ខេត្តកំពង់ធំ ៖ បន្ទាប់ពីបញ្ជាការដ្ឋានកងរាជអាវុធហត្ថលើផ្ទៃប្រទេសបានចេញសេចក្ដីជូនដំណឹងដល់សិស្ស និស្សិត និងយុវជន ទាំងអស់ដើម្បីធ្វើការជ្រើសរើសពលទាហានដើម្បីបំពេញក្របខ័ណ្ឌឲ្យកងរាជអាវុធហត្ថចំនួន ២៦០ (ពីររយហុកសិប)នាក់។
កាលពីថ្ងៃទី ១២ ខែកញ្ញាឆ្នាំ ២០១៩ រួចមកលោកវីរសេនីយ៍ត្រី រស់ តឿ ដែលមានតួនាទីជាប្រធានមន្ទីរស្រាវជ្រាវព័ត៌មានសន្តិសុខនៃកងរាជអាវុធហត្ថខេត្តកំពង់ធំ បានដើរគៀងគររកអ្នកដែលស្ម័គ្រចិត្តចូលបម្រើការងារក្នុងក្របខ័ណ្ឌកងរាជអាវុធហត្ថ ដោយលោក រស់តឿ បានយកប្រាក់ក្នុងម្នាក់តម្លៃ 8000$(ប្រាំបីពាន់ដុល្លារ) ដែលមានចំនួន 2 នាក់ ម្នាក់រស់នៅ ឃុំផ្សារក្រង ស្រុកស្ទោង និងម្នាក់ទៀតរស់នៅក្នុងស្រុកប្រាសាទសំបូរ ខេត្តកំពង់ធំ ហើយបានប្រាប់ថាខ្លួនយកលុយ ទាំងនោះមករត់ការដើម្បីបានឈ្មោះចូលក្របខណ្ឌកងរាជអាវុធហត្ថ។
ដោយមានការបន្លាយពេលវេលាយ៉ាងយូររហូតមកដល់ឆ្នាំ ២០២១ នេះលោករស់ តឿ តែងតែដោះសារប្រាប់អ្នកទាំងពីរនោះថាដោយសារតែបញ្ហាមានផ្ទុះនូវជំងឺកូវីដ 19 ទើបបានជាមានការយឺតយ៉ាវ ។ តែដោយឡែកនៅក្នុងសំណេរនៃ សេចក្ដីជូនដំណឹងរបស់បញ្ជាការដ្ឋានកងរាជអាវុធហត្ថខេត្តកំពង់ធំ បានបញ្ជាក់យ៉ាងច្បាស់ថាចំពោះអ្នកដែលមាន
បំណងចង់ចូលបម្រើការងារក្នុងក្របខណ្ឌកងរាជអាវុធហត្ថ (ដោយឥតគិតប្រាក់) ចុះហេតុអ្វីបានជាលោក រស់ តឿ និងបក្ខពួកហ៊ានអួតអាងនិងទទួលយកលុយពីអ្នកដែលមានបំណងចង់ចូលបម្រើការងារក្នុងកងរាជអាវុធហត្ថទៅវិញ។
ជនរងគ្រោះទាំងពីរនាក់ខាងលើគោរពសូមស្នើដល់ឯកឧត្តមនាយឧត្តមសេនីយ៍ សៅ សុខា អគ្គមេបញ្ជាការរងកងយុទ្ធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស គួរតែយកអភិក្រមទាំង ៥ របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មកអនុវត្តលើបុគ្គលឈ្មោះ រស់ តឿ និងបក្សពួកដើម្បីកុំឱ្យមានមន្ត្រីផ្សេងៗទៀតធ្វើតម្រាប់ដូចបុគ្គលខាងលើនេះ។
រាល់ការចោទប្រកាន់ខាងលើនេះ អង្គភាពយើងខ្ញុំបានស្វះស្វែងរកការបំភ្លឺពីសំណាក់លោក រស់ តឿ តែពុំអាចទំនាក់ទំនងបាន (ដោយគ្មានលេខទូរស័ព្ទ) អង្គភាពយើងខ្ញុំរីករាយនឹងរងចាំការបំភ្លឺពីសំណាក់សាមុីជនរាងរាល់ម៉ោងធ្វើការ៕
ដោយ ៖ វិបុល
