ខេត្តបាត់ដំបង ៖ ធ្លាយរឿងអាស្រូវមួយ ចេញពីវិទ្យាល័យ ហ៊ុន សែន តាស្តា បន្ទាប់ពីមានអាណាព្យាបាលសិស្សជាច្រើនបានសម្តែងនូវការមិនពេញចិត្តទៅលើលោកនាយកសាលា ដោយសារតែមានការដកហូតទូរស័ព្ទពីសិស្សយកទៅទុករាប់ខែរហូតដល់១ឆ្នាំ មិនប្រគល់អោយវិញបើទោះបីជាពួកគាត់ចូលខ្លួនទៅធ្វើកិច្ចសន្យាជំនួសកូនៗរបស់គាត់ក៏ដោយ។
ថ្មីៗនេះមានមាតាបិតាសិស្សជាច្រើនដែលមានកូនរៀននៅវិទ្យាល័យ សម្តេចតេជោ ហ៊ុន សែន សំពៅលូន ស្ថិតក្នុងភូមិតាស្តា ឃុំតាស្តា ស្រុកសំពៅលូន ខេត្តបាត់ដំបង ដែលបានប្រតិកម្មទៅលើលោកនាយកសាលាឈ្មោះ សុខា ប៊ុណ្ណា ដែលបានចាប់ដកហូតទូរសព្ទ័ពីសិស្សជាច្រើនគ្រឿង ដោយប្រើភាសាថា ជាការព្រមានទៅលើសិស្សណាដែលលែងទូរស័ព្ទក្នុងម៉ោងសិក្សាដែលលោកដកហូតនេះទៅតាមបទបញ្ជាផ្ទៃក្នុងរបស់សាលា។
ឆ្លើយតបនឹងសំណួរអ្នកសារព័ត៌មាន លោកនាយក សុខា ប៊ុនណា បានឲ្យដឹងថា៖ ការធ្វើបែបនេះគឺក្នុងគោលបំណងពង្រឹងសិស្សានុសិស្ស មិនអោយមានការលែងទូរស័ព្ទនៅក្នុងម៉ោងសិក្សា។ លោកបន្ថែមទៀតថាមកទល់ថ្ងៃនេះលោកចាប់ដកហូតទូរស័ព្ទជាច្រើនគ្រឿងហើយ ដោយក្នុងទូរស័ព្ទដែលចាប់គឺលោករក្សាទុក(ដាក់គុក)មានកំណត់រយ:ពេលមួយឆ្នាំ ចំពោះរឿងចូលខាតលោកមិនបានឆ្លើយថាទទួលខុសត្រូវឡើយ។ ចុងក្រោយលោកបានសង្កត់ធ្ងន់ថា បើទោះបីជាអាណាព្យាបាលសិស្ស ចូលខ្លួនមកធ្វើកិច្ចសន្យាក៏ដោយក៏លោកមិនប្រគល់អោយវិញជាដាច់ខាត តែបើចង់បានទូរស័ព្ទវិញ គឺលោកប្រគល់អោយវិញបាន លុះត្រាតែសិស្សនោះចាកចេញពីសាលានេះ ហើយទៅរៀននៅកន្លែងផ្សេង ដោយមិនអនុញ្ញាតអោយរៀននៅក្នុងវិទ្យាល័យនេះតទៅទៀតបានឡើយ។
