មន្ត្រីជាន់ខ្ពស់ក្រសួង កសិកម្មដឹកនាំក្រុមការងារចាក់វ៉ាក់សាំងការពារជម្ងឺ អុតក្តាមដល់ សត្វពាហនៈនិងចុះពិនិត្យតាមដានសុខភាពសត្វនិងការចិញ្ចឹមសត្វរបស់ប្រជាកសិករក្នុងខេត្តសៀមរាប

ខេត្តសៀមរាប ÷ នៅថ្ងៃទី២០ខែតុលាឆ្នាំ២០២២ ឯកឧត្តម តាន់ ផាន់ណារ៉ា ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ និងក្រុមការងារចុះពិនិត្យតាមដានសុខភាពសត្វ បានអញ្ជើញចូលរួមក្នុងយុទ្ឋនាការចាក់ថ្នាំការពារជម្ងឺអុតក្តាមគោ ក្របី និងចែកថ្នាំបាញ់សម្លាប់មេរោគ និង Methylene blue ចំនួន២០០ដប នៅស្រុកសូទ្រនិគម និងស្រុកពួក បន្ទាប់មកបន្តចុះពិនិត្យការចិញ្ចឹមសត្វ នៅតំបន់រងគ្រោះដោយជំនន់ទឹកភ្លៀង ក្នុងស្រុក អង្គរជុំ ស្រីស្នំ និងស្រុកក្រឡាញ់ នៃខេត្តសៀមរាបផងដែរ។

លោក ព្រំ វិច ប្រធានការិយាល័យផលិតកម្ម និងបសុព្យាបាលនៃមន្ទីរកសិកម្ម រុក្ខាប្រមាញ់និងនេសាទខេត្តសៀមរាប បានរាយការណ៍ថា៖ថ្វីត្បិតស្រុកមួយចំនួនក្នុងជួបផលប៉ះពាល់ដោយសារជំនន់ទឹកភ្លៀងក្តី តែមិនបណ្តាលឱ្យប៉ះពាល់ដល់សុខភាពសត្វពាហនៈនោះទេ ។ ក្នុងរយៈពេល១០ខែឆ្នាំ២០២២ពុំមានជំងឺឆ្លងសត្វផ្ទុះឡើងគួរឱ្យកត់សម្គាល់អ្វីឡើយ ទន្ទឹមនឹងនេះ ការិយាល័យផលិតកម្ម និងបសុព្យាបាល បានចាក់ថ្នាំការពារជំងឺសារទឹក អុតក្តាម ដុំពក ដល់គោក្របីបានចំនួន៥៥.៣៦៩ក្បាលនិងចាក់ថ្នាំជាច្រើនប្រភេទដល់សត្វជ្រូកបានជិត២ម៉ឺន៥ពាន់ក្បាល ព្រមទាំងបានចាក់ការពារទៅលើបក្សី មាន់ទាបានជាង១លាន៥សែនក្បាលផងដែរ។ឆ្នាំ២០២២នេះ មន្ទីរកសិកម្មខេត្តសៀមរាបទទួលបានថ្នាំការពារពីអគ្គនាយកដ្ឋានសុខភាពសត្វនិងផលិតកម្មសត្វដូចជា ៖សារទឹកគោក្របី៥ម៉ឺនកម្រិត បុសខ្យល់៨ពាន់កម្រិត អុតក្តាម៣ពាន់កម្រិត បសុឱសថនិងសម្ភារៈបរិ ក្ខាមួយចំនួនទៀតផង។

ឯកឧត្តម តាន់ ផាន់ណារ៉ា ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានសុខភាពសត្វនិងផលិតកម្មសត្វ ក្រសួកសិកម្មរុក្ខាប្រមាញ់និងនេសាទ មានប្រសាសន៍ថា៖យុទ្ឋនាការចាក់ថ្នាំវ៉ាក់សាំងដល់សត្វពានៈ ជាវិធានការណ៍ល្អប្រសើរ ដើម្បីការពារទុកជាមុនកុំអោយកើតជម្ងឺផ្សេងៗ។ ការចាក់វ៉ាក់សាំងនេះគឺជួយសម្រាលការលំបាក របស់ប្រជាកសិករកុំអោយគោក្របីទំាងនោះឈឺឬងាប់នាំឲ្យបាត់បង់ចំណូលសេដ្ឋកិច្ចគ្រួសារ ។

ឯកឧត្តម បានណែនាំដល់បងបង្អូនប្រជាកសិករដែលមានសត្វពាហនៈត្រូវវយកចិត្តទុកដាក់បង្កើនទំនាក់ទំនងរាយការណ៍ពីសុខភាពសត្វដល់ភ្នាក់ងារសុខភាពសត្វភូមិនិងស្តាប់តាមការណែនាំរបស់អាជ្ញាធរមូលដ្ឋាន ដើម្បីទទួលបានព័ត៌មានអំពីការចាក់វ៉ាក់សាំងសត្វនិងត្រូវពិនិត្យតាមដានឱ្យបានជាប្រចាំ បង្ការពីការឆ្លងជំងឺ ឈឺ ឬស្លាប់របស់សត្វ ព្រោះវានាំឱ្យខាតបង់ថវិកាគ្រួសារ ជាពិសេសត្រូវប្រុងប្រយ័ត្នទៅលើ ជំងឺសារទឹក អុតក្តាមនិងជំងឺដុំពក ឯកឧត្តម តាន់ ផាន់ណារ៉ា បញ្ជាក់ផងដែរថា៖វ៉ាក់សាំងគ្រាន់តែជាផ្នែកមួយជួយការពារពីជំងឺរបស់សត្វតែប៉ុណ្ណោះ តែបើចង់ឱ្យសត្វពាហនៈមានសុខភាពល្អគឺផ្តល់ស្មៅឬចំណីនិងទឹកឱ្យបានគ្រប់គ្រាន់ រួមផ្សំជាមួយការសំអាតអនាម័យក្រោលជាប្រចាំផង ទើបសត្វលូតលាស់និងមានសុខភាពល្អ៕

ដោយ ÷ ពន្លឺ