រាជធានីភ្នំពេញ ៖ ក្មេងប្រុសឈ្មោះ យឹមសំណាង អាយុ១៥ឆ្នាំ រស់នៅភូមិព្រៃកុដិ សង្កាត់កំបូល ខណ្ឌកំបូល រាជធានីភ្នំពេញ ត្រូវបានជនសង្ស័យឈ្មោះ វ៉ន វុទ្ធី (ហៅម៉ៅ) មន្ត្រីយោធាកងអន្តរាគមន៍ឆ័ត្រយោង៩១១ (ប្រាប់មន្ត្រីនគរបាលយុត្តិធម៍)ប្រើប្រាស់ហឹង្សាវ៉ៃរហូតដល់សន្លប់កាលពីវេលាម៉ោងប្រហែល៥.៣០នាទីព្រលប់នាថ្ងៃទី២០ ខែវិច្ឆិកា ឆ្នាំ២០២១ នៅមុខផ្ទះជនសង្ស័យខាងលើស្ថិតនៅភូមិតាគេ សង្កាត់កំបូល ខណ្ឌកំបូលរាជធានីភ្នំពេញ។
តាមការបញ្ជាក់ពីអ្នកស្រី ហេង សុក ម្ដាយរបស់ក្មួយប្រុសឲ្យដឹងថា មុនពេលកើតហេតុជនរងគ្រោះត្រូវបានម្តាយប្រើឱ្យទៅយកខោអាវបោកអ៊ុតនៅទីតាំងខាងលើ ស្របពេលជនសង្ស័យ វ៉ន វុទ្ធី កំពុងអង្គុយផឹកស៊ីជាមួយបក្សពួក៤-៥ នាក់នៅក្បែរទីនោះ ដោយខោអាវមិនទាន់រួចរាល់ម្ចាស់ហាងបោកអ៊ុតឲ្យក្មេងប្រុសនោះអង្គុយរង់ចាំបន្តិចសិន បន្ទាប់មកក្មេងប្រុសនោះក៏បានលេងសើចជាមួយមិត្តភ័ក្ត្ររបស់វា ពេលនោះជនសង្ស័យ វ៉ន វុទ្ធី បានដើរចូលមកហើយសួរក្មេងប្រុសនេះថា អ្ហែងចង់ធ្វើបងធំនៅទីណាទេឬ? ក្មេងប្រុសបានឆ្លើយថាខ្ញុំគ្រាន់តែលេងជាមួយមិត្តភ័ក្រ្តរបស់ខ្ញុំទេ ពេលនោះជនសង្ស័យក៏បានទះកំភ្លៀងជនរងគ្រោះមួយដៃ ហើយអុកនិងក្បាលជង្គុង ព្រមទាំងចាប់កអាវក្មេងបោកទៅនឹងធុងទឹកកក បន្ទាប់មកក្មេងប្រុសជនរងគ្រោះបានសន្លប់ ហើយមានអ្នកជិតខាងមកជួយសង្គ្រោះ។
ក្មេងប្រុស យឹម សំណាង កំពុងសម្រាកព្យាបាលនៅមន្ទីរសំរាកព្យាបាល និង សម្ភព កំបូល ស័ក្កសិទ្ធ ដោយឡែកជនសង្ស័យត្រូវបានសមត្ថកិច្ចប៉ុស្តិ៍នគរបាលរដ្ឋបាលកំបូលឃាត់ខ្លួនដើម្បីសាកសួរបន្តនីតិវិធីតាមច្បាប់។
តាមប្រភពពីកន្លែងសមត្ថកិច្ចបានឲ្យដឹងថាករណីខាងលើនេះកំពុងមានអ្នករត់ការដោះស្រាយជនល្មើស វ៉ន វុទ្ធី ទៀតហើយ។
សម្រាប់ឪពុកម្តាយរបស់ក្មេងប្រុស យឹម សំណាង សំណូមពរ និងអំពាវនាដល់ថ្នាក់ដឹកនាំទាំងអស់ជាពិសេសសម្តេចតេជោ ហ៊ុន សែន និងសម្តេចកតិព្រឹទ្ធបណ្ឌិត ប៊ុន រ៉ានី ហ៊ុន សែន មេត្តាជួយរកយុត្តិធម៌ជូនកូនប្រុសរបស់គាត់៕
ដោយ ÷ រ៉ាម៊ុល
