ខេត្តព្រះវិហារ ÷ មេខ្មូតស៊ីឈើប្រភេទផ្ទះចាស់ឈ្មោះ ស្រី សារឿន ភេទប្រុសអាយុ៤៦ ឆ្នាំនិងប្រពន្ធឈ្មោះ ស្រី ដា ហៅ (យាយអឿន) មានទីលំនៅរស់នៅខេត្តតាកែវ បានប្រមូលទិញឈើផ្ទះចាស់ៗមិនចេះអស់ពីក្នុងទឹកដីខេត្តព្រះវិហារ ជា ពិសេសនៅថ្ងៃទី២៧ ខែវិច្ឆិកា ឆ្នាំ២០២១ កន្លងទៅនេះ មេខ្មូតទាំងពីរនាក់ប្ដីប្រពន្ធ បានទិញផ្ទះចាស់បីខ្នង(ទំហំ៨គុណនឹង១៣ ម៉ែត្រ)ពីឈ្មោះ វង្ស វណ្ណា និងប្រពន្ធឈ្មោះ ស្រ៊ុន ស្រីនាង រស់នៅភូមិបុះធំ ឃុំស្រមេ ស្រុកត្បែងមានជ័យខេត្តព្រះវិហារ ដើម្បីដឹក ជញ្ជូនយកទៅខេត្តតាកែវបន្តទៀតដោយមានច្បាប់អនុញ្ញាតពីអាជ្ញាធរមូលដ្ឋានត្រឹមត្រូវ។
ប្រភពពីសមត្ថកិច្ចនៅតំបន់នោះបានឱ្យអ្នកសារ ព័ត៌មានយើងដឹងថា ÷ មេឈ្មួញទិញឈើទាំងពីរនាក់ប្ដីប្រពន្ធនេះបានមកប្រមូលទិញឈើនៅស្រុកត្បែងមានជ័យ និងស្រុកជ័យសែន ជាលក្ខណៈកន្ទេលធំបន្លំដេក ដោយយកឈ្មោះថ្នាក់ដឹកនាំម្នាក់នៅក្នុងខេត្តព្រះវិហារ មកកាងអាជីពទិញឈើរបស់ខ្លួនថែមទៀត បូកផ្សំទាំងរត់ការចែកលុយផងដែលទើបគ្មានជំនាញខាងណាអាចបង្ក្រាបបានឡើយ។
ជាក់ស្ដែងជំនាញកងរាជអាវុធហត្ថបានបង្ក្រាបជា ច្រើនលើកច្រើនសារលើឈ្មួញទាំងពីរនាក់ប្ដីប្រពន្ធរូបនេះ ហើយក៏បានប្រគល់វត្ថុតាងទៅជំនាញដើម្បីត្រួតពិនិត្យនិងចាត់ការតាមច្បាប់ តែជាលទ្ធផលគ្រាន់បានតែជាការល្អមើលប៉ុណ្ណោះ ដោយមានអ្នកធំអន្តរាគមន៍ដោះលែងទៅវិញ។ ប្រភពបានបន្តទៀតថា ÷ ការទិញផ្ទះចាស់ខាងលើនេះភាគច្រើនមានតែគ្រោងផ្ទះអត់ដំបូលដោយសង់ទុកចោលហើយឈើដែលត្រូវដឹកជញ្ជូនឡើងឡានភាគច្រើនជាឈើដំដែកគោលរួចយកទៅត្រាំទឹកដោយបន្លំធ្វើជាឈើផ្ទះចាស់។
ប្រជាពលរដ្ឋបានដាក់សំណួរសួរថា ÷ តើផ្ទះចាស់នៅតំបន់ខាងលើនោះក្នុងមួយឆ្នាំលក់អស់ប៉ុន្មានខ្នងផ្ទះហេតុអ្វីបានជាដឹកមិនចេះអស់ ហើយពួកគាត់លក់ផ្ទះទាំងអស់នោះរួច តើពួកគាត់សង់ផ្ទះថ្មីធ្វើអំពីឈើឬក៏ធ្វើអំពីថ្មវិញសម្រាប់ការរស់នៅសព្វថ្ងៃ?
