តើលោកនីមេបនល្បែងជល់មាន់ និងអាប៉ោងជានរណា ទើបសមត្ថកិច្ចស្រុកទឹកឈូ ខេត្តកំពត មិនហ៊ានបង្ក្រាបឬមួយជាឆ្នាំងបាយប្រចាំខែហើយ?

ខេត្តកំពត ÷ ទីតាំងល្បែងមាន់ជល់និងអាប៉ោងដុះស្លែមួយកន្លែងស្ថិតនៅក្នុងភូមិម្លិចគល់ ឃុំព្រៃឃ្មុំ ស្រុកទឹកឈូ ខេត្តកំពត សង្ស័យជាឆ្នាំងបាយរបស់អាជ្ញាធរនិងសមត្ថកិច្ចហើយ បានជាទីតំាងនេះបើកដំណើរការលេងយ៉ាងរលូន។

បើយោងតាមបងប្អូនប្រជាពលរដ្ឋដែលរស់នៅជុំវិញទីតាំងខាងលើបានផ្ដល់ដំណឹងមកអង្គភាពគេហទំព័រ RskyNews យើងឲ្យដឹងថាមានទីតាំងល្បែងជល់មាន់និងអាប៉ោងដុះស្លែមួយកន្លែងដែលស្ថិតនៅក្នុងឃុំព្រៃឃ្មុំ ស្រុកទឹកឈូ ខេត្តកំពត។

ប្រជាពលរដ្ឋបន្តថាចំពោះទីតាំងល្បែងជល់មាន់និងអាប៉ោងដុះស្លែដ៏ធំមួយកន្លែងនេះមិនដែលឃើញមានសមត្ថកិច្ចនិងអាជ្ញាធរចុះមកធ្វើការហាមឃាត់ក៏ដូចជាធ្វើការបង្ក្រាបម្តងណាឡើយ សង្ស័យតែអាជ្ញាធរនិងសមត្ថកិច្ចត្រូវរ៉ូវជាមួយនឹងម្ចាស់ទីតាំងល្បែងស៊ីសងនេះហើយ។ មហាជនដាក់ការសង្ស័យចំៗ ថាប្រសិនបើគ្មានការបើកដៃនិងមើលការខុសត្រូវពីសមត្ថកិច្ចនៃអធិការរដ្ឋានស្រុកទឹកឈូនោះទេ គឺល្បែងស៊ីសងបែបខុសច្បាប់នេះមិនអាចកើតមាននៅលើដែនសមត្ថកិច្ចរបស់លោកអធិការស្រុកទឹកឈូបានឡើយ។

ប្រជាពលរដ្ឋសូមសំណូមពរដល់លោក ម៉ៅ ធនិនដែលទើបតែផ្លាស់ទៅកាន់អភិបាលខេត្តកំពត លោកឧត្តមសេនីយ៍ ម៉ៅ ច័ន្ទមធុរិទ្ធ ស្នងការនគរបាលខេត្តកំពត មេត្តាចាត់វិធានការបង្ក្រាបផងខ្លាចថ្ងៃមុខមានអំពើហឹង្សាក្នុងគ្រួសារក៏ដូចជាចោលឆក់ ចោរប្លន់ ជាដើម ដែលជាហេតុធ្វើឲ្យប៉ះពាល់ដល់សន្តិសុខសង្គមជាតិ៕

ដោយ ÷ វិបុល