ខេត្តសៀមរាប ÷ អង្គការសកម្មភាពដើម្បីកុមារ ហៅកាត់ថា (APLE) ក្រោមកិច្ចសហការពីគណៈកម្មា ធិការប្រយុទ្ធប្រឆាំងអំពើជួញដូរមនុស្សខេត្តសៀមរាប បានរៀបចំសិក្ខាសាលាពិគ្រោះយោបល់ស្តីពី “ការប្រមូលធាតុចូល៖ ការអនុវត្តល្អៗ កត្តាប្រឈម និងអនុសាសន៍សម្រាប់ការឆ្លើយតបទៅនឹងអំពើកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ” នៅថ្ងៃទី២៧ ខែធ្នូ ឆ្នាំ២០២២នេះ នៅក្នុងខេត្តសៀមរាបដោយមានសិក្ខាកាមចូលរួមពីសំណាក់លោក លោកស្រី តំណាងមន្ទីរអង្គភាពពាក់ព័ន្ធជុំវិញខេត្ត លោក លោកស្រី មន្រ្តីមកពីតាមបណ្តាស្រុកគោលដៅ មានស្រុកស្រីស្នំ. អង្គរជុំ.បន្ទាយស្រី និងស្រុកអង្គរធំ ព្រមទាំងប្រតិបត្តិករអ៊ីនធឺណិតក្នុងខេត្តសៀមរាប និងតំណាងអង្គការដែលធ្វើការងារពាក់ព័ន្ធចូលរួមផងដែរ ។
លោក ខឹម វ៉ាន់ដូ ប្រធានបច្ចេកទេសផ្នែកកិច្ចការពារកុមារនៃអង្គការសកម្មភាពដើម្បីកុមារ បានមានប្រសាសន៍ថា ការរៀបចំសិក្ខាសាលានេះគឺ មានគោលបំណងពិភាក្សាលើចំណុចល្អៗដែលបានអនុវត្តកន្លងមក ការលើកយកចំណុចប្រឈម និងចន្លោះខ្វះខាតនានា ជាពិសេសពិភាក្សាស្វែងរកអនុសាសន៍នានា ក្នុងគោលដៅគិតគូរពិចារណា បន្តការគាំទ្រទៅវិញទៅមក ជាពិសេសជម្រុញឱ្យមានការប្រើប្រាស់អនុសាសន៍ទាំងនោះ ក្នុងការគិតពិចារណានៅពេលរៀបចំ គោលនយោបាយ ផែនការសកម្មភាព បទដ្ឋានគតិយុទ្ធ ឬគោលនយោបាយនានាសំដៅពង្រឹងការការពារកុមារឱ្យកាន់តែមានប្រសិទ្ធភាពពីការកេងប្រវ័ញ្ចផ្លូវភេទតាមអនឡាញ ។
លោកបានបន្ថែមទៀតថាការកេងប្រវ័ញ្ចផ្លូវភេទលើ កុមារតាមប្រព័ន្ធអនឡាញ ជាបញ្ហាសកល និងកំពុងបង្កហានិភ័យដល់កុមារ គួរឱ្យព្រួយបារម្ភ។ ក្នុងឆ្នាំ២០២១ របាយការណ៍របស់មជ្ឈមណ្ឌលជាតិសម្រាប់កុមារបាត់ខ្លួន និងត្រូវ បានកេងប្រវ័ញ្ច (NCMEC) របស់សហរដ្ឋអាមេរិកបានបង្ហាញពីចំនួនករណីនៃការកេងប្រវ័ញ្ចផ្លូវភេទ កុមារតាមអនឡាញដែលកើនឡើងដល់ជាង ២៩,៣លានករណីនៅទូទាំងពិភពលោក ឬកើន៣៥% ធៀបនឹងឆ្នាំ២០២០។ ទន្ទឹមគ្នានោះ របាយការណ៍របស់សមាគមបណ្ដាញរាយការណ៍បន្ទាន់អន្តរជាតិ (INHOPE) ឆ្នាំ២០២១ ក៏បានបង្ហាញថា ៨១% នៃកុមាររងគ្រោះពីរូបភាពរំលោភបំពានផ្លូវភេទមាន អាយុពី ៣ ទៅ ១៣ឆ្នាំ ១%ជាកុមារមានអាយុពី០ ទៅ ២ឆ្នាំ និង ៩៦% ជាក្មេងស្រី។
