ខេត្តកំពង់ឆ្នាំង ៖ បុរសវ័យចំណាស់ដែលមានឈ្មោះថា ឈឹម ឈៀន ប្រធានសហព័ន្ធនេសាទខេត្តកំពង់ឆ្នាំង បានប្រើប្រាស់វេទមន្តអន្ទងចិត្តដល់មន្ត្រីជំនាញថ្នាក់ក្រោមជាតិរហូតដល់ថ្នាក់ជាតិដើម្បីសុំអនុញ្ញាតចាប់ត្រីតាមព្រែកក្នុងស្រុកជលគីរី រលាប្អៀរ និងកំពង់ត្រឡាច ខេត្តកំពង់ឆ្នាំង នៅរដូវខ្នើត។
ព្រែកទាំងអស់នោះមានដូចជា÷
១. ព្រែកប្រណាក់ ស្ថិតនៅភូមិក្បាលកន្លង់ ឃុំពាមឆ្កោក ស្រុកជលគីរី ខេត្តកំពង់ឆ្នាំង។
២. ព្រែកបាញ់រះ ស្ថិតនៅភូមិគៀនតាម៉ា ឃុំកំពង់អុស ស្រុកជលគីរី ខេត្តកំពង់ឆ្នាំង។
៣. ព្រែកយួន ស្ថិតនៅភូមិអន្លង់អក ឃុំកំពង់អុសស្រុកជលគីរី ខេត្តកំពង់ឆ្នាំង។
៤. ព្រែកល្វា ស្ថិតនៅភូមិកោះថ្កូវ ឃុំជ្រោយរកា ស្រុកកំពង់ត្រឡាច ខេត្តកំពង់ឆ្នាំង។
និងមានព្រែកជាច្រើនទៀតស្ថិតនៅក្នុងស្រុកជលគីរីកំពង់ត្រឡាច។
ប្រជាជននេសាទលក្ខណៈគ្រួសារកំពុងតែត្អួញត្អែរថាពួកគាត់មិនអាចនេសាទបានដោយមានការរំខានពីពួកមេព្រែកអស់ទាំងនោះដែលមានលិខិត អនុញ្ញាតមួយសន្លឹកពីក្រសួងកសិកម្ម តែតាមខ្លឹមសារនៃលិខិតអនុញ្ញាតគឺតម្រូវឲ្យមន្ទីរកសិកម្មចេញលិខិតអនុញ្ញាតមួយទៀត។
ប្រជានេសាទដដែលបានស្នើសុំដល់សម្ដេចតេជោ ហ៊ុន សែន នាយករដ្ឋមន្ត្រី មេត្តាជួយអន្តរាគមន៍ដកយកព្រែកពីពួកឈ្មួញទាំងអស់នោះវិញដើម្បីបង្កលក្ខណៈងាយស្រួលដល់ពួកគាត់នេសាទរកថវិកាចិញ្ចឹមគ្រួសារ៕
ដោយ ÷ មាស ម៉ន