើងបានទូរស័ព្ទជម្រាបសួរ លោក ជឿន សុភ័ក្រ្ត មេឃុំភ្នំព្រឹក លោកបានបញ្ជាក់ប្រាប់ថា ទីតាំងអាជីវកម្មធ្វើរ៉ែមាសរបស់បុគ្គលឈ្មោះសីហា ដែលមានរបងព័ទ្ធខាងមុខដីនោះធ្លាប់បានចុះបង្ក្រាបម្តងហើយ បើនៅមានទៀតចាំមើលលោកឱ្យនគរបាលឃុំរបស់លោកចុះទៅមើលម្តងទៀត ។

ចំណែកលោក សុង សុភ័ក្រ្ត អភិបាលគណៈអភិបាលស្រុកភ្នំព្រឹក លោកមិនបានឆ្លើយតបទេ ខណៈអ្នកសារព័ត៌មានបានទំនាក់ទំនងតាមរយៈតេឡេក្រាម (Telegram) ។

បើតាមមន្ត្រីនៅមន្ទីរ រ៉ែ និងថាមពលខេត្តបាត់ដំបង លោកបានបញ្ជាក់ប្រាប់តាមទូរស័ព្ទថាទីតាំងខាងលើពិតជាមិនមានលិខិតអនុញ្ញាតនោះទេ ។

យោងច្បាប់ស្តីពី ការគ្រប់គ្រង និងការធ្វើអាជីវកម្មធនធានរ៉ែ ដែលរដ្ឋសភាបានអនុម័តកាលពីថ្ងៃទី ៣០ ខែ ខុសភា ឆ្នាំ ២០០១ នាសម័យប្រជុំពេញអង្គលើកទី ៦ នីតិកាលទី ២ ហើយដែលព្រឹទ្ធសភាបានអនុម័តយល់ស្របតាម លើទម្រង់ និង គតិនៃច្បាប់នេះទាំងស្រុង កាលពីថ្ងៃទី ២៧ ខែ មិថុនា ឆ្នាំ ២០០១ នាសម័យប្រជុំពេញអង្គ លើកទី ៥ នីតិកាលទី ១ ហើយដែលមានសេចក្តីទាំងស្រុងដូចតទៅ..
មាត្រា ៣៣..
បុគ្គលណាដែលធ្វើប្រតិបត្តិការស្វែងរុករកធនធានរ៉ែ ដោយគ្មានអាជ្ញាប័ណ្ណ ធនធានរ៉ែ ត្រូវពិន័យជាប្រាក់ចំនួនពី ៥០០.០០០ (ហាសិបម៉ឺន) រៀល ទៅ ១.០០០.០00 (មួយលាន) រៀល ។
ក្នុងករណីមិនរាងចាលត្រូវផ្តន្ទាទោសពិន័យជាប្រាក់ពី ១.០០០.០០០ (មួយ លាន) រៀល ទៅ ២.០០០.០០០ (ពីរលាន) រៀល ឬផ្តន្ទាទោសដាក់ពន្ធនាគារពី ១ (មួយ) ខែ ទៅ ១ (មួយ)ឆ្នាំ ឬត្រូវផ្តន្ទាទោសទាំងពីរ ។

ប្រជាពលរដ្ឋសូមគោរពស្នើដល់ឯកឧត្តម សុខ លូ អភិបាលខេត្តបាត់ដំបង សូមលោកមេត្តាចាត់តាំងមន្ត្រីល្អៗក្នុងខេត្តជួយចុះពិនិត្យ និងធ្វើអធិការកិច្ចលើទីតាំងអាជីវកម្មរ៉ែមាសរបស់បុគ្គលឈ្មោះ សីហា ថាតើមានបុគ្គលណាខ្លះដែលពាក់ព័ន្ធបានជាបណ្តែតបណ្តោយឱ្យមានអាជីវកម្មខុសច្បាប់ដូចនេះដែលជាហេតុធ្វើឱ្យបាត់បង់សួយសារអាករចូលជាតិជាដើម ៕

ដោយ ៖ សត្យា