ខេត្តសៀមរាប ÷ នៅថ្ងៃទី២៧ ខែតុលា ឆ្នាំ២០២២ នេះ អគ្គនាយកដ្ឋានរដ្ឋបាលនិងហិរញ្ញវត្ថុនៃក្រសួងព័ត៌មានសហការជាមួយអគ្គនាយកដ្ឋានទ្រព្យសម្បត្តិរដ្ឋនិងចំណូលមិនមែនសារពើពន្ឋនៃក្រសួងសេដ្ឋកិច្ចនិងហិរញ្ញវត្ថុ បានរៀបចំសិក្ខាសាលាស្តីពីវិធាននិងនីតិវិធីនៃការរៀបចំនិងការគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ ស្ថិតក្រោមអធិបតីភាព ឯកឧត្តម ថាច់ ផែន រដ្ឋលេខាធិការ តំណាងដ៍ខ្ពង់ខ្ពស់ ឯកឧត្តម ខៀវ កាញារិទ្ឋ រដ្ឋមន្ត្រីក្រសួងព័ត៌មាន រួមជាមួយនិងវត្តមានតំណាងក្រសួងសេដ្ឋកិច្ចនិងហិរញ្ញវត្ថុ ក្រសួងព័ត៌មានចូលរួមផងដែរ។
សិក្ខាសាលានេះមានរយៈពេល២ថ្ងៃដែលរៀបចំធ្វើនៅសណ្ឋាគារអង្គរប៉ារ៉ាឌីខេត្តសៀមរាប ហើយសិក្ខាសាលានេះដែរគឺរៀបចំឡើងដើម្បីបង្កើនសមត្ថភាពមន្ត្រីជំនាញ ទទួលបន្ទុកបញ្ជីសារពើភ័ណ្ឌទ្រព្យសម្បត្តិរដ្ឋឱ្យមានការយល់ដឹងអំពីរបៀបប្រើប្រាស់លើប្រព័ន្ធ SARMISឱ្យកាន់តែច្បាស់លាស់និងគ្រប់ជ្រុងជ្រោយ ក្នុងការធ្វើបច្ចុប្បន្នភាពនិងទំនើបកម្មសម្រាប់ការគ្រប់គ្រងទ្រព្យបញ្ជីសារពើភណ្ឌទ្រព្យសម្បត្តិរបស់រដ្ឋ និងជាការអនុវត្តផែនការសកម្មភាពនៃកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈរបស់រាជរដ្ឋាភិបាលកម្ពុជាដែលមានចក្ខុវិស័យប្រែក្លាយប្រព័ន្ឋហិរញ្ញវត្ថុសាធារណៈកម្ពុជាឆ្ពោះទៅកាន់ប្រព័ន្ឋហិរញ្ញវត្ថុសាធារៈផ្តោតលើសមិទ្ឋិកម្មនិងវិមជ្ឈការស្របតាមស្តង់ដារឧត្តមានុវត្តន៍អន្តរជាតិ។
សិក្ខាសាលានេះមានសិក្ខាកាមជាមន្ត្រីទទួលបន្ទុកការងារពាក់ព័ន្ឋនៃអគ្គនាយកដ្ឋានចំណុះក្រសួងព័ត៌មាន ព្រមទាំងលោក លោកស្រី ប្រធាន អនុប្រធានមន្ទីរព័ត៌មាន និងមន្ត្រីជំនាញពាក់ព័ន្ឋ មកពីរាជធានីខេត្តទាំង២៥។
