ខេត្តកំពង់ធំ ÷ ក្រោយពីបានស្តាប់ប្រសាសន៍សម្តេចនាយករដ្ឋមន្ត្រីដែលមានសម្លេងខ្លាំងៗចង្អុលមុខមេក្រសួង២ គឺក្រសួងបរិស្ថាន និងក្រសួងកសិកម្ម និងអស់លោកចៅហ្វាយខេត្តដែលគ្រប់គ្រងធនធានធម្មជាតិអត់បាន មានដូចជាមច្ឆាជាតិ ព្រៃឈើជាដើម ដែលពេលនេះសម្តេចបញ្ជាឲ្យបង្រ្កាបអាពួកបំផ្លាញសម្បត្តិធម្មជាតិឲ្យខានតែបាន ដោយតម្រូវឲ្យមានការបាញ់ក្បាលបើមានការចាំបាច់នោះ មហាជនពិតជាមានការសាទរពេកណាស់ដើម្បីរក្សាសម្បត្តិជាតិរបស់ខ្មែរឲ្យនៅគង់វង្សយូរអង្វែង ។ ហើយពេលនេះដែរ យើងក៏សូមបង្ហាញជូននូវជនបំផ្លាញជាតិជើងខ្លាំងដុះស្លែនៅខេត្តកំពង់ធំ ដែលតែងសហការបានល្អជាមួយមន្រ្តីគ្រប់លំដាប់ថ្នាក់នោះ គឺបុគ្គលឈ្មោះ ដួង ស្រួច។ ហើយថាតើ ដួង ស្រួច ជានរណា? លោក ដួង ស្រួច គឺជាមនុស្សមានឥទ្ធិពលម្នាក់ ហើយមហាជនបានឮឈ្មោះជាច្រើនឆ្នាំមកហើយ ខាងរត់ឯកសាររត់ការទៅថ្នាក់លើដើម្បីបំផ្លាញធនធានធម្មជាតិ ជាក់ស្ដែងថ្មីៗនេះបានលេចមុខនៅពីក្រោយខ្នង មេឧក្រិដ្ឋជនបំផ្លាញព្រៃឡង់ ដែលមានឈ្មោះក្រិត សុខលន់ ឧក្រិដ្ឋជនព្រៃឈើ ក្រិត សុខលន់ និងយាយភឿន នៅតែបន្តចូលអារកាត់ឈើក្នុង ដែនអភិរក្សជម្រកសត្វព្រៃឡង់ដោយឥតខ្លាចញញើតច្បាប់ អាងលោកឌួង ស្រួចនៅពីក្រោយខ្នង ។
យើងដឹងហើយថាដែនអភិរក្សសត្វព្រៃឡង់ គឺជាព្រៃដែលត្រូវបានហាមឃាត់ មិនឲ្យបុគ្គលណាម្នាក់ចូលកាន់កាប់ និងអាស្រ័យផល ឬអារកាត់ឈើរបស់រដ្ឋបានឡើយ តែដោយសារតែចម្លែកស្រាប់តែ មានឧក្រិដ្ឋជនព្រៃឈើ ឈ្មោះ ក្រិត សុខលន់ ប្រពន្ឋឈ្មោះយាយ ភឿន បានធ្វើសកម្មភាពចូលអារឈើយ៉ាងអាណាធិបតេយ្យ ដោយឥតខ្លាចញញើតច្បាប់ឡើយ។
យោងតាមសេចក្តីរាយការណ៍ ត្រូវបានបញាក់ថា លោក ក្រិត សុខ លន់ និងយាយភឿន បានធ្វើសកម្មភាព ឃុបឃិតគ្នាជាប្រព័ន្ឋជាមួយមន្រ្តីជំនាញ បរិស្ថាន មេព្រៃ ជាមន្ត្រីគ្រាប់ល្ពៅស្ងោរមួយចំនួន និងអាជ្ញាធរមួយចំនួនទៀត ដោយត្រូវដងត្រូវផ្លៃនិងគ្នា ទើបបុគ្គលទាំងពីរនាក់នេះ ហ៊ានចូលទៅកាប់ឈើដោយសេរី នៅក្នុងដែនជម្រកសត្វព្រៃឡង់ ជាច្រើនឆ្នាំមកហើយ។
