ភ្នំពេញ ៖ នៅព្រឹកថ្ងៃទី២២ ខែសីហា ឆ្នាំ២០១៨នេះ ក្រោមអធិបតីភាព ឯកឧត្តម ចាន់ អ៊ាន អនុរដ្ឋលេខាធិការក្រសួងមហាផ្ទៃ តំណាងសម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានប្រកាសផ្ទេរភារកិច្ច តែងតាំងមុខតំណែង ប្រធាន អនុប្រធាននាយកដ្ឋានថ្មីចំនួន៥រូប និងបំពាក់ឋានន្ដរស័ក្ដិ ជូននាយនគរបាលថ្នាក់ឧត្តមសេនីយ៍ ចំនួន១៧រូប នៃអគ្គស្នងការដ្ឋាននគរបាលជាតិ ។
នាយនគរបាលដែលត្រូវទទួលការងារថ្មីចំនួន៥រូបនោះ រួមមាន៖
ទី១៖លោកឧត្តមសេនីយ៍ឯក សុខ ខេមរិន ត្រូវបានតែងតាំងជា អនុប្រធាននាយកដ្ឋានកណ្ដាលនគរបាលយុត្ដិធម៌
ទី២៖លោកឧត្តមសេនីយ៍ទោ ង៉េង ជួ ត្រូវបានតែងតាំងជា ប្រធាននាយកដ្ឋាននគរបាលព្រហ្មទណ្ឌ ទី៣៖លោកឧត្តមសេនីយ៍ទោ អ៊ីង សំអុល ត្រូវបានតែងតាំងជាប្រធាននាយកដ្ឋានកិច្ចការប៉ុស្ដិ៍នគរបាលរដ្ឋបាល ទី៤៖លោកឧត្តមសេនីយ៍ត្រី ស៊ា មុយឡុង ត្រូវបានតែងតាំងជាប្រធាននាយកដ្ឋានអក្សរសម្ងាត់ និង
ទី៥៖ លោកឧត្តមសេនីយ៍ត្រី ហេង ចាន់ធារី ត្រូវបានតែងតាំងជាប្រធាននាយកដ្ឋាននគរបាលទេសចរណ៍។
ជាមួយគ្នានេះ ក៏មានការបំពាក់ឋានន្ដរស័ក្ដិ ជូននាយនគរបាលចំនួន១៧រូបផងដែរ ដោយក្នុងនោះ ថ្នាក់ឧត្តមសេនីយ៍ឯក ចំនួន១៥រូប និងថ្នាក់ឧត្តមសេនីយ៍ទោ ចំនួន២រូប។
ថ្លែងក្នុងឱកាសនោះ ឯកឧត្តមអនុរដ្ឋលេខាធិការ ចាន់ អ៊ាន ក៏បានផ្ដាំផ្ញើដល់នាយនគរបាលដែលត្រូវបានប្រកាសចូលកាន់ តំណែងថ្មី ដោយចាប់ពីថ្ងៃនេះតទៅ ត្រូវតែបន្ដរក្សាសាមគ្គីភាពផ្ទៃក្នុង ពង្រឹង និងបង្កើតសមត្ថភាពរបស់មន្ដ្រីទាំងអស់ មិន ត្រូវប្រកាន់បក្ខពួក ឬក្រុមឡើយ គឺត្រូវធ្វើការងាររួមគ្នាជូនប្រជាពលរដ្ឋ ឲ្យស្របតាមអ្វីដែលថ្នាក់ដឹកនាំប្រគល់ជូន៕
ដោយ ៖ សំណាង
