រាជធានីភ្នំពេញ ៖ វាជារឿងស្ទើរមិនគួរឲ្យជឿដែលខ្លួនជាមេប៉ូលីសខេត្តមួយទាំងមូល បែរជាមកធ្វើរឿងដូចពួករកសុីគួកជេដី សុីដាច់គ្នាទៅវិញទៅមកអញ្ចឹង សោះ ករណីលោកឧត្តមសេនីយ៍ទោ ស ថេង ស្នងការនគរបាលខេត្តពោធិ៍សាត់និងឈ្មោះ លន់ ឡន ហៅ ឡុង ត្រូវបានជនរងគ្រោះប្តឹងពីបទ «ឆបោកនិងរំលោភលើទំនុកចិត្ត» ពាក់ព័ន្ធលុយចំនួន១០ម៉ឺនដុល្លារអាមេរិក។ មិនតែប៉ុណ្ណោះលោកស្នងការរូបនេះក៏ត្រូវបានមហាជននិយាយតៗគ្នាថាត្រូវជាសាច់ញាតិរបស់សម្តចក្រឡាហោម ស ខេង ទៀតផង តែក្រោយ មកត្រូវបានសម្តេចបដិសេធថាមិនជាប់ទាក់ទិន។
ឥឡូវយ៉ាងណាក៏ដោយចុះពាក្យបណ្ដឹងព្រហ្មទណ្ឌរបស់ជនរងគ្រោះបានដាក់ចូលរួចហើយគោរពជូនលោកព្រះរាជអាជ្ញាអមសាលាដំបូងខេត្តកំពង់ឆ្នាំង កាលពីចុងឆ្នាំ២០២១ ថ្មីៗនេះ ហើយតុលាការក៏បានចេញដីកាកោះហៅក្រុមជនសង្ស័យចូលខ្លួនបំភ្លឺជាបន្តបន្ទាប់ផងដែរ ។
យោងតាមឯកសារមួយចំនួននិងជនរងគ្រោះផ្ទាល់ គឺ លោក ឃុន ពុទ្ធី បានអោយដឹងថា កាលពីថ្ងៃទី០១ ខែកក្កដា ឆ្នាំ២០២១ លោក ឃុន ពុទ្ធី បានចុះកិច្ចព្រមព្រៀងទិញដីមួយកន្លែងទំហំជាង១៣ហិកតា ស្ថិតនៅចំណុចភូមិសិឡាង ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំ ពីលោក ស ថេង ក្នុងតម្លៃព្រមព្រៀងគ្នា២០ម៉ឺនដុល្លារអាមេរិក។ ក្រោយពីធ្វើការពិភាក្សានិងចរចាតម្លៃនៃការទិញលក់រួចមក លោក ឃុន ពុទ្ធី បានបង់ប្រាក់ជាបន្តបន្ទាប់ចំនួន៤លើក សរុបទាំងអស់១០ម៉ឺនដុល្លារអាមេរិក ទៅអោយ លោក ស ថេង ។ជនរងគ្រោះរៀបរាប់ទៀតថា លោក ស ថេង សន្យាតែមួយរយៈពេលខ្លីប៉ុណ្ណោះនឹងចុះធ្វើការវាស់វែងព្រមទាំងធ្វើឯកសារផ្ទេរសិទ្ធិដែលមានចុះហត្ថលេខាពី អាជ្ញាធរមកឲ្យលោក ឃុន ពុទ្ធី ដើម្បីមានសិទ្ធិកាន់កាប់និងអាស្រ័យផលនៅលើដីនោះ ។
ប៉ុន្តែផ្ទុយទៅវិញ លោក ឃុន វុទ្ធី បានរង់ចាំមួយសប្ដាហ៍ហើយមួយសប្ដាហ៍ទៀត ដោយលោក ស ថេង ចេះតែគេចវេសយកលេសនេះយកលេសនោះ ហើយជនរងគ្រោះចាត់ទុកថា លោក ស ថេង មានចេតនាប្រព្រឹត្តបទល្មើសឆបោកនិងរំលោភលើទំនុកចិត្តយ៉ាងពិតប្រាកដ។ បើតាមជនរងគ្រោះ គឺ ឃុន ពុទ្ធី បានបញ្ជាក់ទៀតថា លោក ស ថេង ពិតជាមានចេតនាឆបោកប្រាក់របស់លោកយ៉ាងពិតប្រាកដហើយសំណូមពរឲ្យតុលាការចាត់ការតាមផ្លូវច្បាប់។ ជុំវិញបញ្ហានេះ លោកឧត្តមសេនីយ៍ទោ ស ថេង ស្នងការនគរបាលខេត្តពោធិ៍សាត់ បានអោយដឹងនៅព្រឹកថ្ងៃទី២២ ខែកុម្ភៈ ឆ្នាំ២០២២ នេះថា នេះគឺជារឿងកិច្ចសន្យាទិញលក់ដីមិនមែនជាការឆបោកនោះទេ ដោយលោកស្នងការ អះអាងថា ដោយសាររត់ការប្លង់ដីមិនបាន តែលោកនឹងសងលុយទៅអ្នកទិញវិញ ។
ទោះបីយ៉ាងណា លោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ឆ្នាំង បានចេញដីកាកោះអញ្ជើញ លោក ស ថេង ស្នងការនគរបាលខេត្តពោធិ៍សាត់ ឲ្យចូលទៅកាន់អយ្យការអមសាលាដំបូងខេត្តកំពង់ឆ្នាំង នៅថ្ងៃទី២៨ ខែកុម្ភៈ ឆ្នាំ២០២២ វេលាម៉ោង៨ព្រឹក ខាងមុខនេះ ផងដែរ ដើម្បីសាកសួរពាក់ព័ន្ធទៅនឹងបណ្តឹងរបស់លោក ឃុន ពុទ្ធី។ ជនរងគ្រោះគឺ លោក ឃុន ពុទ្ធី នៅតែសំណូមពរអោយតុលាការចាត់ការទៅលើ លោក ស ថេង និង បក្ខពួក ទៅតាមផ្លូវច្បាប់កុំលើកលែងអោយឡើយ។ គេជឿថាបុគ្គលដែលបានប្តឺងលោក ស ថេង នេះ មិនមែនចេះតែប្តឹងបង្ខូចកេរិ៍ឈ្មោះអ្នកធំដែលជាស្នងការខេត្តមួយទាំងមូលនោះទេ វាជារឿងគ្រោះថ្នាក់ណាស់បើមិនមានធាតុផ្សំពិតប្រាកដ។ យើងរងចាំមើលចំណាត់ការរបស់តុលាការទាំងអស់គ្នា ហើយបើអញ្ចឹងមែននោះ ខូចពូជគណបក្យប្រជាជន ខូចពូជសម្តេចៗអស់ហើយទាន៕
ដោយ ÷ វិបុល
