បទ​ល្មើស​ព្រៃ​ឈើ​ក្នុង​ស្រុក​ភ្នំ​ក្រវាញ​​កក្រេីក​ឡេីង​វិញ​ជា​ប្រភព​ចំណូល​របស់​សមត្ថកិច្ច​​ជ្រក​ក្រោម​ស្ថាប័ន​រដ្ឋ ​តើ​លោក​ ​ជាវ​ តាយ​ អាច​បង្ក្រាបបានទេ!

ខេត្តពោធិ៍សាត់ ៖ នាពេលបច្ចុប្បន្នបទនេះបទល្មើសកាប់ឈើ និងដឹកជញ្ជូនខុសច្បាប់ចេញពីតំបន់ព្រៃអភិរក្សនៅក្នុងស្រុកភ្នំក្រវាញកំពុងតែកើតឡើងយ៉ាងគំហុសព្រោះមន្ត្រីបរិស្ថាន មន្ត្រីរដ្ឋបាល​ព្រៃឈើ និងសមត្ថកិច្ចពាក់ព័ន្ធគិតតែពីរឿងប្រមូលលុយដាក់ហោប៉ៅពី​បទល្មើសព្រៃឈើ។

ប្រជាពលរដ្ឋរស់នៅក្នុងស្រុកភ្នំក្រវាញបានធ្វើការ រិះគន់ចំៗលើលោកលោក គង់ ពុទ្ធីរ៉ា ប្រធានមន្ទីរបរិស្ថានខេត្តពោធិ៍សាត់ និងលោក ឡាយ វិសិដ្ឋ ប្រធានមន្ទីរកសិកម្មខេត្តពោធិ៍សាត់ ថាជាអ្នកបណ្តោយឲ្យមានបទល្មើសកាប់ឈើ និងដឹកជញ្ជូន ឈើខុសច្បាប់កើតឡើងគ្មានទីបញ្ចប់នៅស្រុកភ្នំក្រវាញ ស្រុកវាលវែង និងស្រុកក្រគរ។

ជាងនេះទៅទៀតមានសមត្ថកិច្ចពាក់ព័ន្ធខ្លះបែរជាបង្កើតកុង​ត្រូលជជុះដាក់កម្លាំងឈរជើងដើម្បីប្រមូលលុយពីបទល្មើស​ព្រៃឈើយ៉ាងសុខស្រួលដោយមិនខ្វល់ពីការរិះគន់នោះទេ។

ប្រជាពលរដ្ឋនៅស្រុកភ្នំក្រវាញបានឲ្យដឹងទៀតថា បច្ចុប្បន្នមានបុគ្គលម្នាក់ឈ្មោះ ថុង ជាមន្ត្រីអាវុធហត្ថស្រុកភ្នំក្រវាញបានបង្កើតប៉ុស្តិ៍ជជុះនៅចំណុចស្ទឹងទី ៣ផ្លូវទៅអូរដាដើម្បីគាបជម្រិត ទារយកលុយពីអ្នកដឹកឈើតាមតែអំពើចិត្តយ៉ាងកំរោលសូម្បីតែប្រជាពលរដ្ឋដឹកឈើតិចតួចយកទៅសាងសង់ ឬយកទៅជួសជុលលំនៅដ្ឋានក៏ត្រូវប្រឈមនឹងការគាបសង្កត់ យកលុយពីក្រុមពួកលោកថុងផងដែរ ប្រហែលជាពួកនេះបានដាំដើមឈើទុកពីជាតិមុនមកហើយ។

ប្រភពដដែលបានឲ្យដឹងទៀតថាឈ្មួញឈើឈ្មោះ ថា និងឈ្មោះ ចែ ភ័ស ជាប្រភពចំណូលដ៏សំខាន់និងប្រយោជន៍ធំរបស់មន្ត្រីអាវុធហត្ថឈ្មោះ ថុង នេះព្រោះពួកគេបង់លុយសម្រាប់ឈើ១រទេះគោឬ ១រទេះក្របី៥០០០០រៀល ជាប្រចាំមិនអាចខក ខានបានទេ រីឯឈ្មួញម្នាក់ទៀតឈ្មោះ ទឹង បានបង់លុយប្រចាំខែឲ្យមន្ត្រីអាវុធហត្ថឈ្មោះ ថុង ក្នុង១ខែ១​លានរៀល ដោយបុគ្គលឈ្មោះ ថុង នេះបានអះអាងថាយកទៅបង់ឲ្យមេបញ្ជាការអាវុធហត្ថខេត្តពោធិ៍សាត់។

ទាក់ទងការដាក់កុងត្រូលជជុះជំរិតទារប្រាក់និងការចោទប្រកាន់លើមន្ត្រីព្រៃឈើ និងមន្ត្រីបរិស្ថានខាងលើអង្គភាព RskyNews យើងខ្ញុំបានស្វះ ស្វែងរកការបំភ្លឺពីភាគីខាងលើនៅរសៀលថ្ងៃអាទិត្យ ទី០២ ខែមករា ឆ្នាំ២០២២ នេះដែលតែពុំមានលេខ ទូរស័ព្ទដើម្បីធ្វើការទាក់ទង ទោះយ៉ាងណាអង្គភាពយើងខ្ញុំរង់ចាំការបំភ្លឺរៀងរាល់ម៉ោងធ្វើការពីភាគីពាក់ព័ន្ធ៕

ដោយ ÷ សិរីបុត្រ