ខេត្តសៀមរាប៖ នៅព្រឹកថ្ងៃទី២៥ ខែតុលា ឆ្នាំ២០២៥នេះព្រះគ្រូបញ្ញាវិសុទ្ធីរង្សី ម៉ៃ ភីរុណ ព្រះគ្រូចៅអធិការវត្តសុវណ្ណសាគរ ដែលស្ថិតនៅក្នុងសង្កាត់ចុងឃ្នៀស ក្រុងសៀមរាប និងព្រះវិភត្តិមុនីញាណ ហ៊ាក់ គឹមហ៊ត់ ព្រះចៅអធិការវត្តអារញ្ញសាគរ ក្នុងសង្កាត់សៀមរាប ព្រមទាំងមានការនិមន្តចូលរួមពីសំណាក់ព្រះសង្ឃនៅវត្តព្រិន្ទ បាននិមន្តចែកជូននូវគ្រឿងឧបភោគ បរិភោគ និងថវិកាដល់បងប្អូនកងកម្លាំងប្រជាការពារ និងបងប្អូនប្រជាពលរដ្ឋរងគ្រោះដោយសារទឹកជំនន់ចំនួន ១០០គ្រួសាដែលរ រស់នៅក្នុងសង្កាត់ចុងឃ្នៀស ក្រុងសៀមរាបខេត្តសៀមរាប ដោយអំណោយដែលចែកជូនរួមមាន អង្ករចំនួន ១០គីឡូក្រាម មី ទឹកត្រី ទឹកស៊ីអ៊ីវ និងគ្រឿងបរិភោគមួយចំនួន រួមទាំងថវិកា ២០ ០០០រៀលផងដែរ។
ព្រះគ្រូបញ្ញាវិសុទ្ធីរង្សី ម៉ៃ ភីរុណ ព្រះចៅអធិការវត្តសុវណ្ណសាគរ មានថេរដីកាថា ព្រះពុទ្ធសាសនាផ្សារភ្ជាប់នឹងសង្គមជាតិ ហើយអ្វីដែលព្រះសង្ឃអាចជួយទៅបាន គឺនៅពេលដែលមើលឃើញអំពីទុក្ខលំបាករបស់បងប្អូនប្រជាពលរដ្ឋ និងពុទ្ធបរិស័ទ គឺជាទុក្ខលំបាករបស់ព្រះសង្ឃដែរ ពីព្រោះព្រះសង្ឃរស់នៅបានក៏អាស្រ័យនឹងពុទ្ធបរិស័ទផងដែរ។
ព្រះតេជគុណ បានបន្តថា ការចែករំលែកនេះមិនត្រឹមតែជាការបង្ហាញនូវការយកចិត្តទុកដាក់ និងការអាណិតអាសូរចំពោះទុក្ខលំបាករបស់ប្រជាពលរដ្ឋប៉ុណ្ណោះទេ ថែមទាំងបានឆ្លុះបញ្ចាំងពីវប្បធម៌នៃការជួយសង្គ្រោះគ្នាទៅវិញទៅមកក្នុងគ្រាមានអាសន្ន ក្រោមម្លប់ព្រះពុទ្ធសាសនា។
ក្នុងនោះដែរ ព្រះវិភត្តិមុនីញាណ ហ៊ាក់ គឹមហ៊ត់ ព្រះចៅអធិការវត្តអារញ្ញសាគរ ក៏បានមានថេរដីកាដែរថា ការផ្ដល់ជាគ្រឿងឧបភោគបរិភោគរបស់ព្រះសង្ឃនៅពេលនេះ គឺជាការចូលរួមជាមួយរាជរដ្ឋាភិបាលកម្ពុជា និងអាជ្ញាធរមូលដ្ឋាន ក្នុងការជួយដល់ប្រជាពលរដ្ឋដែលកំពុងជួបការលំបាក។ ពុទ្ធបរិស័ទទាំងអស់ គឺជាមិត្តរួមជាតិ រួមសាសន៍ រួមទុក្ខ រស់នៅក្រោមម្លប់នៃព្រះពុទ្ធសាសនា ដូច្នេះនៅពេលដែលពុទ្ធបរិស័ទជួបទុក្ខលំបាក ព្រះសង្ឃត្រូវតែខ្វល់ខ្វាយជួយជ្រោមជ្រែងញោមញាតិ និងចូលរួមការរំលែកទុក្ខរបស់ពុទ្ធបរិស័ទជាការបង្ហាញពីការអាណិតអាសូរក្នុងនាមជាមិត្តរួមជាតិ រួមសាសន៍ជាមួយគ្នា។ ជាមួយគ្នានោះ ព្រះតេជគុណ ក៏បានណែនាំដល់ប្រជាពលរដ្ឋត្រូវបង្កើនការប្រុងប្រយ័ត្ន ជាពិសេសកូនតូចៗ ព្រោះតំបន់នេះជាតំបន់ទន្លេដែលប្រឈមនឹងការកើតមានករណីលង់ទឹកជាយថាហេតុ។
លោក អ៊ុ ណារី ចៅសង្កាត់ចុងឃ្នៀស ក្រុងសៀមរាប បានថ្លែងអំណរព្រះគុណ និងអរគុណយ៉ាងជ្រាលជ្រៅចំពោះទឹកចិត្តព្រះសង្ឃក្រុងសៀមរាប ដែលបានយកចិត្តទុកដាក់ និងគិតគូរពីសុខទុក្ខ និងការលំបាករបស់គ្រួសារខ្វះខាតនៅមូលដ្ឋាននេះ ដែលជាសកម្មភាពមនុស្សធម៌ជួយចែករំលែកដល់អ្នកកំពុងមានតម្រូវការចាំបាច់ក្នុងជីវភាពប្រចាំថ្ងៃពិតប្រាកដមែន ៕
ដោយ៖ ពន្លឺ
