ខេត្តបាត់ដំបង ÷ នៅថ្ងៃសុក្រ៩កេីតខែផល្គុនឆ្នាំឆ្លូវត្រីស័កព.ស.២៥៦៥ ត្រូវនឹងថ្ងៃទី១១ខខែមីនា ឆ្នាំ២០២២ វេលាម៉ោង៩និង១០នាទីព្រឹក នៅត្រង់ចំណុចក្រុមទី៣ ភូមិព្រៃតូច ឃុំព្រៃតូច ស្រុកមោងឫស្សី ខេត្តបាត់ដំបង អនុវត្តតាមបទបញ្ជារបស់លោកឧត្ដមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង និងក្រោមដឹកនាំចង្អុលបង្ហាញដោយលោកវរសេនីយ៍ឯក លឹម ពុទ្ធីឡា ស្នងការរងផែនការងារនគរបាលព្រហ្មទ័ណ្ឌ លោកវរសេនីយ៍ឯក ស គឹមឡុង អធិការនគរបាលស្រុកមោងឫស្សីបានដឹកនាំកំលាំងផ្នែកនគរបាលយុត្តិធម៌ នៃអធិការដ្ឋាននគរបាលស្រុកមោងឫស្សី រួមជាមួយកំលាំងប៉ុស្តិ៍នគរបាលរដ្ឋបាលព្រៃតូច បានអនុវត្តដីកាបង្គាប់ឱ្យចាប់ខ្លួនលេខៈ៣៩២ ដប.ចខ ចុះថ្ងៃទី១០ វិច្ឆិកា ២០១៥ របស់លោក យិច ឈាណាវី ប្រធានក្រុមប្រឹក្សាជំនុំជម្រះនៃសាលាដំបូងខេត្តបាត់ដំបង បង្គាប់ឱ្យចាប់ខ្លួនលើឈ្មោះ ហួត ហៀ ភេទប្រុស បច្ចប្បន្នអាយុ៣០ឆ្នាំ មានទីលំនៅភូមិស្ទឹងចក ឃុំព្រៃតូច ស្រុកមោងឫស្សី ខេត្តបាត់ដំបង ជាប់ចោទពីបទប៉ុនប៉ងឃាតកម្មគិតទុកជាមុន ប្រព្រឹតនៅចំណុចភូមិស្ទឹងចក ឃុំព្រៃតូច ស្រុកមោងឫស្សី ខេត្តបាត់ដំបង កាលពីថ្ងៃទី១៣ មីនា ២០០៩ ។
បច្ចុប្បន្នជនសង្ស័យ ខាងលើកំលាំងជំនាញនៃអធិការដ្ឋាននគរបាលស្រុកបានរៀបចំបញ្ជូនមកការិយាល័យជំនាញខេត្តដើម្បីអនុវត្តតាមនីតិវិធីច្បាប់៕
ដោយ ÷ គង់ សឿន