មួយរយ:នេះក៏មានសិស្សខ្លះទទួលបានមកវិញនៅក្នុងរយ:ពេលនៃការដកហូត ៦ ខែ ប៉ុន្តែទូរស័ព្ទតម្លៃរាប់រយដុល្លារ ពេលយកមកវិញត្រូវគាំងគ្រឿងអស់ ប្រើលែងកើតទៅហើយ ដូច្នេះតើអ្នកណាទទួលខុសត្រូវលើបញ្ហានេះ? ចំពោះលោក សំអាត ប្រធានការិយាល័យអប់រំស្រុកសំពៅលូនលោកបានឲ្យដឹងថា រាល់ការរឹតបន្តឹងនិងការចាប់ដកហូតទូរស័ព្ទសិស្សដោយមានកំណត់ពេលមួយឆ្នាំបែបនេះ លោកមិនបានដឹងនោះទេលោកបានឲ្យអាណាព្យាបាលទៅទំនាក់ទំនងជាមួយលោកនាយកផ្ទាល់ ហើយលោកនឹងឲ្យក្រុមការងារចុះសិក្សាក្នុងរឿងនេះ។
ដោយឡែកខាងឪពុកម្តាយសិស្សនៅសាលាខាងលើកំពុងឆ្ងល់លោកនាយកហ្នឹងយកច្បាប់មកពីណា! តើមានច្បាប់ដកហូតយកទូស័ព្ឌគ្មានដែនកំណត់តាមរបៀបចង់សុីដាច់ចឹងដែររឺទេ? វាគួរតែមានការ យោគយល់រឺមានការណែនាំនៅពេលដែលអាណាព្យាបាល ចូលខ្លួនទៅធ្វើកិច្ចសន្យាទទួលកំហុស ចំពោះកូនៗពួកគេបានប្រព្រឹត្តខុសនឹងវិន័យសាលា ឫក៏លោកនាយកតម្រូវឲ្យសិស្សណាដែលលេងទូរស័ព្ទក្នុងថ្នាក់នោះត្រូវកត់មេរៀនណាមួយឲ្យបាន១០០ចប់ជាដើម ដើម្បីជាការព្រមាន និងឲ្យពួកសិស្យទាំងនោះចេះចាំមេរៀនទៀតផងដើម្បីជាទំពាំងស្នងឫស្សី។
ពួកគាត់បានបន្ថែមថា៖ តើបទបញ្ជាផ្ទៃក្នុងរបស់លោក សុខា ប៊ុណ្ណា ជានាយកនៃ វិទ្យាល័យ សម្តេចតេជោ ហ៊ុន សែន សំពៅលូន បានចែងអំពីបញ្ជាដកហូតទូរស័ព្ឌនេះដែររឺទេ តើលោករដ្ឋមន្ត្រី ហង់ ជួនណារ៉ុន បានជ្រាបដែរឫទេ? ដោយឡែកត្រង់មាត្រា ៣៥៣ នៃក្រមព្រហ្មទណ្ឌ ឆ្នាំ២០១១ ទំព័រ១១៦ និយមន័យនៃ អំពើលួច គឺជាអំពើដកហួតដោយទុច្ចរិតនូវទ្រព្យសម្បត្តិ ឫវត្ថុផ្សេងទៀតរបស់អ្នកដ៏ទៃ តាមគ្រប់មធ្យោបាយក្នុងគោលបំណងយកមកធ្វើជាកម្មសិទ្ធិរបស់ខ្លួន។
ជាសំណូមពរពីអាណាព្យាបាលសិស្សខាងលើបានស្នើសុំមកអង្គភាពគេហទំព័រ អស្កាយញូសិ៍ (RskyNews) យើងខ្ឥ្ញុំឲ្យចុះផ្សាយ និងសូមសួរតាមត្រង់ទៅកាន់លោកប្រធានការិយាយ័យអប់រំស្រុកសំពៅលូន រឺ លោកប្រធានមន្ទីរអប់រំខេត្តបាត់ដំបង មេត្តាបកស្រាយឲ្យបានច្បាស់ ថាតើវាជាច្បាប់របស់ក្រសួងអប់រំដែលដាក់ឲ្យសាលានានាអនុវត្តន៍ រឺក៏ជាច្បាប់លោកនាយក សុខា ប៊ុនណា នៃវិទ្យាល័យ សម្តេចតេជោ ហ៊ុន សែន សំពៅលូន តែម្នាក់ឯង៕
ដោយ ៖ គង់ សឿន
