ខេត្តឧត្តរមានជ័យ ៖ នៅរសៀលថ្ងៃទី ០៧ ខែ មករា ឆ្នាំ២០២៦ ព្រះគ្រូវិចិត្រវង្សា ហែម គឹមសាន ញាតិធម្មោ ព្រះចៅអធិការវត្តប្រាសាទគោកចក និង លោកស្រី ឈិន សាវី ចៅសង្កាត់គោកចក ក្រុង/ខេត្តសៀមរាប បានដឹកនាំពុទ្ធបរិស័ទ ចុះសួរសុខទុក្ខ និងនាំយកនូវគ្រឿងឧបភោគបរិភោគ សម្ភារៈប្រើប្រាស់ មួយចំនួនដូចជា អាវរងារ, ភេសជ្ជៈ ថវិកាមួយចំនួន ផ្តល់ជូនដល់បងប្អូនកងទ័ពជួរមុខទិស ស្រុកអន្លង់វែង ក្នុងភូមិសាស្ត្រខេត្តឧត្តរមានជ័យ ។
ព្រះតេជគុណ ហែម គឹមសាន ក្នុងនាមជាអ្នកនៅសមរភូមិក្រោយមិនដែលភ្លេចសោះឡើយនូវសុខទុក្ខនិងការលំបាកអ្នកនៅសមរភូមិមុខ ហើយព្រះសង្ឃតែងតែកៀរគរជំនួយពីសប្បុរសជនជិតឆ្ងាយដើម្បីចែករំលែកក្នុងន័យ រួមសុខរួមទុក្ខជាមួយសមរភូមិមុខក្នុងគ្រប់កាលៈទេសៈ ជាពិសេសលើការឧបត្ថម្ភស្បៀងអាហារ ថវិកា សំភារៈប្រើប្រាស់ប្រចាំថ្ងៃ ទាំងពេលនេះនិងពេលកន្លងមកដល់អង្គភាពទ័ពជួរមុខក៏ដូចជាគ្រួសារភៀសសឹកមកស្នាក់នៅក្នុងវត្ត ។
ព្រះតេជគុណ បានកោតសរសើរនូវទឹកចិត្តលះបង់និងស្មារតីអង់អាចក្លាហានរបស់បងប្អូនកងទ័ពទាំងអស់ដែលកំពុងការពារទឹកដីរបស់យើង ហើយតាមរយៈការលះបង់នេះ សូមបន្តរួមគ្នារក្សាសាមគ្គីភាពឯកភាពជាធ្លុងមួយឱ្យកាន់តរឹងមាំនិងជ្រោងខ្ពស់ស្មាតីស្នេហាជាតិ
ក្នុងការបំពេញភារកិច្ចការពារបូរណៈភាពទឹកដីពីសត្រូវឈ្លានពាន ។
ព្រះតេជគុណបានសំដែងនូវការដឹងគុណជាទីបំផុត ចំពោះទឹកចិត្តមោះមុតក្លាហានរបស់វីរយុទ្ធជនដែលកំពុងឈរជើងនៅសមរភូមិតាមព្រំដែនក្នុងការការពារបូរណភាពទឹកដីប្រឆាំងនឹងការយារយីឈ្លានពានរបស់កងទ័ពថៃ។ព្រះតេជគុណ មានថេរដីការថា៖ស្ថិតក្នុងស្ថានភាពសង្គ្រាមបានស្ងប់ស្ងាត់ហើយនេះ សូមកងកម្លាំងយើងរក្សាស្មារតីប្រុងប្រយ័ត្នគ្រប់ពេលវេលា មានភាពអត់ធ្មត់និងជឿជាក់លើប្រមុខរាជរដ្ឋាភិបាល និងស្តាប់មេបញ្ជាការរបស់ខ្លួន តែត្រូវចាំថាសត្រូវតែមួយគត់របស់យើងគឺថៃ ។
តំណាងយោធិនបានសម្តែងនូវអំណរគុណយ៉ាងជ្រាលជ្រៅ ចំពោះទឹកចិត្តគិតគូរពីសុខទុក្ខដល់កងកម្លាំងប្រដាប់អាវុធជួរមុខរបស់ព្រះសង្ឃនិងសប្បុរសជនជិតឆ្ងាយ តែងតែបានគិតគូរពីសុខរួមទុក្ខជាមួយសមរភូមិមុខ នៅចំពោះមុខសភាពស្ងប់ស្ងាត់នៅតាមបណ្តោយព្រំដែនកម្ពុជា-ថៃ នេះពួកយើងប្រុងស្មារតីគ្រប់ពេលវេលា ដើម្បីតស៊ូការពារនូវបូរណភាពទឹកដីក្នុងភូមិសាស្រ្តរបស់ខ្លួននិងស្តាប់អនុវត្តជានិច្ចនូវរាល់បទបញ្ជារបស់ប្រមុខរាជរដ្ឋាភិបាលដើម្បីសុខសន្តិភាពស្ថិរភាព ជូនជាតិមាតុភូមិ ៕
ដោយ៖ ពន្លឺ
