ភ្នំពេញ៖ លោកយឹម សារ៉ាន់ អធិការនគរបាលខណ្ឌពោធិ៍សែនជ័យ អមដំណើរដោយលោកអធិការរងនគរបាលខណ្ឌមួយចំនួនបានចុះទៅកាន់បណ្ដាប៉ុស្ដិ៍នគរបាលរដ្ឋបាលទាំង១៣ ចំណុះអោយអធិការនគរបាលខណ្ឌ កាលពីវេលាព្រឹកថ្ងៃទី២០ ខែមេសា ឆ្នាំ២០១៨ ។ក្នុងទិសដៅដើម្បីធ្វើការអប់រំណែនាំដល់មន្ត្រីនគរបាលប៉ុស្ដិ៍ទាំងនោះពីរបៀបរបបក្នុងការអនុវត្តន៍ការងារ ជាពិសេសប៉ុស្តិ៍ចំនួន២ដែលកំពុងបង្កការក្ដៅក្រហាយដល់ប្រជាពលរដ្ឋ ។ហើយប្រជាពលរដ្ឋបានផ្ញើរសារធ្វើការរិះគន់ចំៗដោយផ្ទាល់តាមរយះហ្វេសប៊ុកផេករបស់លោកអធិការតែម្ដងនោះ គឺមានប៉ុស្តិ៍ចោមចៅទី១និងចោមចៅទី២ ដែលជាប៉ុស្តិ៍ទើបបំបែកថ្មី។
មន្ត្រីនគរបាលមួយរូបបាននិយាយថា តាមទិសដៅលោកអធិការត្រូវចុះទៅកាន់បណ្ដាប៉ស្តិ៍រដ្ឋបាលទាំងអស់ ប៉ុន្តែជាក់ស្ដែងពេលនេះលោកបានចុះទៅកាន់ប៉ុស្តិ៍ទាំង២ខាងលើនោះមុនគេ គឺប៉ុស្តិ៍ចោមចៅទី១និងចោមចៅទី២ ដោយសារតែប៉ុស្តិ៍ទាំង២នេះបានបង្កការស្មុគស្មាញច្រើនក្នុងពេលចុះអនុវត្តច្បាប់ចរាចរណ៏ ចាប់ម៉ូតូអត់មួក អត់កញ្ចក់រួចផាកពិន័យលើសពីសៀវភៅបន្ទុកហើយគ្មានវិក័យប័ត្រត្រឹមត្រូវ ជាពិសេសការធ្វើសៀវភៅស្នាក់នៅ និងសៀវភៅគ្រួសារទារលុយពីប្រជាពលរដ្ឋជាដើម។ រហូតធ្វើឲ្យប្រជាពលរដ្ឋមានការក្ដៅក្រហាយ បានផ្ញើរសាររិះគន់ដោយផ្ទាល់តាមរយៈអាខោនហ្វេសប៊ុកផេករបស់លោកអធិការជាបន្តបន្ទាប់។
នៅក្នុងឱកាសនោះលោកអធិការបានណែនាំ៣ចំណុចទៅដល់លោកនាយ នាយរងនគរបាលប៉ុស្តិ៍ទាំងពីរឲ្យអនុវត្តន៍ ក្នុងនោះរួមមាន៖
– ទី១,ធ្វើសៀវភៅគ្រួសារ និងសៀវភៅស្នាក់នៅ ពេលដែលគាត់ផ្លាស់មកសូមឲ្យពួកគាត់មានលិខិតផ្លាស់ទីលំនៅ មានថ្ងៃខែឲ្យបានច្បាស់លាស់ថា គាត់ផ្លាស់ទៅនៅឯណាស្រុកណា ខណ្ឌណា ខេត្តណាឲ្យបានច្បាស់លាស់ ហាមប៉ះពាល់លុយកាក់ពីពួកគាត់ឲ្យសោះ ដូច្នេះការទាលុយបែបនេះគឺខុសច្បាប់ហើយព្រោះគោលការណ៍មិនមានឲ្យយកលុយឯណា។
-ទី២,ការអនុវត្តន៍ច្បាប់ចរាចរណ៏ក៏ដូចគ្នាត្រូវអនុវត្តន៍ទៅតាមគោលការរបស់ថ្នាក់លើនិងអនុវត្តន៍តាមស្ថានការកុំធ្វើតែចំពោះកម្មករពេកត្រូវធ្វើទូទៅ ដោយស្មើរភាព។ លោកបានបន្តទៀតថា ទាំងការធ្វើសៀវភៅស្នាក់នៅ សៀវភៅគ្រួសារ និងការអនុវត្តច្បាប់ចរាចរណ៏យើងយកលុយគេគឺពាក់ព័ន្ធទៅនិងអំពើពុករលួយ និងខុសច្បាប់ព្រោះតែការអនុវត្តន៍ខុសតួនាទីនេះហើយ។និងទី៣,ការអនុវត្តន៍វិន័យដែលមន្ត្រីនគរបាលទាំងអស់ត្រូវស្លៀកពាក់ឯកសណ្ឋានឲ្យបានសមរម្យ និងគោរពពេលវេលា ជាពិសេសគោរពបទបញ្ជាមេកើយ ព្រមទាំងបម្រើប្រជាពលរដ្ឋឲ្យបានល្អ៕
ប្រភពផេកអធិការខណ្ឌពោធិសែនជ័យ
