ភ្នំពេញៈ ព្រះករុណា ព្រះបាទ សម្តេចព្រះ បរមនាថ នរោត្តម សីហមុនី នៅព្រលប់ថ្ងៃទី ២៣ ខែសីហានេះ បានចេញព្រះរាជក្រឹត្យមួយ ត្រាស់បង្គាប់ឲ្យលើកលែងទោស លោក សួន សេរីរដ្ឋា អតីតប្រធានគណបក្សអំណាចខ្មែរ ដែលត្រូវបានតុលាការផ្តន្ទាទោសឲ្យជាប់ពន្ធនាគារ ៥ ឆ្នាំ និងពិន័យជាប្រាក់ចំនួន ១០ លានរៀលពាក់ព័ន្ធការប្រមាថទៅដល់ថ្នាក់ដឹកនាំកងយុទ្ធពលខេមរភូមិន្ទ។ នេះបើយោងតាមដីការបស់អយ្យការអមសាលាដំបូងរាជធានីភ្នំពេញ ដែលសារព័ត៌មាន Fresh News បានបង្ហោះនៅយប់ថ្ងៃនេះ។
ដីកាបង្គាប់ឲ្យដោះលែង របស់អយ្យការសាលាដំបូងរាជធានី ដែលចេញកាលពីព្រលប់ម្សិលមិញដូចគ្នា បានសរសេរថា៖ «តាមអំណាចព្រះរាជក្រឹត្យខាងលើ ឈ្មោះ សួន សេរីរដ្ឋា ភេទប្រុស កើតថ្ងៃទី ០៧ ខែកញ្ញា ឆ្នាំ១៩៧៣ ត្រូវបានលើកលែងទោស»។
បើតាមដីកាបង្គាប់ឲ្យដោះលែង លោក សួន សេរីរដ្ឋា កើតថ្ងៃទី ០៧ ខែកញ្ញា ឆ្នាំ១៩៧៣ ត្រូវបានតុលាការសម្រេចផ្តន្ទាទោសឲ្យជាប់ពន្ធនាគារ ៥ ឆ្នាំ និងពិន័យជាប្រាក់ចំនួន ១០ លានរៀល ពីបទញុះញង់កុំឲ្យយោធិន ស្តាប់បង្គាប់មេដឹកនាំ ធ្វើឲ្យខូចទឹកចិត្តកងទ័ព និងបទញុះញង់ឲ្យប្រព្រឹត្តបទឧក្រិដ្ឋជាអាទិ៍ តាមអំណាចសាលដីកាលេខ ១៤៩ ចុះថ្ងៃទី១៨ ខែ ០៥ ឆ្នាំ២០១៨ របស់តុលាការកំពូល»។
លោក សួន សេរីរដ្ឋា ត្រូវបានសមត្ថកិច្ចចាប់ខ្លួន កាលពីរសៀលថ្ងៃទី ១៣ ខែសីហា ឆ្នាំ ២០១៧ បន្ទាប់ពីបានសរសេរបង្ហោះ តាមបណ្តាញសង្គមហ្វេសប៊ុករបស់លោកដោយបានធ្វើការរិះគន់ខ្លាំងៗទៅលើថ្នាក់ដឹកនាំ ជាពិសេសស្ថាប័នកងយោធពលខេមរភូមិន្ទទាំងមូល នូវព្រឹត្តិការណ៍ប្រឈមមុខដាក់គ្នា រវាងកងទ័ពកម្ពុជា និងកងទ័ពឡាវ នៅព្រំដែនខេត្តស្ទឹងត្រែង ហើយបានធ្វើឱ្យមានប្រតិកម្មយ៉ាងខ្លាំងពីសំណាក់មេបញ្ជាការកងទ័ពជាច្រើន៕
ដោយ ៖ សំណាង
