ខេត្តបាត់ដំបង ÷ នៅថ្ងៃអង្គារ៍១២រោចឆ្នាំឆ្លូវត្រីស័កព.ស.២៥៦៥ ត្រូវ និងថ្ងៃទី២៩ខែ មីនា ឆ្នាំ ២០២២ វេលាម៉ោង ០៨និង០០នាទី នៅចំណុចក្រុមទី០៨ ភូមិនិគមកណ្ដាល ឃុំជ្រោយស្ដៅ ស្រុកថ្មគោល មានករណី អំពើហិង្សាក្នុងគ្រួសារ (ធ្វើឱ្យខូចខាតដោយចេតនា) បង្កដោយជនសង្ស័យឈ្មោះ ទី រស់ ភេទប្រុស អាយុ២៥ឆ្នាំត្រូវជាកូនបង្កើតបានយក កាំបិតកាប់ជញ្ជាំងស័ង្កសីជុំវិញផ្ទះ និងដុតសម្ភារ:ក្នុងផ្ទះរបស់ជនរងគ្រោះឈ្មោះ យូ សឿង ភេទប្រុស អាយុ៥១ឆ្នាំត្រូវជាឪពុកបង្កើតមានទីលំនៅក្រុមទី០៨ ភូមិនិគមកណ្ដាល ឃុំជ្រោយស្ដៅ ស្រុកថ្មគោល បណ្ដាលឱ្យខូចខាតសម្ភារៈមួយចំនួនធំ។
ភ្លាមៗដោយអនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការ នៃស្នងការដ្ឋាននគរបាលខេត្តបាត់ដំបងរួមនឹងយោបល់លោកស្រីឧត្តមសេនីយ៍ត្រី រស់ ជីវី ស្នងការរងផែនការងារប្រឆាំងការជួញដូរមនុស្សនិងការពារអនីតិជន លោកវរសេនីយ៍ទោ សេង លុច អធិការនគរបាលស្រុកថ្មគោល បានដឹកនាំកម្លាំងចុះអន្តរាគមន៍ពន្លត់ភ្លេីងដែលឆេះដោយការដុតបំផ្លាញនេះ ហេីយអនុវត្តនាំខ្លួនកូនប្រុសដែលជាជនបង្កនេះមកកាន់អធិការដ្ឋាននគរបាលស្រុក ដោយដកហូតបាន៖ កាំបិតខ្វែវដងឈើចំនួន០១។
បច្ចុប្បន្នជនសង្ស័យត្រូវបានឃាត់ខ្លួននៅក្នុងអធិការដ្ឋាននគរបាលស្រុកថ្មគោលដើម្បីរៀបចំសំណុំរឿងចាត់ការតាមនីតិវិធីច្បាប់៕
ដោយ ÷ គង់ សឿន