ដោយឡែកមន្ត្រីជំនាញបានបញ្ជាក់ថាផ្ទះចាស់ពិតប្រាកដគឺពួកគាត់អាចធ្វើការលក់ចេញទៅក្រៅស្រុកបានដោយផ្ទះនោះត្រូវមានអាយុកាលចាប់ពី ៤ទៅ៥ឆ្នាំតាមប្រភេទឈើទើបអាចលក់ រុះរើដឹកចេញបានដោយគ្មានការបង្ក្រាប។
ពាក់ព័ន្ធនឹងការប្រមូលទិញឈើខាងលើនោះកាលពីល្ងាចថ្ងៃទី២៩ ខែវិច្ឆិកា ឆ្នាំ២០២១ មានអាខោន facebook ឈ្មោះ ចែដា តាកែវ បានបង្ហោះរូបឡាននិងភ្នាក់ងារសារព័ត៌មានម្នាក់។ លុះដល់ព្រឹកថ្ងៃទី ៣០ខែ ឆ្នាំដដែល អាខោនហ្វេសប៊ុកដដែលបានបង្ហោះសារមួយឃ្លាទៀតថាករណីដឹកឈើផ្ទះចាស់អ្នកសារព័ត៌មានមកគំរាមយកលុយ៥០ម៉ឺនទាំងប្ដីនិងប្រពន្ធឱ្យម្នាក់៥ម៉ឺនរៀលអត់យក។
ឆ្លើយតបទៅនិងសារដែលបានបង្ហោះតាមទំព័រអាខោនហ្វេសប៊ុកឈ្មោះ ចែដា តាកែវ អង្គភាព RskyNews យើងបានធ្វើការទំនាក់ទំនងទៅអ្នកសារព័ត៌មានខាងលើ ដោយពួកគាត់បានបញ្ជាក់ថាពួកគាត់មានគ្នាបីនាក់ចុះទៅដល់ទីតាំងលក់ផ្ទះចាស់ខាងលើនោះ តែពេលទៅដល់ឈ្មោះ ស្រី ដាហៅយាយអឿនបានមកជួបពួកគាត់ ហើយសួរពួកគាត់ថាតើមកពីខាងណា? ពួកគាត់ឆ្លើយថាជាអ្នកសារព័ត៌មាន ពេលនោះយាយអឿនបាននិយាយថាថ្ងៃនេះមានអ្នកសារព័ត៌មាន និងសមត្ថកិច្ចបានមកយកលុយគាត់មិនក្រោមពី១០០នាក់នោះទេ បន្ទាប់មកយាយអឿនបានឱ្យកូនចៅទៅយកលុយមកឲ្យពួកគាត់៥ម៉ឺនរៀល ដោយពួកគាត់តបវិញថា ពួកខ្ញុំមកយកព័ត៌មានសម្រាប់ចុះផ្សាយតាមបណ្ដាញសង្គមគឺមិនមែនមកយកលុយទេ ហើយក៏នាំគ្នាចាកចេញពីទីនោះទៅ។
ប្រជាពលរដ្ឋបានដាក់ការសង្ស័យថាប្រហែលជាត្រូវដងត្រូវផ្លែរវាងមន្ត្រីជំនាញជាមួយមេខ្មូតឆ្លងខេត្តទាំងពីរនាក់ប្ដីប្រពន្ធនោះហើយមើលទៅ។ ប្រភពបន្ថែមទៀតថាជាក់ស្ដែងពេលជំនាញកាន់អ្វីគឺរលាយនោះជាក់ស្ដែងកាន់ព្រៃឈើរលាយព្រៃឈើ ដោយដឹកមិនចេះអស់ គ្រប់គ្រងមច្ឆាជាតិរលាយត្រី។ ប្រភពបានសំណូមពរដល់មន្ត្រីជំនាញនិងអាជ្ញាធរមូលដ្ឋានត្រូវត្រួតពិនិត្យអោយបានហ្មត់ចត់មុននិងអនុញ្ញាតជៀសវាងមានការយល់ច្រឡំ បើគាត់ដឹកឈើផ្ទះចាស់ មានច្បាប់ពិតប្រាកដមែនហេតុអ្វីបានជាចាំបាច់ចែកលុយអ្នកដែលទៅជួបក្នុងម្នាក់ៗទទួលបានពី៥ម៉ឺនរៀលទៅ១០ម៉ឺនរៀល។
ពាក់ព័ន្ធការចោទប្រកាន់ខាងលើអង្គភាពយើងខ្ញុំបានស្វះស្វែងរកការបំភ្លឺពីភាគីពាក់ព័ន្ធនៅល្ងាចថ្ងៃអង្គារ ទី៣០ ខែវិច្ឆិកា ឆ្នាំ២០២១ នេះតែលទ្ធផលគឺមិនមានលេខទូរស័ព្ទសម្រាប់ទាក់ទង ទោះយ៉ាងណាអង្គភាពយើងនឹងរង់ចាំការបំភ្លឺគ្រប់ពេល វេលាពីភាគីពាក់ព័ន្ធពិសេសយាយអឿនិងប្ដីរបស់គាត់៕
ដោយ ÷ វិបុល