លោកវរសេនីយ៍ឯក ជា ហេង នាយការិយាល័យប្រឆាំងការជួញដូរមនុស្សនិងការពារអនីតិជននៃស្នងការនគរបាលខេត្តសៀមរាប បានមានថ្លែងថាការកេងប្រវ័ញ្ចផ្លូវភេទលើកុមារតាមអនឡាញកំពុងក្លាយជាក្ដីព្រួយបារម្ភសម្រាប់ពិភពលោកទាំងមូលនិយាយជារួម និងនិយាយឡែកសម្រាប់ប្រទេសកម្ពុជាជាពិសេសកុមារដែលជួបប្រទះបញ្ហានេះរួចទៅហើយ។ លោកបានថ្លែងបន្តទៀតថានៅក្នុងបរិបទនៃការរីកចម្រើន ខាងផ្នែកបច្ចេកវិទ្យា ព័ត៌មាន និងទូរគមនាគមន៍ និងកំណើននៃការប្រើប្រាស់ កម្ពុជាបានបោះជំហាន ទៅមុខក្នុងការប្រយុទ្ធប្រឆាំងការកេងប្រវ័ញ្ចផ្លូវភេទកុមារតាមប្រព័ន្ធអនឡាញនិងខិតខំប្រឹងប្រែងធ្វើ ឱ្យកាន់ តែប្រសើរឡើងនូវសុវត្ថិភាពអ៊ីនធឺណិតដើម្បីផ្ដល់បរិយាកាសឌីជីថលវិជ្ជមាន និងប្រកបដោយ សុវត្ថិភាពដល់អ្នកប្រើប្រាស់ ជាពិសេសកុមារដែលជាអ្នកប្រើប្រាស់យ៉ាងសកម្ម ជាពិសេសការប្រើប្រាស់សម្រាប់ការសិក្សាអប់រំរបស់ពួកគេ ដែលធ្វើឱ្យវិស័យបច្ចេកវិទ្យាព័ត៌មានមួយនេះរឹតតែទទួល បាននូវការពេញនិយមសម្រាប់ការទំនាក់ទំនង និងអភិវឌ្ឍន៍គ្រប់វិស័យ។ ដើម្បីបង្ការទប់ស្កាត់ និងឆ្លើយតបការកេងប្រវ័ញ្ចផ្លូវភេទ លើកុមារតាមប្រព័ន្ធអនឡាញនេះ យើងត្រូវ ពង្រឹងប្រសិទ្ធភាពការអនុវត្តគោលនយោបាយ និងអភិបាលកិច្ច លើកកម្ពស់យុត្តិធម៌ព្រហ្មទណ្ឌ លើកកម្ពស់វិធានការបង្ការទប់ស្កាត់ និងស្តារនីតិសម្បទាជនរងគ្រោះដោយអំពើកេងប្រវ័ញ្ចផ្លូវភេទតាមប្រព័ន្ធអនឡាញ .ពង្រឹងសុវត្ថិភាពសហគមន៍ពីការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ រួមនឹងការពង្រឹងលក្ខន្តិកៈសម្រាប់ការផ្តល់សេវាអ៊ីនធឺណិត និងបង្កើនការផ្សព្វផ្សាយ និងការយល់ដឹងត្រឹមត្រូវអំពីបញ្ហាការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ។ ទោះបីជាបច្ចេកវិទ្យាព័ត៌មានរីកចម្រើនក៏មានជ្រុងអវិជ្ជមានមួយចំនួន ពាក់ព័ន្ធនឹងការប្រើប្រាស់ខុសគោលដៅពីក្រុមឧក្រិដ្ឋជន ឆ្លៀតឱកាសទាញយកផលប្រយោជន៍ដោយខុសច្បាប់ ដូចជាៈការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ ដែលជាទម្រង់ថ្មីមួយកំពុងរាលដាល និងបង្កហានិភ័យខ្ពស់ដល់កុមារនៅលើពិភពលោក រួមទាំងកម្ពុជាផងដែរ។ យោងតាមការសិក្សាស្រាវជ្រាស្តីពីការវិភាគស្ថានភាពដំបូងនៃការកេងប្រវ័ញ្ចផ្លូវភេទកុមារតាមអនឡាញនៅកម្ពុជាឆ្នាំ២០២០ ដែលក្រុមប្រឹក្សាជាតិកម្ពុជាដើម្បីកុមារ (ក.ជ.ក) បានដឹកនាំ និងសម្រប សម្រួលប្រមាណ៦០%នៃកុមារកម្ពុជាដែលបានចូលរួមក្នុងដំណើរការអង្កេតត្រូវបានរាយការណ៍ថាធ្លាប់បានជួបប្រទះហានិភ័យនៃការកេងប្រវ័ញ្ចផ្លូវភេទតាមអន ឡាញនៅពេលពួកគេប្រើប្រាស់អ៊ីនធឺណិតដូចជាការលួងលោមក្នុងគោលបំណងផ្លូវភេទ និងការបង្ខំផ្ញើរូបអាក្រាតរបស់កុមារជាដើម។ ឆ្លើយតបនឹងបញ្ហាខាងលើ ពិភពលោកក៏ដូចជាប្រទេសកម្ពុជា បានកំពុងយកចិត្តទុកដាក់ និងរួម កម្លាំងគ្នា ដើម្បីបង្ការ ទប់ស្កាត់ និងឆ្លើយតបប្រកបដោយប្រសិទ្ធភាព៕