ថ្លែងបើកអង្គសិក្ខាសាលា ឯកឧត្តម ថាច់ ផែន មានប្រសាសន៍ថា៖ តាមរយៈសិក្ខាសាលានេះ នឹងឱ្យយើងពង្រឹងសមត្ថភាពចំណេះដឹងបន្ថែមឱ្យកាន់តែច្បាស់លាស់និងអាចប្រើប្រាស់បានលើប្រព័ន្ធ SARMIS កាន់តែមានប្រសិទ្ឋភាពចាប់តាំងពីដំណាក់កាលទី១ដែលត្រូវបានដាក់ឱ្យអនុវត្តអស់រយៈពេលជិតមួយឆ្នាំកន្លងមកហើយ។ ឯកឧត្តមបញ្ជាក់ថា៖ពិតណាស់ ការដាក់ឱ្យសិក្សាបន្ថែមលើប្រព័ន្ឋSARMIS នឹងជួយលើកកម្ពស់ប្រសិទ្ឋភាព ការងារគ្រប់គ្រងទ្រព្យសម្បត្តិរដ្ឋ ការគ្រប់គ្រងបញ្ជីសារពើភ័ណ្ឌទ្រព្យសម្បត្តិរដ្ឋ នឹងជួយដោះស្រាយបាននូវបញ្ហាប្រឈមមួយចំនួនដែលកំពុងជួបប្រទះសព្វថ្ងៃ ដោយជួយ សម្រួលដល់ការគ្រប់គ្រងទ្រព្យសម្បត្តិរដ្ឋ ការបញ្ជូនបញ្ជីសារពើភ័ណ្ឌទ្រព្យសម្បត្តិរដ្ឋមកក្រសួងសេដ្ឋកិច្ចហិរញ្ញវត្ថុ។ ឯកឧត្តម ថាច់ ផែន បន្ថែមទៀតថា៖កត្តាជោគជ័យធំបំផុតក្នុងការអនុវត្តប្រព័ន្ឋSARMIS ត្រូវគិតគូរលើមធ្យោបាយហេដ្ឋារចនាសម្ព័ន្ឋបច្ចេក វិទ្យាព័ត៌មានវិទ្យាដូចជា កុំព្យូទ័រ កម្មវិធី ប្រព័ន្ឋអ៊ីន ធឺណិត ជាដើមនិងកត្តាធនធានមនុស្សមាសមត្ថភាព គ្រប់គ្រាន់ ដែលទាំងនេះនៅតែជាបញ្ហាចោទនៅ ឡើយ។ ឯកឧត្តជឿជាក់ថា មន្ត្រីជំនាញទទួលបន្ទុកបញ្ជីសារពើភ័ណ្ឌទ្រព្យសម្បត្តិរដ្ឋនៅតាមអាជ្ញាធរកាន់កាប់ទ្រព្យសម្បត្តិរដ្ឋនិងអង្គភាពប្រើប្រាស់និមួយ ៗនឹងប្រឹងប្រែងស្វែងយល់លំអិតអំពីការប្រើប្រាស់ប្រព័ន្ឋបច្ចេកវិទ្យាព័ត៌មានគ្រប់គ្រងបញ្ជីសារពើភ័ណ្ឌទ្រព្យសម្បត្តិរដ្ឋ(SARMIS)ដើម្បីឱ្យការងារអនុវត្ត គ្រប់គ្រងទ្រព្យសម្បត្តិរដ្ឋទាំងនោះប្រកបដោយប្រសិទ្ឋភាពខ្ពស់ និងប្រកបដោយភាពទទួលខុសត្រូវ និងរួមចំណែកឆ្លើយតបទៅនឹងចរន្តសកលនៃសេដ្ឋកិច្ចឌីជី ថលនិងបដិវត្តឧស្សាហកម្មទី៤។
អង្គសិក្ខាសាលទទួលបានការពន្យល់បកស្រាយពីគ្រូបង្គោលរបស់អគ្គនាយកដ្ឋានទ្រព្យសម្បត្តិរដ្ឋនិងចំណូលមិនមែនសារពើពន្ឋនៃក្រសួងសេដ្ឋកិច្ចនិង ហិរញ្ញវត្ថុទៅលើការរៀបចំតារាងប្រចាំឆ្នាំ និងការរៀបចំសារពើភ័ណ្ឌទ្រព្យសម្បត្តិរដ្ឋតាមប្រព័ន្ឋ SARMIS និងវិធាននិងលក្ខណៈវិនិច្ឆ័យនិងការធ្វើប្រទានកម្មទ្រព្យសម្បត្តិរដ្ឋជូនប្រជាពលរដ្ឋ និងមន្ត្រីរាជការជាដើម។ល៕
ដោយ ÷ ពន្លឺ
