ខេត្តកំពង់ឆ្នាំង ៖ បទល្មើសរបាំងស្បៃមុង និងរបាំងសាច់អួនខុសច្បាប់ បានកើតមានច្រើន នៅក្នុងដែននេសាទស្រុកជលគិរី ដោយសមត្ថកិច្ចរដ្ឋបាលជល ផល កំពង់ឆ្នាំង បង្ក្រាបហើយ កើតវិញភ្លាមយ៉ាង ណាក្ដីក៏សមត្ថកិច្ចរដ្ឋបាលជលផលកំពង់ឆ្នាំង ដឹក នាំដោយលោក លី ឡា នាយខណ្ឌ បានបន្តការចេញបង្ក្រាបផ្ទួនៗមិនដកដៃទោះជាជិតផុតរដូវបិទនេសាទក្ដី។
លោក លី ឡា នាយខណ្ឌរដ្ឋបាលជលផលកំពង់ ឆ្នាំង បានប្រាប់អ្នកព័ត៍មានឲ្យដឹងថានៅថ្ងៃទី២៦ និងថ្ងៃទី២៨ ខែកញ្ញា ឆ្នាំ២០២១ សមត្ថកិច្ចរដ្ឋ បាលជលផល ផ្នែកកំពង់ប្រាសាទ ដឹកនាំដោយលោកឃីម ឡុង បានចេញបង្ក្រាប២ថ្ងៃ ដែលទទួលផលសរុបបាន រុះរើរបាំងស្បៃមុង និងរបាំងសាច់អួនចំនួន៦៨កន្លែង ស្មើនឹងប្រវែង ៥៣០០ ម៉ែត្រ លូស្បៃមុង ៥៨គ្រឿង បង្គោល ២៧០០ដើម និងចាក់លែងកូនត្រីចម្រុះប្រមាណ៣៨០គីឡូក្រាមស្ថិតនៅចំណុចចុងព្រែកប្រចាន់ ត្រាំកំបោរ តំរាំងក្របី កំពង់តាអួរ ជ្រុងត្រែង និងទួលគោកក្របៅ ឋិតនៅក្នុងឃុំជលសារ ព្រៃគ្រី និងពាមឆ្កោក ។
សម្រាប់នៅថ្ងៃទី២៩ ខែកញ្ញា ឆ្នាំ២០២១ បានបន្ត ចេញបង្ក្រាប ដោយចែកជា២ក្រុម គឺក្រុមទី១ បង្ក្រាបនៅស្រុកកំពង់លែង ចំណុចព្រែកចង្គៀង ក្នុងភូមិសាស្ត្រ ភូមិជ្រលង ឃុំដារ ដឹកនាំដោយលោក ឌុល ច័ន្ទឌី នាយសង្កាត់កំពង់លែង មានកម្លាំង៤នាក់ និងកាណូតបាឡាស្មាច់ ០១គ្រឿង។
ចំណែកក្រុមទី២ គឺដឹកនាំដោយលោកផ្ទាល់ បង្ក្រាបនៅចំណុចព្រែកត្រប់ ភូមិព្រែកត្រប់ ឃុំជលសារ ចំណុចអន្លង់អក និងចុងព្រែកយួន ឃុំកំពង់អុស មានកម្លាំងសរុប ២៩នាក់ ក្នុងនោះ មានសមត្ថកិច្ចរដ្ឋបាលជលផលខណ្ឌ សង្កាត់ជលគិរី សង្កាត់កំពង់ ប្រាសាទ សហគមន៍នេសាទអន្លុងមេត្រីសែនជ័យ និងសហគមន៍នេសាទភូមិថ្មី ដោយមធ្យោបាយកាណូត០៧គ្រឿង។ ជាលទ្ធផលសរុបទាំង២ក្រុមបានរុះរើរបាំងស្បៃមុងចំនួន៣៩កន្លែង ស្មើនឹងប្រវែង១៤៥០ម៉ែត្រ លូបស្បៃម៉ុង៤១គ្រឿង បង្គោល៥០០ដើម និងចាក់លែងកូនត្រីចម្រុះ ១៧០គីឡូក្រាម ៕