ជាក់ស្តែងសកម្មភាពដឹកជញ្ជូនឈើដោយខុសច្បាប់នេះត្រូវបាន ដឹកឈើចេញពីព្រៃឡង់ ចំនុចបឹងអូទឹកម៉ូ ជាំរៀម បន្ទាប់ពីអារកាត់ជ្រៀរួច ដឹកចូលមកតាមក្រុមហ៊ុន ស៊ីអរស៊ីខេ ហើយឆ្លងកាត់តំបន់អូរងាវ ស្ថិតនៅក្នុងឃុំដងកាំបិត ស្រុកសណ្ដាន់ ខេត្តកំពង់ធំ ឆ្ពោះទៅដាក់ដេប៉ូឈើដ៏ធំមួយនៅក្នុងខេត្តកំពង់ធំ ដែលបង្កើតឡើងសម្រាប់តែទិញឈើខុសច្បាប់។
សូមបញ្ជាក់ផងដែរថាកន្លងមកឲ្យតែមានបទល្មើស នេសាទ ឬបទល្មើសព្រៃឈើ អ្នកសារព័ត៌មាន បានរាយណ៍ជូនលោក វេង សាខុន រដ្ឋមន្រ្តីក្រសួងកសិកម្មរុក្ខាប្រម៉ាញ់ និងនេសាទ តែលោកបានមានប្រសាស៍ថា បញ្ហាបង្រ្កាបបទល្មើសត្រូវបានផ្តល់សិទ្ធិឲ្យលោកអភិបាលខេត្ត ជាអ្នកបង្រ្កាប ព្រោះជាប្រធានគណ:បញ្ជាការឯកភាពរដ្ឋបាលខេត្ត។
ក្នុងនោះប្រជាពលរដ្ឋ បានសំណូមពរយ៉ាងទទូច ដល់ លោក សាយ សំអាល់ រដ្ឋមន្ត្រីក្រសួងបរិស្ថាន និង លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ជាពិសេស លោក ងួន រតនៈអភិបាលខេត្តកំពង់ធំ និងស្ថាប័នតុលាការខេត្តកំពង់ធំ មេត្តាជួយអន្តរាគមន៍ចាត់វិធានការបង្រ្កាបបទល្មើសព្រៃឈើ ចំពោះឈ្មួញខាងលើ ដែលកំពុងបំផ្លាញព្រៃឈើក្នុងដែនជម្រកព្រៃឡង់ផងទាន។
មហាជនកំពុងរង់ចាំតាមដានយ៉ាងអន្ទះសារ ថាតើសម្រែករបស់សម្តេចលើកនេះដែលជាការប្រគល់ដាវ អាជ្ញាសឹកទៅឲ្យមេខេត្ត មេប៉ូលីសជាតិ មេបញ្ជាការកងទ័ពជាតិ ត្រូវតែបង្រ្កាបឲ្យដល់ឬសគល់ និងចាប់ឲ្យបានពពួកជនបំផ្លាញសម្បត្តិជាតិនិងអ្នកនៅពីក្រោយខ្នង អ្នកផ្សំគំនិត ត្រូវតែកំចាត់ចោលនោះ ថាតើវាមានប្រសិទ្ធភាពក្នុងកំរិតណា?។ ក្នុងន័យនេះដែរ សារព័ត៍មានគេហទំព័រ អស្កាយញូសិ៍ នឹងចូលរួមជាមួយប្រសាសន៍របស់សម្តេចធ្វើជាផ្ទាំងសំពត់សក្នុងការបើកបង្ហាញមុខពួកជនដែលធ្វើឲ្យសម្បត្តិជាតិរលាយ ដែលប្រជាពលរដ្ឋតែងតែខឹង និងដាក់ទោសមកលើការដឹកនាំរបស់សម្តចតេជោនោះ គឺត្រូវតែឲ្យពួកទាំងនោះចូលទៅសំរាន្តយ៉ាងស្ងៀមស្ងាត់នៅក្នុងវិមានស ដែលគេនិយមហៅថាគុកព្រៃសនោះឲ្យបានជាដាច់ខាត៕
ដោយ ÷ វិបុល
